ជាតិ
ព័ត៍មានសុខភាព
សុខភាព
ម៉ាក់ប៉ា មើលៗផងកូនខ្វះជាតិដែក អាចបណ្ដាលឲ្យស្លេកស្លាំងមិនល្អដល់សុខភាព
15, Apr 2024 , 6:59 am
×![]()
ដោយ: សារព័ត៌មានថ្មីៗ
ម៉ាក់ប៉ា មើលៗផងកូនខ្វះជាតិដែក អាកង្វះជាតិដែក អាចធ្វើឲ្យកុមារប្រឈមនឹងបញ្ហាលូតលាស់របស់រាងកាយ និងបញ្ញាស្មារតី ហើយអាចធ្វើឲ្យកុមារមានជំងឺស្លេកស្លាំងទៀតផង។ ជំងឺស្លេកស្លាំងដោយសារខ្វះជាតិដែក ជាបញ្ហាមួយដែលឧស្សាហ៍ជួបប្រទះលើកុមារ ដោយសារតែពួកគេមិនបានទទួលជាតិដែកគ្រប់គ្រាន់ពីរបបអាហារ។
តើជាតិដែកមានសារសំខាន់បែបណាចំពោះកុមារ?
ជាតិដែកជួយដឹកនាំអុកស៊ីសែនពីសួតទៅកាន់សរីរាង្គផ្សេងទៀតនៃរាងកាយ និងជួយសាច់ដុំរក្សាទុក និងប្រើប្រាស់អុកស៊ីសែនផងដែរ។ បើសិនជាកុមារមានរបបអាហារមិនមានជាតិដែកគ្រប់គ្រាន់ នោះពួកគេនឹងអាចវិវត្តទៅជាមានបញ្ហាខ្វះជាតិដែក។
បញ្ហាខ្វះជាតិដែកលើកុមារ គឺជាបញ្ហាទូទៅមួយដែលឧស្សាហ៍កើតមានលើកុមារ។ បញ្ហាខ្វះជាតិដែកអាចមានកម្រិតផ្សេងៗគ្នាដោយចាប់តាំងពីកម្រិតស្រាល ដល់កម្រិតខ្វះជាតិដែកបណ្ដាលឲ្យមានជំងឺស្លេកស្លាំង។ ជំងឺស្លេកស្លាំងដោយខ្វះជាតិដែក គឺជាបញ្ហាសុខភាពមួយដែលឈាមមិនមានកោសិកាឈាមក្រហមគ្រប់គ្រាន់។ ការមិនយកចិត្តទុកដាក់ព្យាបាលបញ្ហាខ្វះជាតិដែកលើកុមារ នឹងធ្វើឲ្យកុមារប្រឈមនឹងបញ្ហាលូតលាស់ផ្នែករាងកាយ និងបញ្ញាស្មារតី។
កុមារប្រភេទណាងាយប្រឈមបញ្ហាខ្វះជាតិដែក?
ទារក និងកុមារដែលមានហានិភ័យខ្ពង់នឹងបញ្ហាខ្វះជាតិដែករួមមាន៖
• ទារកកើតមិនគ្រប់ខែ ឬមានទម្ងន់មិនត្រូវស្តង់ដារ
• ក្មេងដែលផឹកទឹកដោះគោ ឬទឹកដោះពពែមុនអាយុ១ឆ្នាំ
• ទារកបំបៅដោះដែលមិនបានទទួលអាហារបន្ថែមក្រៅក្រោយអាយុ ៦ខែ
• ទារកដែលបៅទឹកដោះគោម្សៅមិនមានបន្ថែមជាតិដែក
• កុមារមានបញ្ហាសុខភាពរ៉ាំរ៉ៃ ដូចជាការឆ្លងមេរោគរ៉ាំរ៉ៃ
• កុមារដែលមិនព្រមញ៉ាំអាហារមានជាតិដែក
• កុមារធាត់លើសទម្ងន់
ដូចគ្នាដែរ ក្មេងស្រីវ័យជំទង់ ក៏ប្រឈមនឹងបញ្ហាខ្វះជាតិដែកដែរ ដោយសាររាងកាយបាត់បង់ឈាមច្រើននៅពេលមករដូវម្ដងៗ។ ជាទូទៅរោគសញ្ញាខ្វះជាតិដែកមានដូចជាស្លេកស្លាំង អស់កម្លាំង ហត់ ខ្សោយ មានបញ្ហាអាកប្បកិរិយា និងងាយឆ្លងមេរោគជាដើម។ បើសិនជាកូនមានចេញរោគសញ្ញាគួរឲ្យសង្ស័យទាំងនេះ ប៉ាម៉ាក់គួរនាំកូនទៅជួបជាមួយគ្រូពេទ្យ។
តិចនិកការពារកូនពីបញ្ហាខ្វះជាតិដែក
ក្មេងដែលបៅទឹកដោះគោម្សៅមានបន្ថែមជាតិដែកទំនងជាមិនប្រឈមនឹងបញ្ហាខ្វះជាតិដែកនោះទេ។ ប៉ុន្តែបើកូនបៅទឹកដោះម្ដាយ គឺអាចប្រឈមនឹងបញ្ហានេះដែរ ដែលជាហេតុម៉ាក់ៗគួរប្រឹក្សាជាមួយគ្រូពេទ្យ ដើម្បីដឹងច្បាស់ថាខ្លួន ឬកូនគួរត្រូវញ៉ាំថ្នាំជាតិដែកបន្ថែមឬយ៉ាងណា។
ក្រៅពីនេះម៉ាក់ប៉ាអាចអនុវត្តវិធីសាស្ត្រមួយចំនួនទៀតដើម្បីការពារកូនពីបញ្ហាខ្វះជាតិដែក៖
បន្ថែមអាហារសម្បូរជាតិដែក៖ នៅពេលកូនចូលដល់វ័យញ៉ាំអាហាររឹងបាន(អាយុលើសពី៦ខែ) ប៉ាម៉ាក់គួរផ្ដល់ឲ្យកូននូវបបរខាប់គ្រប់គ្រឿង ហើយពេលកូនកាន់តែធំ និងចេះញ៉ាំអាហារកាន់តែច្រើនគួរបញ្ចូលសាច់ជ្រូក សាច់គោ ត្រី សណ្ដែក និងស្ពៃ ឬបន្លែបៃតងផ្សេងទៀត។
កុំឲ្យកូនញ៉ាំទឹកដោះគោច្រើនពេក៖ កូននៅអាយុចន្លោះពី ១-៥ឆ្នាំ មិនត្រូវឲ្យញ៉ាំទឹកដោះគោលើសពី ៧១០មិល្លីលីត្រក្នុងមួយថ្ងៃនោះទេ។
បន្ថែមអាហារសម្បូរវីតាមីន C៖ វីតាមីន C ជួយជំរុញដល់ការបឺតស្រូបជាតិដែក។ ប៉ាម៉ាក់អាចផ្ដល់អាហារមានវីតាមីន C ឲ្យកូនញ៉ាំ ដើម្បីឲ្យរាងកាយកូនអាចស្រូបជាតិដែកបានកាន់តែល្អ។ អាហារសម្បូរវីតាមីន C មានដូចជាពពួកផ្លែក្រូច ដំឡូងបារាំង ម្ទេសប្លោក និងបន្លែស្លឹកបៃតងជាដើម ៕
ត្រួតពិនិត្យដោយ៖ www.health.com.kh
© រក្សាសិទ្ធិដោយ thmeythmey.com
