ជាតិ
កម្មករជាង៥០នាក់ត្រូវបានដោះលែងវិញ ខណៈកម្មករ៤នាក់កំពុងឃាត់ខ្លួន
× ប្រធានសហព័ន្ធសហជីពចលនាកម្មករ លោក ប៉ាវ ស៊ីណា បានបញ្ជាក់ថា កម្មករជាង៥០នាក់ដែលត្រូវបានចាប់ខ្លួនកាលពីម្សិលមិញ ត្រូវបានសមត្ថកិច្ចដោះលែងវិញហើយ។ តែលោកថា នៅសល់កម្មករចំនួន៤នាក់ ដែលត្រូវបានសមត្ថកិច្ចចាប់ខ្លួនកាលពីថ្ងៃទី១៨ ធ្នូកន្លងមក មិនទាន់បានដោះលែងវិញនោះទេ ដោយសមត្ថកិច្ចចោទ ពួកគេថា គប់បំផ្លាញទ្រព្យសម្បត្តិរោងចក្រ និងញុះញង់ឲ្យប្រព្រឹត្តិបទល្មើស។
លោក ប៉ាវ ស៊ីណា ទទួលស្គាល់ថា ការតវ៉ាប៉ុន្មានថ្ងៃមកនេះ មានកម្មករមួយចំនួនពិតជាបានប្រើដុំថ្មគប់រោងចក្រមែន តែមិនបណ្តាលឲ្យប៉ះពាល់ធ្ងន់ធ្ងរដល់រោងចក្រនោះទេ។ ស្របពេលនេះដែរ លោក ក៏បានស្នើដល់កម្មករទាំងនោះ ឲ្យតវ៉ាទាមទារដោយសន្តិវិធី និងចៀសវាងដាច់ខាតការប្រើអំពើហិង្សា។បើតាមលោក ប៉ាវ ស៊ីណា សកម្មភាពតវ៉ារបស់កម្មករនៅថ្ងៃនេះ នៅតែបន្តទាមទារដដែល ដោយចំនួននៃការទាមទារនេះមានការកើនឡើងច្រើនជាងកាលពីម្សិលមិញ។
សមាគមរោងចក្រកាត់ដេរនៅកម្ពុជា (GMAC) បានចេញលិខិតថ្កោលទោសចំពោះកម្មករ ដែលបានទាមទារដំឡើងប្រាក់ឈ្នួល កាលពីថ្ងៃទី១៦ ដល់ថ្ងៃទី២១ ខែធ្នូនេះ។ សមាគមរោងចក្រកាត់ដេរនៅកម្ពុជា បានហៅក្រុមកម្មករ ដែលបានប្រើអំពើហិង្សា ដោយការវាយបំផ្លាញរោងចក្រ និងញុះញង់ដល់កម្មករដទៃទៀត ថាជាក្រុមជ្រុលនិយម។ ទង្វើបែបនេះ គឺជាការគំរាមកំហែងផ្នែកសន្តិសុខ ដល់កម្មករនិយោជិតប្រមាណជាង៣ម៉ឺននាក់ផ្សេងទៀត ដែលកំពុងបំពេញការងារ ក្នុងតំបន់សេដ្ឋកិច្ចពិសេសមេហាតធេន និងតាយសេង នៅក្នុងក្រុងបាវិត ខេត្តស្វាយរៀង។
តែយ៉ាងណាលោក ប៉ាវ ស៊ីណា យល់ថា ការថ្កោលទោសរបស់សមាគមរោងចក្រកាត់ដេរនៅកម្ពុជា (GMAC) គឺជាបំភាន់ភ្នែកអន្តរជាតិ ដើម្បីទម្លាក់កំហុសទៅលើកម្មករថាជាអ្នកខុស។ លោកថា លេសថ្កោលទោសនេះ គឺដោយសារតែ GMAC មិនចង់ដោះស្រាយតាមលក្ខខណ្ឌដែលកម្មករទាមទារប៉ុណ្ណោះ។ប្រធានសហព័ន្ធសហជីពចលនាកម្មកររូបនេះ ក៏ស្នើឲ្យភាគីពាក់ព័ន្ធ គប្បីចូលរួមដោះស្រាយជាមួយកម្មករ ដោយសន្ដិវិធី ដើម្បីបញ្ចប់នៅបញ្ហាកូដកម្មនេះ។
សូមបញ្ជាក់ថា កាលពីថ្ងៃទី១៧ ខែធ្នូ កម្មករ កម្មការិនី រោងចក្រកាត់ដេរប្រមាណជាង៣ម៉ឺននាក់ ក្នុងតំបន់សេដ្ឋកិច្ចពិសេស មេហាតធេន និងតាយសេង ស្ថិតក្នុងក្រុងបាវិត ខេត្តស្វាយរៀង បាននាំគ្នាតវ៉ា និងសម្តែងការមិនពេញចិត្តចំពោះប្រាក់ឈ្នួលអប្បបរមា ១៤០ ដុល្លារ ដែលក្រុមប្រឹក្សាការងារអនុម័ត កាលពីដើមខែតុលា ឆ្នាំ២០១៥ កន្លងមក៕
© រក្សាសិទ្ធិដោយ thmeythmey.com