ជាតិ
សេដ្ឋកិច្ច
កំណើនសេដ្ឋកិច្ចកម្ពុជានឹងថយមកនៅត្រឹម ៦,២៥ភាគរយ នៅឆ្នាំ២០២១ លោក Markus Rodlauer នាយករងផ្នែកអាស៊ីប៉ាស៊ីហ្វិកនៃIMF
× ភ្នំពេញ៖ ខណៈមើលឃើញពីភាពរឹងមាំនៃកំណើនសេដ្ឋកិច្ចកម្ពុជា ដែលរក្សាបានក្នុងរង្វង់ ៧ភាគរយនៅឆ្នាំ២០១៦ និងឆ្នាំ២០១៧ ក្រុមបេសកកម្មរបស់អង្គការមូលនិធិរូបិយវត្ថុអន្តរជាតិ (IMF) បានសន្និដ្ឋានពីការធ្លាក់ចុះនៃកំណើននេះ។ បើតាមសេចក្ដីប្រកាសព័ត៌មានរបស់ IMF សេដ្ឋកិច្ចកម្ពុជា នឹងធ្លាក់មកនៅប្រមាណ៦,២៥ភាគរយប៉ុណ្ណោះ នៅឆ្នាំ ២០២១ ។
ក្រុមបេសកកម្មរបស់ IMF បានមកទស្សនកិច្ចពីថ្ងៃ៦ ដល់ថ្ងៃ២០ខែកក្កដា ដើម្បីវាយតម្លៃការអភិវឌ្ឍ ម៉ាក្រូសេដ្ឋកិច្ចរបស់កម្ពុជា មុននឹងដាក់របាយការណ៍ ជូនក្រុមប្រឹក្សាប្រតិបត្តិរបស់ IMF ធ្វើការពិភាក្សា និងសម្រេច។
ក្រុមនេះ ព្យាករថា៖«កំណើនសេដ្ឋកិច្ច នឹងនៅតែរក្សាបានភាពរឹងមាំ ក្នុងរង្វង់ ៧ភាគរយ សម្រាប់ឆ្នាំ២០១៦ និងឆ្នាំ២០១៧ ដែលគាំទ្រដោយការនាំចេញសម្លៀកបំពាក់ដ៏ខ្លាំង វិស័យអចលនទ្រព្យ និងសកម្មភាពសំណង់ រួមទាំងការបញ្ចុះតម្លៃប្រេងឥន្ធនៈ»។
ក្រុមការងារនេះ រំពឹងថា អតិផរណារបស់កម្ពុជា នឹងកើនដល់ ៣,២ភាគរយ ត្រឹមបំណាច់ឆ្នាំ២០១៦ ដោយសារការងើបឡើង នូវតម្លៃម្ហូបអាហារ។ ទន្ទឹមនឹះនេះ ឱនភាពពាណិជ្ជកម្មរបស់កម្ពុជា មាន ៩,៧ភាគរយ នៃផលិតផលក្នុងស្រុកសរុប (GDP) ធ្លាក់ចុះពី ១០,៧ភាគរយ កាលពីឆ្នាំ២០១៥ ដោយសារការនាំចេញសម្លៀកបំពាក់ និងបន្ថយការនាំចូលអគ្គិសនី បន្ទាប់ពីបញ្ចប់គម្រោងវារីអគ្គិសនីធំៗមួយចំនួន។
ក្រុមបេសកកម្មរបស់ IMF បន្តព្យាករពីកំណើនសេដ្ឋកិច្ចកម្ពុជា សម្រាប់រយៈពេល ៥ឆ្នាំទៀត។ ក្រុមនេះ ថា៖«កំណើនសេដ្ឋកិច្ច ត្រូវបានរំពឹងថា នឹងមានដំណើរការយឺត នៅត្រឹមរង្វង់ ៦,២៥ភាគរយ នៅឆ្នាំ២០២១ បណ្ដាលមកពីកាថយចុះ នូវការវិនិយោគផ្ទាល់ពីបរទេស ការប្រឈមក្នុងការធ្វើពិពិធកម្មនាំចេញ និងការថមថយនៃលំហូរឥណទាន»។
ក្រុមអ្នកជំនាញទាំងនេះ បានសង្កត់ធ្ងន់ពីកំណើនឥណទានជាបន្តបន្ទាប់ ដែលប្រមូលផ្ដុំខ្លាំងក្នុង វិស័យអចលនទ្រព្យថា ជាហានិភ័យ ដែលគំរាមកំហែងដល់សេដ្ឋកិច្ច និងស្ថិរភាពហិរញ្ញវត្ថុរបស់កម្ពុជា។
ក្រុមបេសកកម្មរបស់ IMF បានសាទរវិធានការកាត់បន្ថយហានិភ័យ ក្នុងវិស័យហិរញ្ញវត្ថុរបស់ធនាគារជាតិកម្ពុជា (NBC) ដូចជាការដំឡើងទុនបម្រុងសម្រាប់គ្រឹះស្ថានហិរញ្ញវត្ថុជាដើម។ តែក្រុមនេះថ្លែងថា គួរចាត់វិធានការច្រើនទៀត ដើម្បីបន្ថយវិបត្តិទាំងនេះ។
បន្ថែមពីនេះ ពួកគេបានមើលឃើញឥទ្ធិពលពីខាងក្រៅដល់សេដ្ឋកិច្ចកម្ពុជា ដែលរួមមាន ការធ្លាក់ចុះខ្លាំង នៃសេដ្ឋកិច្ចរបស់ប្រទេសចិន ការកើនឡើងនូវតម្លៃប្រាក់ដុល្លារអាមេរិក កំណើនសេដ្ឋកិច្ចទាបនៅតំបន់អឺរ៉ុប និងការរឹតបន្ដឹងលក្ខខណ្ឌហិរញ្ញវត្ថុសកលជាដើម៕
Tag:
IMF
កំណើនសេដ្ឋកិច្ច
ឥណទាន
© រក្សាសិទ្ធិដោយ thmeythmey.com