ល្ខោនខោល៖ ក្រសួងថា ការចុះបញ្ជីបេតិកភណ្ឌត្រូវធ្វើតាមច្បាប់ មិនមែនធ្វើតាមការនឹកឃើញទេ

ជាតិ

ល្ខោនខោល៖ ក្រសួងថា ការចុះបញ្ជីបេតិកភណ្ឌត្រូវធ្វើតាមច្បាប់ មិនមែនធ្វើតាមការនឹកឃើញទេ

05, Jun 2016 , 12:13 pm

រូបភាព

អ្នកស្រី ភឿង សកុណា រដ្ឋមន្រ្តីក្រសួងវប្បធម៌

ដោយ: អុីសា រ៉ហានី (Isa Rohany)

ក្រសួងវប្បធម៌ និងវិចិត្រសិល្បៈ បានប្រតិកម្មទៅនឹងការលើកឡើងថា ក្រសួងមិនបានគិតគូរ ក្នុងការរៀបចំល្ខោនខោល ដាក់ស្នើបញ្ចូលក្នុងបញ្ជីបេតិកភណ្ឌវប្បធម៌អរូបីនៃអង្គការយូណេស្កូ។ មតិរបស់មហាជនជាទូទៅ បានរិះគន់ក្រសួងវប្បធម៌ គឺបន្ទាប់ពីព័ត៌មានបរទេសបានចុះផ្សាយថា ប្រទេសថៃកំពុងរៀបចំឯកសារ ដើម្បីដាក់ស្នើសុំចុះបញ្ជីល្ខោនខោល ទៅអង្គការយូណេស្កូ។

ក្រសួងវប្បធម៌ និងវិចិត្រសិល្បៈ បញ្ជាក់នៅក្នុងសេចក្តីប្រកាសព័ត៌មានរបស់ខ្លួនយ៉ាងដូច្នេះថា « រាល់កិច្ចការចុះបញ្ជីបេតិកភណ្ឌពិភពលោក ឫបេតិកភណ្ឌវប្បធម៌អរូបីនៃមនុស្សជាតិក្តី គឺត្រូវអនុវត្តតាមគោលការណ៍ច្បាប់ និងនីតិវិធីចាំបាច់ដែលអង្គការយូណេស្កូតម្រូវឲ្យសម្រាប់ជនជាតិ និងគ្រប់ប្រទេសលើពិភពលោក ពុំមែនធ្វើតាមតែការប្រកាស ការនឹកឃើញ ឬតាមការណ៍រំភើបរបស់អ្នកណាមួយ ឫប្រទេសណាមួយនោះឡើយ»។

ជាមួយគ្នានេះ ក្នុងសំណេរមួយទំព័រ ដែលចេញផ្សាយនៅថ្ងៃទី៣ មិថុនា ក្រសួងវប្បធម៌ បានរម្លឹកពីការងារមួយចំនួន ដែលខ្លួនបាននិងធ្វើកន្លងមក មានការដាក់របាំអប្សរា ឫរបាំព្រះរាជទ្រព្យ ទៅក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ កាលពីឆ្នាំ២០០៣ ។ បន្ទាប់មកមាន ល្ខោនស្បែកធំ ដែលបានចុះបញ្ជីទទួកស្គាល់ដោយអង្គការយូណេស្កូនៅថ្ងៃទី ២៥ វិចិ្ឆកា ឆ្នាំ២០០៥ និងល្បែងទាញព្រ័ត្រនៅថ្ងៃទី២ ធ្នូ ឆ្នាំ២០១៥ ។

ក្រសួងវប្បធម៌អះអាងថា ជាបន្តបន្ទាប់ខ្លួន មមាញឹករៀបចំឯកសារពាក់ព័ន្ធជាច្រើន ដើម្បីរៀបចំ ចាប៉ីដងវែង និងតម្បាញសូត្រ។ល។ ត្រៀមដាក់ស្នើទៅអង្គការយូណេស្កូដូចគ្នា។ ហើយក្នុងនោះ ក្រសួងក៏កំពុងត្រៀម និងចងក្រងឯកសារពាក់ព័ន្ធនឹង ក្បាច់គុនល្បុក្កតោ ភ្លេងអារក្ស និងល្ខោនខោល ដើម្បីស្នើសុំចុះបញ្ជីជាបន្តបន្ទាប់។

ក្រសួងស្នើឲ្យស្នើឲ្យសាធារណជនដឹងពីការងាររបស់ក្រុមការងារជំនាញខ្លួន ដែលបាននិងកំពុងខិតខំធ្វើអស់ពីលទ្ធភាព តាមគ្រប់មធ្យោបាយផ្សេងៗ ក្នុងបំណងការពារផលប្រយោជន៍ជាតិ៕