ជាតិ
សង្គមជាតិ
ក្រុមក្មេងទំនើងសុទ្ធតែមានរហស្សនាម ណាត់កាប់គ្នា, សមត្ថកិច្ចត្រូវការកិច្ចសហការដើម្បីទប់ស្កាត់ ក្មេងទំនើងដែលសមត្ថកិច្ច ឃាត់ខ្លួនបាន។ រូបពី ស្នងការដ្ឋាននគរបាលរាជធានីភ្នំពេញ
× ភ្នំពេញ៖ លោកគ្រូអ្នកគ្រូនៅតាមសាលារៀន ឪពុកម្តាយ អាណាព្យាបាល និងសាធារណជន សុទ្ធតែជាចំណែកដ៏សំខាន់ក្នុងការទប់ស្កាត់ចលនាក្មេងទំនើង។ នេះជាការលើកឡើងរបស់លោក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ខណៈរយៈពេលចុងក្រោយនេះ សមត្ថកិច្ចទើបបានបង្ក្រាបក្មេងទំនើងពីរក្រុមដែលបានណាត់គ្នាកាប់នៅផ្លូវ៦០ម៉ែត្រ។
ក្នុងសន្និសីទសារព័ត៌មានកាលពីថ្ងៃទី១៤ ខែមីនា សមត្ថកិច្ចនគរបាលរាជធានីភ្នំពេញ បង្ហាញមុខជនសង្ស័យ១២នាក់ ពាក់ព័ន្ធករណីហិង្សាដោយចេតនា និងប្រឆាំងមន្ត្រីរាជការសាធារណៈ ក្នុងភូមិសាស្រ្តរាជធានីភ្នំពេញ ដោយក្រុមក្មេងទំនើងទាំងនោះ ប្រដាប់ដោយកាំបិត ដាវ ខ្សែក្រវាត់ជាដើម។
លោក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានអះអាងថា ក្រុមក្មេងទំនើងពីរក្រុម គឺក្រុមដែលមានឈ្មោះថា ផ្សារកណ្ដាល បានណាត់កាប់គ្នានៅផ្លូវ៦០ម៉ែត្រ ជាមួយក្មេងទំនើងមួយក្រុមទៀត ឈ្មោះមាន់ទឹក MT។
ក្មេងទំនើងទាំងនោះ បានប្រមូលម្ដុំគ្នានៅម្ដុំរង្វង់មូលវិមានឯករាជ្យ អំឡុងម៉ោងប្រមាណ៣ទៀបភ្លឺ នាថ្ងៃទី១៣មីនា ហើយសមត្ថកិច្ចក៏ហៅសួរនាំ ប៉ុន្តែ ក្មេងខ្លះបានព្យាយាមបើកម៉ូតូរត់គេច និងបើកម៉ូតូបុកសមត្ថកិច្ច រហូតដល់រងរបួស។
អ្នកនាំពាក្យស្នងការដ្ឋាននគរបាលរាជធានីភ្នំពេញសង្កត់ធ្ងន់ យ៉ាងដូច្នេះ៖ «សកម្មភាពដែលក្មេងទំនើងផ្សារកណ្ដាលធ្វើនេះ ដូចជាកាចសាហាវ យើងនឹងអនុវត្តតាមនីតិវិធីច្បាប់ដោយមិនលើកលែងទេ!»។
ក្រុមក្មេងទាំងនេះ ត្រូវបានចោទប្រកាន់ពីបទកាន់កាប់អាវុធខុសច្បាប់ បង្កហិង្សាដោយចតនា និងប្រឆាំងនឹងរាជការ។ នេះបើតាមលោក វិច្ឆិកា ដោយលោកបានបន្ថែមថា នៅប៉ុន្មានថ្ងៃចុងក្រោយនេះ សកម្មភាពក្មេងទំនើងហាក់កក្រើកឡើង ទើបសមត្ថកិច្ចបន្ថែមកម្លាំងការពារសណ្ដាប់ធ្នាប់។
ស្របពេលជាមួយគ្នា មានការបង្ហោះវីដេអូនៅលើបណ្តាញសង្គមអំពីការជួបជុំគ្នារបស់ក្រុមក្មេងទំនើងនៅទីសាធារណៈ ហើយករណីនេះ ត្រូវបានអ្នកនាំពាក្យស្នងការនគរបាលរាជធានីភ្នំពេញ អះអាងថា វីដេអូខ្លះ ជាករណីចាស់ៗប៉ុណ្ណោះ។
យ៉ាងណាក៏ដោយ លោក ស្នើឱ្យគ្រូៗតាមសាលារៀន ឪពុកម្ដាយរបស់ក្មេងៗ និងសាធារណាជនទាំងអស់រួមអប់រំក្មេងៗ និងសហការជាមួយសមត្ថកិច្ច ដើម្បីទប់ស្កាត់ក្មេងទំនើង ដោយរាយការណ៍ពីសកម្មភាពសង្ស័យណាមួយទៅសមត្ថកិច្ច៕
© រក្សាសិទ្ធិដោយ thmeythmey.com