សម្ដេច ហ៊ុន សែន បញ្ជាឲ្យអាជ្ញាធរជីកស្រះ និងអណ្ដូងទឹកថ្មី បន្ថែមទៀត សម្រាប់ឆ្នាំក្រោយ

ជាតិ

សម្ដេច ហ៊ុន សែន បញ្ជាឲ្យអាជ្ញាធរជីកស្រះ និងអណ្ដូងទឹកថ្មី បន្ថែមទៀត សម្រាប់ឆ្នាំក្រោយ

03, May 2016 , 10:59 pm

រូបភាព

ដោយ: ថ្មីៗ

សម្ដេចនាយករដ្ឋមន្ដ្រី ហ៊ុន សែន បានបញ្ជាឲ្យអាជ្ញាធរជីកស្រះថ្មី ស្ដារស្រះចាស់ ជីកអណ្ដូងថ្មី និងស្ដារអណ្ដូងចាស់ឡើងវិញ ដើម្បីត្រៀមទុកសម្រាប់ឆ្នាំក្រោយៗទៀត។ ប្រមុខរដ្ឋាភិបាល ចាត់ទុកថា ឆ្នាំនេះជាគ្រោះមហន្តរាយ ដែលផ្ដល់មេរៀនដល់រដ្ឋាភិបាល សម្រាប់ការត្រៀមខ្លួនទប់ស្កាត់បញ្ហានេះនៅឆ្នាំក្រោយទៀត ដែលអាចកើតឡើងដោយសារការប្រែប្រួលអាកាសធាតុ។

ថ្លែងក្នុងពិធី«ផ្សព្វផ្សាយគោលនយោបាយជាតិប្រជាជន ២០១៦-២០៣០» សម្តេច ហ៊ុន សែន នូវតែបញ្ជាឲ្យមន្ត្រីគណបក្សប្រជាជន ចៅហ្វាយខេត្ត និងអាជ្ញាធរគ្រប់លំដាប់ថ្នាក់ បន្តយុទ្ធនាការទ្រង់ទ្រាយធំ ដើម្បីចែកចាយទឹកសម្រាប់ប្រជាពលរដ្ឋប្រើប្រាស់ រហូតប្រជាពលរដ្ឋអាចធូរស្រាលពីការខ្វះទឹកនេះ។

នាយករដ្ឋមន្ត្រី ហ៊ុន សែន បានឲ្យដឹងកន្លងមកថា ដោយសារតែបញ្ហាខ្វះខាតទឹកនេះ បានបណ្ដាឲ្យសត្វគោ ក្របី របស់ប្រជាពលរដ្ឋនៅខេត្តស្ទឹងត្រែង ងាប់ជាង៣០០ក្បាលហើយ ដោយក្នុងនោះសត្វក្របីងាប់ជាង២០០ក្បាល និងសត្វគោ៦៥ក្បាល។ ប្រមុខរដ្ឋាភិបាល អះអាងថា បើទោះជាមិនសត្វពាហនៈងាប់ក៏ដោយ តែលោកនឹងមិនឲ្យប្រជាពលរដ្ឋណាម្នាក់ស្លាប់ដោយសារខ្វះទឹកឡើយ ៕