កីឡាអន្តរជាតិ
អន្តរជាតិ
លោក Sam Allardyce ក្លាយជាអ្នកចាត់ការអង់គ្លេស ជំនួសលោក Hodgson រូបភាពពី៖ហ្វេសប៊ុកEngland Football Team
× អតីតអ្នកចាត់ការក្រុមឆ្មាខ្មៅ Sunderland លោក Sam Allardyce ត្រូវបានតែងតាំងជាអ្នកចាត់ការថ្មីរបស់ក្រុមតោកំណាចអង់គ្លេសជាផ្លូវការហើយ។ លោក Sam Allardyce នឹងចូលកាន់តំណែងជំនួសលោក Roy Hodgson ដែលបានចាកចេញ ហើយលោកទទួលបានកិច្ចសន្យាដឹកនាំរយៈពេលពីរឆ្នាំផងដែរ។
បន្ទាប់ពីដំណើការជ្រើសរើសគ្រប់ជ្រុងជ្រោយរួចមក សមាគមកីឡាបាល់ទាត់អង់គ្លេស (FA) បានសម្រេចតែងតាំងលោក Sam Allardyce ជាអ្នកចាត់ការថ្មីហើយនៅថ្ងៃទី២២ ខែកក្កដា។ បុរសវ័យ៦១ឆ្នាំរូបនេះ នឹងត្រូវចូលកាន់តំណែងភ្លាមៗផងដែរ។ ការជ្រើសរើសលោក Allardyce ធ្វើឡើងដោយមនុស្សសំខាន់បីនាក់ គឺនាយកប្រតិបត្តិ FA លោក Martin Glenn នាយកបច្ចេកទេស លោក Dan Ashworth និងប្រធានស្ដីទីFA លោក David Gill។
បើតាមគេហទំព័រផ្លូវការរបស់ FA បន្ទាប់ពីត្រូវបានតែងតាំងជាអ្នកចាត់ការថ្មី លោក Sam Allardyce និយាយថា លោកពិតជាមានកិត្តិយសណាស់សម្រាប់ការតែងតាំងនេះ ជាពិសេសនោះ ជាការងារដែលលោកតែងចង់បាន។ លោកបន្តថា សម្រាប់រូបលោក តួនាទីនេះ ជាការងារល្អបំផុតក្នុងវិស័យកីឡាបាល់ទាត់អង់គ្លេស។
ជាមួយគ្នានោះ អតីតអ្នកចាត់ការក្រុមឆ្មាខ្មៅ Sunderland ក៏បានប្រកាសការតាំងចិត្តចំពោះតួនាទីថ្មីនេះ។ លោកបញ្ជាក់ថា លោកនឹងធ្វើអ្វីគ្រប់យ៉ាង ដើម្បីជួយអង់គ្លេស និងសម្រាប់អ្នកគាំទ្រក្រុមជម្រើសជាតិអង់គ្លេសទាំងអស់ ហើយលោកនឹងធ្វើឲ្យប្រជាជន និងប្រទេសទាំងមូល មានមោទនភាព។
ការងារសំខាន់របស់លោក Sam Allardyce នៅពេលនេះ គឺធ្វើយ៉ាងណាឲ្យអង់គលេស មានសិទ្ធិទៅប្រកួតពានរង្វាន់ World Cup 2018 ដែលរុស្សីធ្វើជាម្ចាស់ផ្ទះ។ ក្រៅពីនោះ លោកក៏ត្រូវបង្វឹកក្រុមយុវជនវ័យក្មេងអង់គ្លេស ដើម្បីមានសមត្ថភាពប្រកួតប្រជែងក្នុងពានរង្វាន់ធំៗផងដែរ។
លោក Sam Allardyce បានផ្ដួលបេក្ខភាពផ្សេងទៀត សម្រាប់តំណែងជាអ្នកចាត់ការទូទៅនេះ ដែលរួមទាំងលោក Jürgen Klinsmann លោក Eddie Howe ក៏ដូចជាអតីតអ្នកចាត់ការក្រុម Hull City លោក Steve Bruce ផងដែរ។ មុនមកដឹកនាំក្រុមជម្រើសជាតិអង់គ្លេស លោក ធ្លាប់ដឹកនាំក្លឹបBolton Wanderers ក្លឹបញញួរធំ West ham មុននឹងទៅដឹកនាំក្រុម Sunderland។
© រក្សាសិទ្ធិដោយ thmeythmey.com