ជាតិ
ស្លាប់ម្នាក់រងរបួសធ្ងន់ស្រាល២៣នាក់ក្នុងហេតុការណ៍រថយន្តដឹកកម្មករបុកគ្នា
×
កម្មការិនីរោងចក្រម្នាក់បានស្លាប់ភ្លាមៗ និងរងរបួសធ្ងន់ស្រាលចំនួន ២៣ នាក់ក្នុងហេតុការណ៍គ្រោះថ្នាក់ចរាចរណ៍រថយន្តដឹកកម្មករកម្មការិនីរោងចក្របុកគ្នាជាមួយឡានដឹកទឹកកក កាល់ពីវេលាម៉ោង៦ព្រឹក ថ្ងៃទី២៩ ខែធ្នូ លើកំណាត់ផ្លូវអូរឌឹមទំនប់កប់ស្រូវ ភូមិជង្រុក សង្កាត់សំរោងក្រោម ខណ្ឌពោធិ៍សែនជ័យ។ នេះបើយោងតាមគេហទំព័រអគ្គស្នងការនគរបាលជាតិ។
បើយោងតាមសាក្សីនៅកន្លែងកើតហេតុបានឱ្យដឹងថា គេឃើញរថយន្តដឹកកម្មករបើកបរក្នុងទិសដៅពីជើងទៅត្បូង ដោយដឹកកម្មករពេញរថយន្ត លុះមកដល់ចំណុចកើតហេតុ គេឃើញរថយន្តដឹកទឹកកកបើកក្នុងទិសដៅស្របគ្នាបុកពីក្រោយពេញទំហឹងបណ្តាលឲ្យកម្មការិនីម្នាក់ធ្លាក់ចំកង់រថយន្តកិនស្លាប់ភ្លាមៗ ចំណែកកម្មករកម្មការិនី ២៣នាក់ផ្សេងទៀតរងរបួសធ្ងន់ស្រាល។ ភ្លាមនោះអ្នកបើករថយន្តបង្កបានចុះពីលើឡានរត់គេចខ្លួនបាត់។
សាក្សីកបានឲ្យដឹងទៀតថា កម្មការិនីរងគ្រោះរហូតដល់ស្លាប់មានឈ្មោះ ហឹម ផល្លា អាយុ ២៣ឆ្នាំ មុខរបរកម្មការិនីរោងចក្រ រស់នៅក្នុងភូមិផ្តេញ ឃុំក្រាំងម្កាក់ ស្រុកអង្គស្នួល ខេត្តកណ្តាល។ ចំណែកអ្នករងរបួសធ្ងន់ស្រាលទាំង២៣នាក់មិនទាន់ស្គាល់អត្តសញ្ញាណនោះទេពេលនេះត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យ។
នគរបាលមួលដ្ឋានបានឲ្យដឹងថា រថយន្តបង្កម៉ាកហ៊ីយ៉ានដាយ ពណ៌ស ពាក់ស្លាកលេខ ភ្នំពេញ ៣C-៩៥៥០ ចំណែករថយន្តរងគ្រោះ ម៉ាកហ៊ីយ៉ានដាយ ពណ៌ខៀវ ពាក់ស្លាកលេខភ្នំពេញ 2AD-0024។ ក្រោយកើតហេតុរថយន្តទាំងសមត្ថកិច្ចមូលដ្ឋានប្រគល់ឲ្យនគរបាលចរាចរណ៍ជើងគោក រាជធានីភ្នំពេញ ចាត់ការទៅតាមផ្លូវច្បាប់ ចំណែកឯសាកសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
© រក្សាសិទ្ធិដោយ thmeythmey.com