ជាតិ
នយោបាយជាតិ
×![]()
ដោយ: រួបរួម
លោកនាយករដ្ឋមន្ត្រី ហ៊ុន សែន បង្ហាញឲ្យឃើញថា លោកមានសកម្មភាពខ្លាំងនៅលើបណ្តាញសង្គមហ្វេសប៊ុក (Samdech Hun Sen, Cambodian Prime Minister)។ លោកប្រើប្រាស់ហ្វេសប៊ុកដើម្បីធ្វើការផ្សាយផ្ទាល់ស្តីពីសកម្មភាព ការជូនដំណឹង និងកម្រងអនុស្សាវរីយ៍ផ្សេងៗ ហើយរយៈពេលចុងក្រោយនេះ លោកថែមទាំងចូលសរសេរឆ្លើយតបសារ (Comment) ថែមទៀតផង។
ហ្វេសប៊ុក Samdech Hun Sen, Cambodian Prime Minister ដែលមានអ្នកចុច Like ជាង១លាន៣សែននាក់នោះ កំពុងក្លាយជាប្រភពព័ត៌មានដ៏សំខាន់ទាក់ទងនឹងលោកនាយករដ្ឋមន្ត្រី ហ៊ុន សែន ដោយពលរដ្ឋ ជាពិសេសអ្នកសារព័ត៌មានមិនចាំរង់ចាំមើលការផ្សាយតាមកញ្ចក់ទូរទស្សន៍ដូចមុនទៀតនោះឡើយ។
គេអាចដឹងបានថា លោកនាយករដ្ឋមន្ត្រី ហ៊ុន សែន មានក្រុមការងារមួយដើម្បីធ្វើការងារនៅលើហ្វេសប៊ុកផ្លូវការរបស់ខ្លួន ពីព្រោះពេលខ្លះ ខ្លឹមសារនៃសំណេរ សំដៅទៅបុរសទី៣ «សម្តេចនាយករដ្ឋមន្ត្រី ហ៊ុន សែន» រីឯសំណេររបស់គាត់ផ្ទាល់ប្រើពាក្យ «ខ្ញុំ» ។
អ្វីដែលគួរឲ្យកត់សម្គាល់នោះ លោកក៏បានឆ្លៀតពេលឆ្លើយតប Comment មួយចំនួនផងដែរ។ ជាក់ស្តែងមានអ្នកលេងហ្វេសប៊ុកម្នាក់បានសរសេរថា៖ «លោកពុកចូលសម្រាន្តចុះ កូនយល់ហើយ ថែរសុខភាពពុក»។ ប៉ុន្មាននាទីក្រោយមក លោកបានឆ្លើយតបវិញថា៖ «សុំអរគុណកូន»។
ក្រៅពីការឆ្លើយតបនឹងការសរសើរនានា លោក ហ៊ុន សែន ក៏បាន Comment លើការរិះគន់ផងដែរ។ ទាក់ទងនឹងការដាច់ភ្លើងកាលពីរាត្រីថ្ងៃទី២៦ ខែវិច្ឆិកា អ្នកលេងហ្វេសប៊ុកមួយរូបបានសរសេរបែបចំអកថា៖ «សំណាងហើយពូដែលនាយករដ្ឋមន្ត្រីរុស្ស៊ីទៅវិញបាត់ កុំអីខ្មាសភ្ញៀវស្លាប់ហើយ»។ ជាការឆ្លើយតបលោក ហ៊ុន សែន បានសរសេរថា៖ «រុស្ស៊ីធ្លាប់ផ្ទុះរោងចក្រអគ្គីសនីដើរដោយបរិមាណូ។
មេដឹកនាំរុស្ស៊ីមិនសើចទេព្រោះគេធ្លាប់ជួបរឿងបែបនេះ។អាមេរិកកាណាដា ជប៉ុនក៏ធ្លាប់មានរឿងធ្ងន់ធ្ងរលើសនេះច្រើន» ៕
Tag:
ហ៊ុន សែន
© រក្សាសិទ្ធិដោយ thmeythmey.com
