ជាតិ
លោកស្រី ប៊ូ រចនា៖ អូនចងចាំសកម្មភាពគ្រួសារយើង តែពលរដ្ឋខ្មែរចងចាំការលះបង់របស់បង
× ទោះជាពេលវេលាកន្លងទៅអស់ពីរឆ្នាំហើយក៏ដោយ តែលោកស្រី ប៊ូ រចនា នៅតែមិនទាន់អាចរំសាយចិត្តបាន ចំពោះឃាតកម្មដ៏ឃោរឃៅលើស្វាមីរបស់លោកស្រី គឺលោកបណ្ឌិត កែម ឡី។ ស្ថិតក្នុងឱកាសរម្លឹកខួបពីរឆ្នាំ នៃការបាញ់សម្លាប់ស្វាមី លោកស្រី ប៊ូ រចនា បានបង្ហោះសារលើបណ្តាញសង្គមហ្វេសប៊ុក ដោយរៀបរាប់ពីការឈឺចាប់របស់លោកស្រី។
តាមរយៈសារនោះ លោកស្រី ប៊ូ រចនា បានរម្លឹកពីសេចក្តីស្រឡាញ់ និងសុភមង្គល ដែលធ្លាប់កើតមានឡើងក្នុងគ្រសាររបស់លោកស្រី កាលពីលោកបណ្ឌិត កែម ឡី នៅរស់។ បន្ទាប់មក លោកស្រី ក៏បង្ហាញពីភាពសោកសង្រេងរបស់លោកស្រី និងកូនៗ ក្រោយបាត់បង់ស្វាមីពីគ្រួសារ។
លោក ស្រី ប៊ូ រចនា ដែលកំពុងរស់នៅជាមួយកូនប្រុសទាំង៥នាក់ ក្នុងប្រទេសអូស្ត្រាលី បានសរសេរសារយ៉ាងដូច្នេះថា៖«អូនចងចាំសកម្មភាពគ្រួសាររបស់ពួកយើង តែពលរដ្ឋខ្មែរចងចាំការលះបង់របស់បង។ ជាប្រពន្ធ និងជាកូនៗរបស់បង ពួកយើងរំភើប ពីព្រោះថារូបបងមិនត្រឹមតែស្ថិតក្នុងចិត្តរបស់អូននិងកូនៗទេ បងស្ថិតនៅក្នុងការចងចាំរបស់ពលរដ្ឋខ្មែរ»។
លោកស្រី ប៊ូ រចនា និងកូនប្រុសទាំង៥នាក់ ពេលទៅដល់ប្រទេសអូស្ត្រាលី កាលពីអំឡុងខែកុម្ភៈ ឆ្នាំ២0១៨។ រូបថតពីហ្វេសប៊ុក Chun Chanboth
ពាក់ព័ន្ធនឹងឃាតក ដែលត្រូវបានផ្តន្ទាទោស លោកស្រី ប៊ូ រចនា នៅតែយល់ថា មិនមែនជាឃាតកពិតនោះទេ។ លោកស្រី លើកឡើងបែបនេះថា៖«យុត្តិធម៌ ហាក់នៅឆ្ងាយសែនឆ្ងាយ។ […..] តែនាងខ្ញុំ ជឿជាក់ថា នឹងមានថ្ងៃមួយមកដល់ ដែលឃាតកពិត នឹងសងនូវរាល់អ្វីៗដែលគេបានធ្វើ»។
គណបក្សនយោបាយ និងសង្គមស៊ីវិលខ្លះ រួមទាំងប្រជាពលរដ្ឋ ដែលស្រឡាញ់លោកបណ្ឌិត កែម ឡី បាននាំគ្នាចូលរួមរម្លឹកខួបពីរឆ្នាំនេះ។ អ្នកប្រើប្រាស់បណ្តាញសង្គមហ្វេសប៊ុកមួយចំនួន បានប្តូររូបខ្លួនឯង (profile) ហើយដាក់រូបលោក កែម ឡី ជំនួសវិញ។
ម្យ៉ាងទៀត ក៏មានអ្នកនិពន្ធខ្លះ បានតែងចម្រៀងបួន-ប្រាំបទ អំពីលោកបណ្ឌិត កែម ឡី ផងដែរ។ លើសពីនេះ បណ្តាញសារព័ត៌មាននានានៅកម្ពុជា បានប្រមូលទ្រឹស្តី និងពាក្យពេចន៍របស់លោក ដែលធ្លាប់មានប្រសាសន៍កាលពីនៅរស់ មកផ្សាយឡើងវិញ ដោយអមជាមួយនឹងសកម្មភាពរបស់លោក ក្នុងការជួយសង្គម។
គួររម្លឹកថា លោកបណ្ឌិត កែម ឡី ដែលជាអ្នកស្រាវជ្រាវផ្នែកការអភិវឌ្ឍសង្គម និងជាអ្នកវិភាគនយោបាយដ៏មានប្រជាប្រិយភាព ត្រូវបានបាញ់សម្លាប់ ក្នុងស្តាម៉ាតមួយកន្លែង ជាប់ស្តុបបូកគោ កាលពីថ្ងៃទី១០ ខែកក្កដា ឆ្នាំ២០១៦។ ក្រោយព្រឹត្តិការណ៍នេះកើតឡើង បុរសម្នាក់ ឈ្មោះអឿត អាង ហៅ ជួប សម្លាប់ ត្រូវបានចាប់ខ្លួន។ តុលាការភ្នំពេញ បានផ្តន្ទាទោស ជួប សម្លាប់ ឲ្យជាប់ពន្ធនាគារអស់មួយជីវិត ក្រោមការចោទប្រកាន់ពីបទឃាតកម្មលើលោកបណ្ឌិត កែម ឡី៕
Tag:
កែម ឡី
ប៊ូ រចនា
ខួបពីរឆ្នាំ
© រក្សាសិទ្ធិដោយ thmeythmey.com