សង្គមអន្តរជាតិ
អន្តរជាតិ
ចិន៖ ជំនួយរបស់ចិនឲ្យកម្ពុជា មិនជាប់ពាក់ព័ន្ធនឹងរឿងនយោបាយឡើយ អ្នកនាំពាក្យលោក Lu Kang
×
អ្នកនាំពាក្យក្រសួងការបរទេសចិន លោក Lu Kang នៅថ្ងៃទី២១ ខែកក្កដាម្សិលមិញ បានថ្លែងបញ្ជាក់ថា ជំនួយរបស់ចិនមកកាន់កម្ពុជា មិនមានជាប់ពាក់ព័ន្ធនឹងរឿងនយោបាយឡើយ។ សេចក្តីថ្លែងការណ៍នេះ ធ្វើឡើងដើម្បីជាការច្រានចោលទៅនឹងសារព័ត៌មានបរទេសមួយដែលបានចុះផ្សាយថាជំនួយនេះ ពាក់ព័ន្ធជាមួយនឹងការគាំទ្ររបស់កម្ពុជាទៅលើចិនក្នុងឆាកអន្តរជាតិក៏ដូចជាលើបញ្ហាសមុទ្រចិនខាងត្បូង។ នេះបើយោងតាមភ្នាក់ងារព័ត៌មានរដ្ឋចិន Xinhua។
អ្នកនាំពាក្យរូបនោះ ក៏បានបញ្ជាក់ដែរថា «ចិន សង្ឃឹមថា ភាគីពាក់ព័ន្ធនឹងមិនមើលជំនួយរបស់ចិនក្នុងរូបភាពស្រពិចស្រពិល និងឃោសនាបំផ្លើសពីព្រឹត្តិការណ៍ការពិតឡើយ»។ នេះបើយោងតាមប្រភពព័ត៌មានដដែលដែលបានដកស្រង់សម្តីអ្នកនាំពាក្យដែលបានបន្ថែមដែរថា «ក្នុងនាមជាប្រទេសកំពុងអភិវឌ្ឍន៍ ចិន និងកម្ពុជា គឺជាអ្នកជិតខាងដ៏ជិតស្និទ្ធ និងជាដៃគូកិច្ចសហប្រតិបត្តិការយុទ្ធសាស្ត្រ ជាមួយនឹងកិច្ចសហប្រតិបត្តិការស្មោះត្រង់យូរអង្វែង និងការគាំទ្រគ្នាទៅវិញទៅមក»។
អ្នកនាំពាក្យដដែលនោះ បានបន្តទៀតថា រយៈពេលប៉ុន្មានឆ្នាំចុងក្រោយនេះ ចិន បានផ្តល់ជំនួយ និងការគាំទ្រផ្នែកហិរញ្ញវត្ថុតាមលទ្ធភាពរបស់ខ្លួនដែលអាចធ្វើបានដើម្បីជួយប្រទេសដទៃក្នុងការពន្លឿនការអភិវឌ្ឍ និងបង្កើនការរស់នៅរបស់ប្រជាជនឲ្យកាន់តែមានភាពល្អប្រសើរ។
លោកសង្កត់ធ្ងន់ថា ជំនួយនោះដែរ (ជំនួយមកកាន់កម្ពុជា) ត្រូវបានប្រើប្រាស់សម្រាប់គម្រោងអភិវឌ្ឍន៍សង្គមលើវិស័យជាច្រើនដូចជា ការថែទាំសុខភាព កសិកម្ម វប្បធម៌ និងវិស័យអប់រំដែលត្រូវបានទទួលការស្វាគមន៍ពីប្រជាជនកម្ពុជាផងដែរ។
សូមជម្រាបផងដែរថា កាលពីថ្ងៃទី១៥ ខែកក្កដា កន្លងទៅ សម្តេចនាយករដ្ឋមន្ត្រី ហ៊ុន សែន បានប្រកាសជាសាធារណៈលើទំព័រហ្វេសប៊ុក ថា នាយករដ្ឋមន្ត្រីចិនបានប្រកាសផ្តល់ជំនួយឥតសំណងចំនួន៣៦០០លានយន់ ប្រហែលជិត ៦០០លានដុល្លារអាមេរិកដល់កម្ពុជា ចាប់ពីឆ្នាំ២០១៦ ដល់ ២០១៨។ការប្រកាសនេះធ្វើឡើងក្នុងជំនួបពិភាក្សាទ្វេរភាគីរវាងនាយករដ្ឋមន្ត្រីចិន និងនាយករដ្ឋមន្ត្រីកម្ពុជានៅក្រៅនៃកិច្ចប្រជុំកំពូលអាស៊ី-អឺរ៉ុប៕
© រក្សាសិទ្ធិដោយ thmeythmey.com