អន្តរជាតិ
អាមេរិកបន្ទោសហ្គេម Pokemon GO ធ្វើឲ្យក្មេងលួចឆ្លងដែនពីកាណាដាចូលអាមេរិក
× សហរដ្ឋអាមេរិកបានអះអាងថា ហ្គេម Pokemon Go បានធ្វើឲ្យក្មេងៗដើរឆ្លងដែនខុសច្បាប់ពីប្រទេសកាណាដាចូលទឹកដីអាមេរិកកន្លងមកនេះ។ ក្នុងសប្តាហ៍នេះ ភ្នាក់ងារល្បាតព្រំដែនអាមេរិកបានអះអាងថាក្មេងៗពីរនាក់វង្វេងដោយបានឆ្លងដែនចូលរដ្ឋ Montana សហរដ្ឋអាមេរិក ព្រោះតែពួកគេរវល់កាន់ទូរសព្ទលេងហ្គេមនិងតាមប្រមាញ់រូបតុក្កតា។
ហ្គេមដ៏ពេញនិយម Pokemon Go កំពុងធ្វើឲ្យយុវវ័យវក់វី និងរហូតធ្វើឲ្យពួកគេជួបគ្រោះថ្នាក់ចរាចរណ៍ផងក៏មាន។ នៅសហរដ្ឋអាមេរិកវិញ គេឃើញមានការរិះគន់ហ្គេមនេះខ្លាំងផងដែរ ព្រោះវាបានធ្វើឲ្យក្មេងៗឆ្លងដែនខុសច្បាប់ពីកាណាដាចូលក្នុងទឹកដីអាមេរិកច្រើនដងគ្រាន់តែក្នុងសប្តាហ៍នេះ។
យោងតាមទីភ្នាក់ងារព័ត៌មាន Reuters ភ្នាក់ងារគយនិងល្បាតព្រំដែនអាមេរិកបានអះអាងថា យុវជនកាណាដា ពីរនាក់បានឆ្លងដែនចូលទឹកដីរដ្ឋ Montana ហើយត្រូវបានឃាត់ខ្លួន។ យុវជនទាំងពីរដែលមានវ័យជាអនីតជននោះវង្វេងឆ្លងដែនពីកាណាដាព្រោះពួកគេរវល់តែលេងហ្គេម Pokemon Go និងតាមប្រមាញ់រូបតុក្កតាសត្វ។
បើតាមលោក Michael Rappold អ្នកភ្នាក់ងារល្បាតអាមេរិកខាងលើបានអះអាងថា ក្មេងៗទាំងពីរនាក់មិនបានចាប់អារម្មណ៍ថាពួកគេនៅទីណានិងកំពុងទៅណាឡើយ តែគេផ្ចង់អារម្មណ៍តែនៅលើហ្គេមមួយមុខប៉ុណ្ណោះ។ ដូច្នេះហើយបានជាពួកគេវង្វេងឆ្លងដែនបែបនេះ។ ប៉ុន្តែក្រោយ ឃាត់ខ្លួននិងត្រូវបានសួរនាំហើយនោះ ក្មេងៗទាំងពីរត្រូវបានគេបញ្ចូនឆ្លងដែនឲ្យទៅកាណាដាវិញដើម្បីត្រលប់ទៅជួបជាមួយឪពុកម្តាយពួកគេវិញ។
ហ្គេម Pokemon GO នេះកំពុងពេញនិយមខ្លាំងលើពិភពលោក ចាប់តាំងពីវាត្រូវបានគេបង្កើតនិងដាក់ឲ្យប្រើប្រាស់នៅសហរដ្ឋអាមេរិកដើមខែកក្កដាកន្លងមកនេះ។ អ្នកលេងហ្គេមនេះ ប្រើប្រាស់ទូរសព្ទដើម្បីស្វែងរកនិងតាមចាប់ប្រភេទតុក្កតាសត្វក្នុងរឿង Pokemon ជាច្រើនដែលរូបនេះលេចចេញនៅទីតាំងជាច្រើនមានទាំងភោជនីយដ្ឋាន ការិយាល័យ សារមន្ទីរ និងបណ្តាកន្លែងសំខាន់ៗផ្សេងទៀត។ ដូច្នេះហើយបានជាក្មេងៗនិងមនុស្សជាច្រើនជក់ចិត្ត និងវក់ជាមួយហ្គេមនេះថែមទៀតផង។ ប៉ុន្តែគេបារម្ភថា បច្ចេកវិទ្យាដែលប្រើប្រាស់ក្នុងហ្គេមនេះកំពុងតែធ្វើឲ្យមនុស្សគ្រោះថ្នាក់នៅពេលខាងមុខផង៕
Tag:
Pokemon Go
អាមេរិក
កាណាដា
© រក្សាសិទ្ធិដោយ thmeythmey.com