ជាតិ
សង្គមជាតិ
មនុស្សស្លាប់ ៨នាក់ និងរបួសធ្ងន់ ២៥នាក់ក្នុងករណីគ្រោះថ្នាក់ចរាចរណ៍ នៅបាត់ដំបង
× មនុស្សស្លាប់ចំនួន ៨នាក់ និងរបួសធ្ងន់ ២៥របួសធ្ងន់ ក្នុងគ្រោះថ្នាក់ចរាចរណ៍រវាងរថយន្តក្រុង ដឹកអ្នកដំណើរបុករថយន្តស្ទូច នៅរសៀលថ្ងៃទី២៣ ខែមេសា ឆ្នាំ២០១៦ នៅខេត្តបាត់ដំបង។ នេះបើតាមការបញ្ជាក់ព័ត៌មានបឋមពីលោក ស ថេត ស្នងការនគរបាលខេត្តបាត់ដំបង។
លោក ស ថេត បានប្រាប់ព័ត៌មានបឋមពីករណីគ្រោះថ្នាក់ចរាចរណ៍ដល់សារព័ត៌មានថ្មីៗ តាមទូរសព្ទថា គ្រោះថ្នាក់ចរាចរណ៍រវាងរថយន្តធុនធំបើកបរបញ្ចៀសទិសគ្នានេះ នាំឲ្យជនរងគ្រោះស្លាប់ចំនួន ៨នាក់ (ព្រះសង្ឃមួយអង្គ) និងរងរបួសធ្ងន់ចំនួន ២៥នាក់។ យ៉ាងណា លោកពុំទាន់ដឹងថា ជនរងគ្រោះទាំងអស់សរុបចំនួនប៉ុន្មាននាក់ឡើយ។ លោកប្រាប់យ៉ាងខ្លី ថា៖«នៅពេលនេះ សមត្ថកិច្ចយើងកំពុងទាញជនរងគ្រោះចេញពីរថយន្ត និងបញ្ជូនទៅសង្គ្រោះ នៅមន្ទីរពេទ្យបង្អែកខេត្ត»។
បើតាមលោកស្នងការ ករណីគ្រោះថ្នាក់ចរាចរណ៍ដ៏រន្ធត់នេះ បានកើតឡើង តាមបណ្តោយផ្លូវជាតិលេខ៥ ភូមិព្រៃដំរី ឃុំព្រៃតូច ស្រុកមោងឫស្សី ខេត្តបាត់ដំបង។ ក្រោយពីពិនិត្យកន្លែងគ្រោះថ្នាក់រួច លោកស្នងការសន្និដ្ឋានបឋមថា រថយន្តក្រុងជាអ្នកបង្កគ្រោះថ្នាក់នេះ ពីព្រោះ រថយន្តក្រុងបានបើកបរបំពានចូលលើគន្លងផ្លូវចរាចរម្ខាងទៀត៕
© រក្សាសិទ្ធិដោយ thmeythmey.com