ជាតិ
×![]()
ដោយ: ម៉ៅ សុផា
ពន្ធនាគារកម្ពុជា អាចដាក់អ្នកទោសទូទាំងប្រទេស បានត្រឹមតែ ១២០០០នាក់ប៉ុណ្ណោះ ប៉ុន្តែបច្ចុប្បន្ននេះ ចំនួនអ្នកទោស មានរហូតដល់ ១៧៨៩៦ នាក់។ នេះជាបញ្ហាដ៏ធំមួយ សម្រាប់អ្នកទោសកម្ពុជា ដែលកំពុងប្រឈម។
ពន្ទនាគារកម្ពុជា បានផ្ទុកទណ្ឌិត លើសចំនួនកំណត់ រហូតដល់៥៨៩៦នាក់ ស្មើនឹង២៣,៧៣ភាគរយ។ តាមការកំណត់ ពន្ធនាគារអាចផ្ទុកចំនួនអ្នកទោសបានតែ ១២០០០នាក់ប៉ុណ្ណោះ ប៉ុន្តែនាពេលបច្ចុប្បន្ន អ្នកទោសទូទាំងប្រទេសមានរហូតដល់ ១៧៨៩៦នាក់ (ស្រី១៤៦២នាក់ និងអនីតិជន៥២៦នាក់)។ នេះបើតាមការអះអាងរបស់លោក ជិន ម៉ាលីន អ្នកនាំពាក្យក្រសួងយុត្តិធម៌ ដែលថ្លែងទៅកាន់ក្រុមអ្នកសារព័ត៌មាន ក្រោយពីបញ្ចាប់កិច្ចប្រជុំស្តីពីការពង្រឹងគោលការណ៍ក្នុងការស្នើសុំបន្ធូរបន្ថយទោស និងលើកលែងទោស នៅក្រសួងយុត្តិធម៌ កាលពីថ្ងៃទី៦ ខែមករា។
អ្នកនាំពាក្យរូបនេះបានបញ្ជាក់ដូច្នេះថា៖«ចំណុះនៃការដាក់អ្នកទោសនៅក្នុងពន្ធនាគារ គឺមិនគ្រប់គ្រាន់។ ចំនួនអ្នកទោស បានលើសពីលទ្ធភាពដែលពន្ធនាគារ ដែលបានកំណត់។ នេះជាបញ្ហាដ៏ធំមួយ ដែលពន្ធនាគារកំពុងតែប្រឈម នាពេលបច្ចុប្បន្ន»។
តាមគោលការណ៍ បន្ទប់មួយអាចដាក់អ្នកទោសត្រឹម៨នាក់ប៉ុណ្ណោះ បុន្តែស្ថានភាពបច្ចុប្បន្ន បន្ទប់ខ្លះ ដាក់លើសពី ៨នាក់ ហើយមានបន្ទប់ក្នុងពន្ធនាគារខ្លះទៀត ដាក់អ្នកទោសរហូតដល់ ជិត៣០នាក់។ ភាពចង្អៀតនៃពន្ធនាគារនីមួយៗ មានស្ថានភាពផ្សេងៗគ្នា ដោយក្នុងនោះ ពន្ធនាគារព្រៃសរ និងពន្ធនាគារខេត្តស្ទឹងត្រែង ក្រចេះ កំពង់សោម កំពុងតែប្រឈមនឹងការណែនតាន់តាប់ខ្លាំងជាងគេ។
លើសពីនេះទៅទៀត បន្ទប់ឃុំឃាំងខ្លះមិនត្រឹមតែចង្អៀតនោះទេ តែថែមទាំងចាស់ទ្រុឌទ្រោម ទៀតផង ដោយអាគារខ្លះសល់តាំងពីសម័យបារាំងមកម្ល៉េះ ដូចជាពន្ធនាគារខេត្តតាកែវ និងខេត្តកំពតជាដើម។
យ៉ាងណាក៏ដោយ កិច្ចប្រជុំកាលពីថ្ងៃម្សិលមិញ មិនបានលើកពីយន្តការនៃការកសាងអាគារបន្ថែមនោះទេ ពោលគឺគ្រាន់តែជំរុញឲ្យមានការជួសជុលអាគារចាស់ៗ មួយចំនួនដែលសល់ពីសម័យបារាំងប៉ុណ្ណោះ។ ប៉ុន្តែ ស្មារតីនៃកិច្ចប្រជុំនោះ បានស្នើឲ្យរដ្ឋាភិបាល បង្កើតមជ្ឈមណ្ឌលកែប្រែ និងបន្សាបគ្រឿងញៀនមួយនៅរាជធានីភ្នំពេញ ដើម្បីចៀសវានាំអ្នកប្រើប្រាស់គ្រឿងញៀនទៅឃុំឃាំងក្នុងពន្ធនាគារ ដែលអាចបណ្តាលឲ្យកកស្ទះយ៉ាងខ្លាំង ព្រោះ ក្នុងចំណោមអ្នកទោសទាំង១៧៨៩៦នាក់ អ្ននទោសជាប់ពាក់ព័ន្ធនឹងបទល្មើសគ្រឿងញៀនមានចំនួនច្រើនជាងគេ រហូតជាង៧០ភាគរយ៕
Tag:
ពន្ធនាគារ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
