អន្តរជាតិ
ប្រធានាធិបតីហ្វីលីពីន៖ កុំហៅខ្ញុំថា «ឯកឧត្តម»
× ចាប់តាំងពីឡើងកាន់អំណាចនៅថ្ងៃទី៣០ ខែមិថុនា ប្រធានាធិបតីហ្វីលីពីន លោក រ៉ូឌ្រីហ្គោ ឌើទើតេ (Rodrigo Duterte) បានបោះបង់របៀបរបបជាទម្លាប់ជាច្រើន ដែលប្រធានាធិបតីមុនៗ ធ្លាប់អនុវត្តក្នុងពេលកាន់អំណាច។ នៅថ្ងៃនេះ ប្រធានាធិបតីកណ្ដាប់ដៃដែកនេះ ក៏បានប្រាប់ទៅមន្ត្រីរដ្ឋាភិបាលទាំងអស់ មិនត្រូវហៅលោកជា «ឯកឧត្តម» ក្នុងការទំនាក់ទំនងផ្លូវការនោះទេ។
ប្រធានាធិបតីហ្វីលីពីន លោក រ៉ូឌ្រីហ្គោ ឌើទើតេ នៅថ្ងៃទី២១ ខែកក្កដា បានដាក់បញ្ជាទៅកាន់សមាជិករដ្ឋាភិបាលទាំងអស់ មិនត្រូវហៅលោកថា «ឯកឧត្តម (His Excellency)» ក្នុងលិខិតទំនាក់ទំនងផ្លូវការជាមួយនឹងការិយាល័យប្រធានាធិបតីនោះទេ។ ជំនួសមកវិញ លោក ឌើទើតេ បញ្ជាក់ថា មន្ត្រីទាំងអស់អាចហៅលោកត្រឹមថា «ប្រធានាធិបតី» បានហើយ។
នៅក្នុងកំណត់ហេតុដែលចុះនៅថ្ងៃទី១៥ ខែកក្កដា និងត្រូវបានផ្សាយលើទូរទស្សន៍រដ្ឋ PTV4 នៅថ្ងៃទី២១ ខែកក្កដា ប្រធានាធិបតីហ្វីលីពីន បានណែនាំចំនួនពីរចំណុច ទាក់ទិននឹងការហៅងាររបស់ថ្នាក់ដឹកនាំ។ ក្នុងចំណុចទីមួយ ប្រធានាធិបតីហ្វីលីពីន គួរត្រូវបានហៅ នៅក្នុងការទំនាក់ទំនងផ្លូវការ ឬព្រឹត្តិការណ៍នានា ឬក្នុងឯកសារផ្សេងទៀត ថា «ប្រធានាធិបតី RODRIGO ROA DUTERTE» បានហើយ ដោយមិនចាំបាច់មានពាក្យ «ឯកឧត្តម» ឡើយ។
នៅក្នុងចំណុចទីពីរ សមាជិកនៃគណៈរដ្ឋមន្ត្រីរបស់លោក ឌើទើតេ ក៏ត្រូវណែនាំឲ្យហៅ ក្នុងលិខិតផ្លូវការជាមួយការិយាល័យប្រធានាធិបតី ថា «រដ្ឋមន្ត្រី (Secretary)» និងមិនចាំបាច់បន្ថែមងារ «ឯកឧត្តម (Honorable)» ទេ។ យ៉ាងណាមិញ បើតាមសារព័ត៌មាន Rappler កំណត់ហេតុដដែលបញ្ជាក់ថា គ្រប់ការិយាល័យនៃរដ្ឋាភិបាល អាចប្រើប្រាស់ងារឯកត្តម នៅពេលដែលប្រើពាក្យនេះសំដៅទៅប្រធានស្ថាប័នរបស់ខ្លួន នៅក្នុងការទំនាក់ទំនង និងលិខិតផ្ទៃក្នុងរបស់អង្គភាពនីមួយៗ។
លោកប្រធានាធិបតី ឌើទើតេ ដែលមានប្រភពមកពីកោះមិនដាណាវ តែងគេចចេញពីទម្លាប់ជាប្រពៃណីរបស់ប្រធានាធិបតី។ កាលពីថ្ងៃស្បថចូលកាន់តំណែង លោក ឌើទើតេ បានជ្រើសរើសស្បថនៅក្នុងវិមានប្រធានាធិបតី ជាជាងនៅឧទ្យានជាតិ ដោយលោកអះអាងថា ដើម្បីចៀសវាងការស្ទះចរចរណ៍ក្នុងទីក្រុង។
មិនតែប៉ុណ្ណោះ សូម្បីតែការស្លៀកពាក់ក៏មានការផ្លាស់ប្ដូរផងដែរ។ លោក ឌើទើតេ បានស្លៀកខោខូវប៊យ នៅពេលព្យុហយាត្រាកងទ័ព និងតែងមូលដៃអាវ នៅពេលចូលពិធីផ្លូវការផ្សេងៗ។ លើសពីនេះ នៅពេលចូលទៅថ្លែងក្នុងនៅសភានៅសប្ដាហ៍ក្រោយ លោក បានដាក់បញ្ជាឲ្យភ្ញៀវដែលចូលរួម ស្លៀកពាក់ធម្មតា ដោយមិនចាំស្លៀកពាក់ប្រពៃណីអ្វីឡើយ។ លោកបញ្ជាក់ថា វាមិនមែនជាពេលបង្ហាញម៉ូដឡើយ៕
© រក្សាសិទ្ធិដោយ thmeythmey.com