ជាតិ
សង្គមជាតិ
×![]()
ដោយ: ម៉ៅ សុផា
អង្គការតម្លាភាពកម្ពុជា បានរកឃើញថា អំពើពុករលួយក្នុងវិស័យនយោបាយ បង្កផលប៉ះពាល់ដ៏ខ្លាំងបំផុតដល់សង្គមកម្ពុជា។ បញ្ហាពុករលួយក្នុងវិស័យនេះ គឺជាឫសគល់ ដែលបណ្តាលឲ្យកើតអំពើពុករលួយដទៃទៀត។ នេះជាការលើកឡើងរបស់លោក ព្រាប កុល ប្រធានអង្គការតម្លាភាពកម្ពុជា ក្នុងសន្និសីទកាសែកស្តីពីបញ្ហាពុករលួយ នៅវិទ្យាស្ថានខ្មែរ សម្រាប់សហប្រតិបត្តិការ និងសន្តិភាព ដែលប្រព្រឹត្តទៅនាពេលព្រឹក ថ្ងៃទី២៥ ខែសីហានេះ។
អំពើពុករលួយនយោបាយ គឺសំដៅដល់អំពើពុករលួយ ដែលកើតចេញពីសំណាក់អ្នកនយោបាយ ក្នុងការប្រើអំណាចនយោបាយ លើសពីអំណាចច្បាប់ ឬខុសនឹងវិធានការច្បាប់ ដើម្បីទទួលផលប្រយោជន៍ផ្ទាល់ខ្លួន ឬផលប្រយោជន៍បក្សពួករបស់ខ្លួន។
បើតាមប្រសាសន៍របស់លោក ព្រាប កុល អំពើពុករលួយផ្នែកនយោបាយ គឺជាឥទ្ធិពលអវិជ្ជមានដ៏ធ្ងន់ធ្ងរ និងជាមេរោគសង្គមដ៏ធំបំផុតនៅកម្ពុជា។ ប្រធានអង្គការរូបនេះបន្ថែមដូច្នេះថា៖ «ពុករលួយនយោបាយ គឺយើងអាចសំដៅដល់ ការសម្រេចចិត្តធ្វើច្បាប់ ឬក៏ការតាក់តែងគោលនយោបាយ ដែលបម្រើផលប្រយោជន៍បុគ្គល ឬក្រុមណាមួយ ជាងផលប្រយោជន៍ប្រជាជន ឬផលប្រយោជន៍ជាតិ។ បើយើងនិយាយពីការជ្រើសតាំងអ្នកនយោបាយ ដើម្បីឈរឈ្មោះជាបេក្ខជននោះ ក៏នឹងជ្រើសរើសដោយមានការលម្អៀងដែរ»។
លោកបន្ថែមទៀតថា៖ «ដើម្បីផលប្រយោជន៍បុគ្គល ឬផលប្រយោជន៍ក្រុមខ្លួន អ្នកនយោបាយបានប្រើឥទ្ធិពលនយោបាយរបស់ខ្លួន ក្នុងការជ្រៀតជ្រែកអំណាចឯករាជ្យនៃស្ថាប័នដទៃទៀត ។ សូម្បីតែការគ្រប់គ្រង និងការចាត់ចែងការបោះឆ្នោត ក៏អាចមានបញ្ហាខុសប្រក្រតីដែរ ។ ទាំងអស់នេះ យើងអាចចាត់ទុកថា សុទ្ធតែជាចង្កោមពុករលួយនយោបាយ»។
លោក ព្រាប កុល បញ្ជាក់ទៀតថា អំពើពុករលួយផ្នែកនយោបាយ គឺជាបញ្ហាដ៏ស្មុគស្មាញក្នុងការដោះស្រាយ។ ដូច្នេះ ដើម្បីដោះស្រាយបញ្ហានេះ នាយកប្រតិបត្តិអង្គការតម្លាភាពកម្ពុជា អំពាវនាវឲ្យមានឆន្ទៈនយោបាយដ៏មោះមុតរបស់អ្នកនយោបាយពីថ្នាក់កំពូលគ្រប់រូប រួមទាំងអ្នកនយោបាយបក្សប្រឆាំងផងដែរ ក្នុងការួមដៃគ្នាចាត់វិធានការ រៀបចំគោលនយោបាយ និងតាក់តែងច្បាប់ ដើម្បីដោះស្រាយបញ្ហាអំពើពុករលួយនយោបាយនេះ ឬក៏អំពើពុករលួយដទៃទៀត។ លោកបន្តថា ប្រជាពលរដ្ឋគ្រប់រូប ជាពិសេសយុវជន ត្រូវចេះសាមគ្គីគ្នា ធ្វើការជាក្រុម ឬជាបណ្តាញ ដើម្បីតាមដានសកម្មភាពនយោបាយ និងមន្ត្រីរដ្ឋាភិបាលគ្រប់លំដាប់ថ្នាក់។
ក្រៅពីអំពើពុករលួយនយោបាយ អង្គការតម្លាភាពកម្ពុជា បានរកឃើញប្រភេទនៃអំពើពុករលួយផ្សេងៗទៀតនៅប្រទេសកម្ពុជា រួមមាន ការស៊ីសំណូក, ការគំរាមកំហែងយកប្រាក់, ការកេងបន្លំ, បក្ខពួកនិយម និងគ្រួសារនិយម៕
Tag:
អំពើពុករលួយ
© រក្សាសិទ្ធិដោយ thmeythmey.com
