ជាតិ
លោក ម៉ក់ ជីតូ ទទួលស្គាល់ថា សមត្ថកិច្ចខ្វះលទ្ធភាពគ្រប់គ្រងអាវុធខុសច្បាប់
× អគ្គស្នងការរងនគរបាលជាតិលោក ម៉ក់ ជីតូ អះអាងថា សមត្ថកិច្ចមិនទាន់មានលទ្ធភាពគ្រប់គ្រាន់ក្នុងការគ្រប់គ្រងអាវុធខុសច្បាប់នៅឡើយទេ។ លោកអះអាងថា សមត្ថកិច្ចនឹងរៀបចំការគ្រប់គ្រងអាវុធ តាមបែបលក្ខណៈវិទ្យា ដើម្បីស្រាវជ្រាវរកមុខ អ្នកដែលលក់ និងទិញអាវុធខុសច្បាប់ចែកចាយតៗគ្នានេះ ក្នុងការទប់ស្កាត់អំពើចោរកម្មក្នុងសង្គម។
លោក ម៉ក់ ជីតូ ទទួលស្គាល់ថា ការខ្វះលទ្ធភាពគ្រប់គ្រងអាវុធខុសច្បាប់នេះ គឺជាចន្លោះប្រហោងមួយ ដែលធ្វើឲ្យជនល្មើសអាចមានលទ្ធភាពទិញ និងប្រើប្រាស់អាវុធខុសច្បាប់ ក្នុងសកម្មភាព ឆក់ ប្លន់ របស់ពួកគេ។ លោកកត់សម្គាល់ដែរថា មន្ត្រីរាជការ និងឯកជនមួយចំនួន ក៏មានអ្នកប្រើប្រាស់អាវុធខុសច្បាប់ដែរ ដោយសារតែកង្វះខាតលទ្ធភាពគ្រប់គ្រងអាវុធខុសច្បាប់នេះ។ លោក ម៉ក់ ជីតូ បន្ថែមថា បច្ចុប្បន្នសមត្ថកិច្ចមានលទ្ធភាពអាចគ្រប់គ្រងបានតែអាវុធរបស់អង្គភាព និងអាវុធស្របច្បាប់ប៉ុណ្ណោះ។
ថ្លែងនៅក្រោយពីកិច្ចប្រជុំរួមរវាង តុលាការ អយ្យការ និងនគរបាលយុត្តិធម៌ កាលពីម្សិលមិញអគ្គស្នងការរងនគរបាលជាតិរូបនេះ បានបញ្ជាក់យ៉ាងដូច្នេះថា៖«ការគ្រប់គ្រង់អាវុធរបស់យើងមានការស្មុគស្មាញខ្លះ និយាយឲ្យត្រង់ទៅយើងគ្រប់គ្រងតែអាវុធរបស់អង្គភាព។ យើងគ្រប់តែអាវុធប្រើប្រាស់ស្របច្បាប់ ដល់អាវុធខុសច្បាប់យើងគ្រប់គ្រងអត់ទាន់បានទេ នេះហើយដែលយើងត្រូវប្រឹងប្រែង។ឥឡូវនេះបញ្ហាត្រង់ថាការគ្រប់គ្រងរបស់យើង យើងភ័យខ្លាចនៅមានការចន្លោះប្រហោង ត្រង់ថាអាវុធនេះមានអ្នកខ្លះប្រើប្រាស់ខុសច្បាប់ នេះមិនមែននិយាយតែក្រុមល្មើសចោរទេ សូម្បីមន្ត្រីរាជការខ្លះក៏ប្រើខុសច្បាប់ដែរ»។
លោក ម៉ក់ ជីតូ ក៏បានព្រមានទៅដល់អ្នកដែលទិញ និងលក់អាវុធខុសច្បាប់ថា នៅពេលខាងមុខនេះសមត្ថកិច្ចនឹងរៀបចំការគ្រប់គ្រងអាវុធ តាមបែបលក្ខណៈវិទ្យា ដើម្បីស្រាវជ្រាវរកមុខ អ្នកដែលលក់ និងទិញអាវុធខុសច្បាប់ចែកចាយតៗគ្នានេះ។ អគ្គស្នងការរងនគរបាលជាតិរូបនេះ បានប្តេជ្ញាចិត្តថា សមត្ថកិច្ចនឹងខិតខំបំពេញការងារ ដើម្បីបង្ការនិងបង្ក្រាបបទល្មើសព្រហ្មទណ្ឌ ក្នុងករណីលួច ឆក់ ប្លន់ ក្នុងគោលបំណងរក្សាសន្តិសុខ សណ្តាប់ធ្នាប់សាធារណៈដល់ប្រជាពលរដ្ឋ និងសង្គមជាតិ។
ជុំវិញបញ្ហាចោរកម្មកន្លងមក មេបញ្ជាការរងកងរាជអាវុធហត្ថលើផ្ទៃប្រទេស ទទួលបន្ទុកព័ត៌មាន សន្តិសុខ និងបង្ក្រាបបទល្មើស លោក ហុង វិណុល បានបដិសេធថា ក្រុមជនល្មើសដែលមានអាវុធខុសច្បាប់ចេញ ឆក់ ប្លន់ ទាំងនោះ គឺមិនមានអ្វីជាប់ពាក់ព័ន្ធនឹងសមត្ថកិច្ច ដូចមតិរិះគន់មួយចំនួនឡើយ។ លោកបានអះអាងថា ការប្រើប្រាស់អាវុធរបស់ជនល្មើសទាំងនោះ គឺពួកគេមានប្រភពនៃអាវុធខុសច្បាប់ ដែលបានចែករំលែកអាវុធគ្នា ឬក៏ដោះដូរគ្នា ក្នុងការចេញប្រព្រឹត្តបទល្មើស។
សូមបញ្ជាក់ថា ក្នុងឆ្នាំ២០១៥នេះ បទល្មើសលួច មាន១០៣៨ បទល្មើសឆក់មាន ៩ករណី បទល្មើសប្លន់មាន ២៥០ករណី។ បើប្រៀបធៀបនឹឆ្នាំ២០១៤ បទល្មើសទទាំងអស់នេះ បានថយចុះប្រមាណ១៤ភាគរយ៕
© រក្សាសិទ្ធិដោយ thmeythmey.com