ជាតិ
ក្រុមគ្រួសារជនរងគ្រោះក្នុងគ្រោះចរាចរណ៍នៅបាវិតថា ក្រុមហ៊ុនមិនគោរពសាលក្រម
×![]()
ភ្នំពេញ៖ ភាគីក្រុមគ្រួសារកម្មករ-កម្មការិនីរងគ្រោះក្នុងករណីគ្រោះថ្នាក់ចរាចរណ៍នៅក្រុងបាវិត បានបដិសេធសំណងរដ្ឋប្បវេណីរបស់ក្រុមហ៊ុនរថយន្តក្រុងបង្កគ្រោះថ្នាក់ចរាចរណ៍។ ពួកគេអះអាងថា ក្រុមហ៊ុន ពុំបានគោរពតាមសាលក្រមរបស់សាលដំបូងខេត្តស្វាយរៀង ដែលបង្គាប់ម្ចាស់ក្រុមហ៊ុនឲ្យផ្តល់សំណងរដ្ឋប្បវេណីដល់ក្រុមគ្រួសារអ្នកស្លាប់ចំនួន ១៩នាក់ ទទួលបានចំនួន ១២លានរៀលក្នុងមួយនាក់ និងអ្នករបួសធ្ងន់ ១២នាក់ ចំនួន ១០លានរៀលក្នុងមួយនាក់ និងអ្នករបួសស្រាលចំនួន ៦នាក់ ទទួលបានសំណងរដ្ឋប្បវេណីចំនួន ៩លានរៀល ក្នុងមួយនាក់។
តំណាងភាគីក្រុមគ្រួសារជនគ្រោះក្នុងឃុំពោធិ៍រាជ ស្រុកស្វាយជ្រំ ខេត្តស្វាយរៀង លោកស្រី ពេជ្រ តឿក អាយុ ៥០ឆ្នាំ មិនយល់ព្រមទទួលសំណងរបស់ម្ចាស់ក្រុមហ៊ុនរថយន្តក្រុងទេ។ លោកស្រីនិយាយថា ម្ចាស់រថយន្តផ្តល់សំណងចំនួន ៥ ម៉ឺនដុល្លារអាមេរិកតែប៉ុណ្ណោះ ដល់គ្រួសារភាគីជនរងគ្រោះទាំងស្លាប់ និងរបួសធ្ងន់ស្រាលទាំងអស់ចំនួន ៣៧នាក់។
ស្រី្តដែលមានកូនស្រីស្លាប់ម្នាក់ ប្តី និងកូនស្រីរបួសធ្ងន់ក្នុងករណីគ្រោះថ្នាក់ចរាចរណ៍ បានបញ្ជាក់យ៉ាងដូច្នេះថា៖«ក្រុមគ្រួសារជនរងគ្រោះទាំងអស់ រស់នៅពឹងនឹងប្រាក់ខែកូនប៉ុណ្ណោះ ឥឡូវកូនស្លាប់ និងអ្នកខ្លះរងរបួសគ្រោះថ្នាក់ អត់បានធ្វើការការងារទៀត ដូចនេះក្រុមគ្រួសារទាំងអស់ពុំអាចទទួលយកសំណងនេះបានទេ។ យើងនឹងពឹងមេធាវីប្តឹង ទៅភ្នំពេញបន្តទៀត»។
បើតាមលោកស្រី ពេជ្រ តឿក ភាគីក្រុមគ្រួសារជនរងគ្រោះបាត់បង់ជីវិតទាមទារសំណងរដ្ឋប្បវេណីចំនួន ២ ម៉ឺនដុល្លារអាមេរិកក្នុងមួយនាក់ និងអ្នករបួសធ្ងន់ស្រាលចំនួន ១ ម៉ឺុនដុល្លារអាមេរិកក្នុងមួយនាក់។
បើតាមលោកស្រី ពេជ្រ តឿក ភាគីក្រុមគ្រួសារជនរងគ្រោះបាត់បង់ជីវិតទាមទារសំណងរដ្ឋប្បវេណីចំនួន ២ ម៉ឺនដុល្លារអាមេរិកក្នុងមួយនាក់ និងអ្នករបួសធ្ងន់ស្រាលចំនួន ១ ម៉ឺុនដុល្លារអាមេរិកក្នុងមួយនាក់។
គួរបញ្ជាក់ថា កាលពីថ្ងៃទី ៨ ខែតុលា ២០១៥ ចៅក្រមជំនុំជម្រះនៃសាលាដំបូងខេត្តស្វាយរៀង លោក សុធី បូរ៉ាឆាត បានប្រកាសសាលក្រមផ្តន្ទាទោសអ្នកបើកបររថយន្ដក្រុងពីទីក្រុងហូជីមិញមក រាជធានីភ្នំពេញ ដែលបានបង្កគ្រោះថ្នាក់ចរាចរណ៍ជាជនជាតិវៀតណាមឈ្មោះ Le vanghing ជាប់ពន្ធនាគារ ៥ឆ្នាំ និង ពិន័យថវិកាចំនួន ១២លានរៀល ទៅជនរងគ្រោះពាក់ព័ន្ធនឹងករណីគ្រោះថ្នាក់ចរាចរណ៍ដែលបណ្តាលឲ្យ កម្មករកម្មការិនីរោងចក្រជាង ៣០នាក់ស្លាប់និងរបួសធ្ងន់ស្រាល ដ៏សោកសង្វេគរវាងរថយន្តក្រុងរបស់ ក្រុមហ៊ុនឯកជនជាមួយនឹង រថយន្តទួលរីស ១៥កៅអីដែលដឹកកម្មករកម្មការិនីរោងចក្រនេះ បានកើតឡើងប្រហែលជាម៉ោង ៧ព្រឹក ថ្ងៃទី១៩ ខែឧសភា តាមបណ្តោយផ្លូវជាតិលេខ១ ស្ថិតក្នុងឃុំកណ្តៀងរាយ ស្រុកស្វាយទៀប ខេត្តស្វាយរៀង។
ទាក់ទិននឹងនីតិវិធីរបស់តុលាការ មន្ត្រីសម្របសម្រួលអង្គការការពារសិទ្ធិមនុស្សលីកាដូប្រចាំ ខេត្តស្វាយរៀង លោក នុត បូពណ្ណារ័ត្ន បានចាត់ទុកថា តុលាការបានអនុវត្តន៍ត្រឹមត្រូវ តាមនីតិវិធី ដោយសារតុលាការបង្គាប់ឲ្យជនបង្កនៅក្នុងពន្ធនាគារ ហើយតុលាការបានបង្គាប់ម្ចាស់ក្រុមហ៊ុនរថយន្ត ក្រុងចូលខ្លួនមកដោះស្រាយសំណងដល់ភាគីរងគ្រោះ។
យ៉ាងណាមន្ត្រីសង្គមស៊ីវិលដែលតាមដានករណីនេះ មិនអត្ថាធិប្បាយនឹងការផ្តល់សំណង របស់ម្ចាស់ក្រុមហ៊ុន និងការបដិសេធសំណងរបស់ក្រុមគ្រួសារភាគីរងគ្រោះនោះទេ។
គួររម្លឹកថា កាលពីព្រឹកថ្ងៃទី១៩ ឧសភា លោក Le vanghing អាយុ ៤៣ ឆ្នាំបានបើកបររថយន្ដក្រុងពីទីក្រុងហូជីមិញមករាជធានីភ្នំពេញ នៅពេលមានគ្រោះថ្នាក់ បន្ទាប់ពីលោកបានព្យាយាមបើកវ៉ារថយន្តមួយគ្រឿងក្នុងល្បឿនលឿន ហើយជ្រុលទៅបុករថយន្តដឹកកម្មកររោងចក្រ។ ចំណោមកម្មកទាំងអស់ចំនួន ៣៨នាក់ យ៉ាងហោចណាស់កម្មករ១៦នាក់បានស្លាប់ភ្លាមៗ និងជាង ២០នាក់ផ្សេងទៀតរងរបួសធ្ងន់ស្រាលនៅក្នុងគ្រោះថ្នាក់ចរាចរណ៍ដ៏រន្ធត់ មួយដែលមិនដែលធ្លាប់មាន៕
Tag:
គ្រោះចរាចរណ៍នៅបាវិត
© រក្សាសិទ្ធិដោយ thmeythmey.com
