ជាតិ
សេដ្ឋកិច្ច
ជប៉ុនស្នើបង្កើតរោងចក្រផលិតសម្ភារសំណង់ និងគ្រឿងសង្ហារឹម ពីសំណល់ប្លាស្ទីកនៅកម្ពុជា
× ភ្នំពេញ៖ ក្រុមហ៊ុនកែច្នៃសំណល់ប្លាស្ទីក GOMI Recycle 110 ជប៉ុន មានបំណងបង្កើតរោងចក្រផលិតសម្ភារសំណង់ និងគ្រឿងសង្ហារឹម ពីសំណល់ប្លាស្ទីក ក្នុងខេត្តស្វាយរៀង ខណៈពេលកម្ពុជាកំពុងលក់កាកសំណល់ប្លាស្ទីកឲ្យបរទេស។
លោក Yusuke Okumura អគ្គនាយកក្រុមហ៊ុន GOMI Recycle 110 អមដំណើរដោយប្រតិភូទីភ្នាក់ងារ JICA បានប្រាប់រដ្ឋមន្ត្រីក្រសួងបរិស្ថាន លោក សាយ សំអាល់ ពីបច្ចេកវិទ្យាកែច្នៃសំណល់ប្លាស្ទីកទៅជាផលិតផលសម្ភារសំណង់ និងគ្រឿងសង្ហារឹម ដែលមានភាពរឹងមាំធននឹងអាកាសធាតុ។
អគ្គនាយកក្រុមហ៊ុនកែច្នៃកាកសំណល់ប្លាស្ទីកជប៉ុនរូបនេះ បានប្រាប់លោក សាយ សំអាល់ ក្នុងជំនួបពិភាក្សាពីគម្រោងនេះ ក្នុងក្រសួងបរិស្ថានថា ក្រុមហ៊ុនលោកនឹងស្នើរដ្ឋាភិបាលកម្ពុជា សុំបង្កើតរោងចក្រកែច្នៃផលិតផលសម្ភារសំណង់ និងគ្រឿងសង្ហារឹម ដែលមានភាពរឹងមាំធននឹងកម្តៅ និងទឹកភ្លៀងពីសំណល់ប្លាស្ទីក ក្នុងខេត្តស្វាយរៀង។
ជាការឆ្លើយតប លោករដ្ឋមន្ត្រី សាយ សំអាល់ កាលរសៀលថ្ងៃទី១៨ ខែកក្កដា ឆ្នាំ២០១៦ បានគាំទ្រគម្រោងវិនិយោគរបស់ក្រុមហ៊ុន ដែលមានបំណងកសាងរោងចក្រកែច្នៃនៅទីរួមខេត្តស្វាយរៀង។ ទន្ទឹមគ្នាដែរ លោកបានណែនាំក្រុមហ៊ុនឲ្យបន្តសហការជាមួយមន្ត្រីបច្ចេកទេស និងគ្រប់ភាគីពាក់ព័ន្ធបន្ថែមទៀត ដើម្បីធានាដល់ដំណើរការវិនិយោគ ស្របតាមគោលការណ៍ណែនាំ និងបទដ្ឋានបច្ចេកទេស។
ពាក់ព័ន្ធគម្រោងថ្មីនេះ អ្នកនាំពាក្យក្រសួងបរិស្ថាន លោក សៅ សុភាព ជឿជាក់យ៉ាងមុតមាំលើគម្រោងនេះ នឹងជួយកាត់បន្ថយការបំពុលកាកសំណល់ប្លាស្ទីកក្នុងបរិស្ថាន ហើយវាជួយផ្តល់ការងារដល់ប្រជាជនក្នុងការងារផលិតសម្ភារៈប្រើប្រាស់ គ្រឿងសង្ហារឹមលំអ និងកាត់បន្ថយការនាំចូលផលិតនេះពីបរទេសថែមទៀត។
តែយ៉ាងណា លោកពុំទាន់អាចបញ្ជាក់ពីកាលបរិច្ឆទ ទីតាំង និងតម្លៃវិនិយោគរបស់ក្រុមហ៊ុនជប៉ុនដែលគ្រោងសាងសង់នៅលើទឹកដីខេត្តភាគបូព៌ា ប្រទេសកម្ពុជា នៅឡើយទេ ព្រោះក្រុមហ៊ុនកំពុងសិក្សាជាមួយភាគីពាក់ព័ន្ធលម្អិតសិន មុនពេលពួកគេចាប់ផ្តើមសង់រោងចក្រ៕
Tag:
ជប៉ុន
កម្ពុជា
រោងចក្រ
© រក្សាសិទ្ធិដោយ thmeythmey.com