ជាតិ
បទវិភាគ
ខ្ញុំជាយុវជន! តើខ្ញុំអាចធ្វើអ្វីបានខ្លះសម្រាប់ប្រទេសជាតិខ្ញុំ?
× សង្គមមួយរីកចម្រើនខ្លាំង ជាសង្គមដែលមានធនធានមនុស្សខ្លាំង ពោលគឺជាធនធានមនុស្សដែលមានការអប់រំខ្ពស់ មានការគិតស៊ីជម្រៅ មានគំនិតច្នៃប្រឌិតខ្ពស់ និងមានភាពជាពលរដ្ឋល្អ ។ល។ ផ្ទុយទៅវិញ ពលរដ្ឋដែលមានផ្នត់គំនិតពឹងផ្អែកតែសង្គមឬរស់ដោយសារតែសង្គមផ្តល់ឲ្យ គឺពួកគេតែងតែចោទសួរថា តើសង្គមអាចជួយឬផ្តល់អ្វីខ្លះដល់ខ្ញុំ(ពលរដ្ឋ)?នៅក្នុងសង្គមដែលមានធនធានមនុស្សបែបនេះ ពិតជាមិនអាចអភិវឌ្ឍន៍ប្រទេសឲ្យរីកចម្រើនបានឡើយ។
មុននឹងអភិវឌ្ឍន៍សង្គមជាតិមួយឲ្យមានអ្វីៗគ្រប់យ៉ាង គឺមេដឹកនាំគ្រប់ជាន់ថ្នាក់ ឪពុកម្តាយ អាណាព្យាបាល និងលោកគ្រូអ្នកគ្រូគ្រប់រូបត្រូវបណ្តុះផ្នត់គំនិតដល់ពលរដ្ឋ យុវជននិងសិស្សនិស្សិតទាំងអស់ឲ្យមានគតិបណ្ឌិតក្នុងខ្លួន និងមានមនសិការស្នេហាសង្គមជាតិ ជាមុនសិន។នៅពេលនោះពួកគេប្រាកដជាសួរខ្លួនឯងវិញថា ខ្ញុំជាពលរដ្ឋម្នាក់! ខ្ញុំជាយុវជនម្នាក់! តើខ្ញុំអាចធ្វើអ្វីបានខ្លះសម្រាប់ប្រទេសជាតិខ្ញុំ? អ្វីដែលពួកគេអាចធ្វើបានជារួមមាន៖
១/ ការអភិវឌ្ឍខ្លួន គឺជាជំហានដំបូង មុននឹងឈានទៅចូលរួមជួយអភិវឌ្ឍន៍សង្គមជាតិ។ដូច្នេះអ្នកត្រូវស្គាល់ខ្លួនឯងឲ្យបានច្បាស់ ពោលគឺ ស្គាល់ពីចំណង់ចំណូលចិត្ត ទេពកោសល្យ ចំណុចខ្លាំង-ខ្សោយខ្លួនឯងហើយចាប់ផ្តើមកំណត់គោលដៅជីវិតឲ្យបានច្បាស់។ នៅពេលអ្នកស្គាល់ខ្លួនឯងច្បាស់ គឺអ្នកអាចជួយអភិវឌ្ឍន៍សង្គមជាតិទៅតាមគោលដៅជីវិតរបស់អ្នកបានយ៉ាងងាយស្រួសពេលនោះគោលដៅនៅក្នុងជីវិតរបស់អ្នកក៏ទទួលបានជោគជ័យ ហើយកិច្ចការជួយអភិវឌ្ឍន៍សង្គមក៏អ្នកបានធ្វើ។
២/ បង្កើនចំណេះដឹងខ្លួនឯង គឺខំរៀនឲ្យពួកែដោយត្រូវស្វែងរកចំណេះដឹងបន្ថែមក្រៅពីរៀននៅសាលា ដូចជា៖អានសៀវភៅ ស្តាប់កម្មវិធីវិទ្យុ មើលកម្មវិធីទូរទស្សន៍ រៀនពីបុគ្គលឆ្នើម បុគ្គលជោគជ័យចូលរួមក្នុងវិទិកាសាធារណៈ និងសិក្ខាសាលានានា ដែលទាក់ទិននឹងការអប់រំការអភិវឌ្ឍខ្លួនឯង និងបញ្ហាសង្គមជាតិនានា។
៣/ ភាពជាពលរដ្ឋ គឺគោរពតាមច្បាប់ដែលរដ្ឋបានកំណត់មានសីលធម៌ល្អ មានគោលការណ៍សុចរិតភាព ចូលរួមដោះស្រាយបញ្ហាសង្គមជាតិ មិនប្រព្រឹត្តិអំពើពុករលួយមិនរំលោភទ្រព្យសម្បត្តិនិងសិទ្ធិអ្នកដទៃ មិនបង្កហិង្សាលើអ្នកដទៃ មិនគាំទ្រសកម្មភាពដែលបំផ្លាញជាតិ និងមិនធ្វើសកម្មភាព ឬទង្វើណាដែលប៉ះពាល់ដល់សង្គមឡើយ។
៤/ បណ្តុះផ្នត់គំនិតស្រឡាញ់ជាតិ គឺតាមដានព្រឹត្តិការណ៍សង្គម ស្ថានការណ៍នៃការវិវត្តក្នុងសង្គមចូលរួមចំណែកដោះស្រាយបញ្ហាសង្គម និងអភិវឌ្ឍន៍សង្គមតាមរយៈការបរិច្ចាគកម្លាំងកាយ កម្លាំងចិត្ត ប្រាជ្ញា ឬទ្រព្យសម្បត្តិផ្សេងៗទៅតាមអ្វីដែលអ្នកអាចធ្វើបានដើម្បីសង្គមជាតិ។
៥/ ធ្វើការស្ម័គ្រចិត្តជួយសង្គម គឺយកពេលទំនេរ ឬឆ្លៀតពេលខ្លះដើម្បីធ្វើកិច្ចការស្ម័គ្រចិត្តជួយអភិវឌ្ឍន៍សង្គមជាតិ ដូចជា៖ ការសម្អាតទីធ្លាសាធារណៈ ការដាំកូនឈើ ជួយមនុស្សមានវិបត្តិ មនុស្សចាស់ឬជួយបណ្តុះបណ្តាល ចែករំលែកចំណេះដឹង និងបទពិសោធន៍ទៅដល់អ្នកដទៃ។ ល។
៦/ បញ្ចេញទស្សនៈផ្ទាល់ខ្លួនគឺចូលរួមចំណែកបញ្ចេញទស្សនៈគំនិត និងយោបល់ប្រកបដោយសេចក្តីថ្លៃថ្នូរ ដោយគុណធម៌ មិនលំអៀង និងក្នុងន័យអប់រំ និងទិតៀនដើម្បីស្ថាបនាដល់ពលរដ្ឋ យុវជន សិស្សនិស្សិត និងថ្នាក់ដឹកនាំនានា ដើម្បីរៀនសូត្រ ត្រិះរិះ អភិវឌ្ឍន៍ខ្លួន និងសង្គមជាតិ៕
© រក្សាសិទ្ធិដោយ thmeythmey.com