ជាតិ
សេដ្ឋកិច្ច
ជាង២០០ក្រុមហ៊ុនបង្ហាញផលិតផលក្នុងពិព័រណ៍ឧស្សាហកម្មគ្រឿងយន្តនិងកាត់ដេរនៅចុងខែសីហានេះ រូបយកពីក្រុមហ៊ុនរៀបចំពិពរណ៍
× ភ្នំពេញ៖ ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ(CIMIF) និងពិព័រណ៍ឧស្សាហកម្មសម្លៀកបំពាក់ និងវាយនភ័ណ្ឌកម្ពុជាអន្តរជាតិ(CTG)លើកទី៦ នឹងត្រូវរៀបចំឡើងដំណាលគ្នានៅថ្ងៃទី២៦ ដល់ថ្ងៃទី២៩ខែសីហា នៅមជ្ឈមណ្ឌលកោះពេជ្រ។ ព្រឹត្តការណ៍នេះ នឹងមានដាក់តាំងផលិតផល និងបច្ចេកវិទ្យារបស់ក្រុមហ៊ុនជាង ២០០មកពី១៤ប្រទេស។
ពិព័រណ៍ CIMIF និងCTG នឹងមានដាក់បង្ហាញផលិផល និងបច្ចេកវិទ្យា ដូចជា ម៉ាស៊ីនវេចខ្ចប់ ម៉ាស៊ីនព្រីន វត្ថុធាតុដើមនិងគ្រឿងបន្ទាប់បន្សំ ម៉ាស៊ីនផលិតអាហារ គ្រឿងម៉ាស៊ីនកសិកម្ម ម៉ាស៊ីនស្វ័យប្រវត្តិ វិស្វកម្មអគ្គិសនី ប្រព័ន្ធភ្លើង ម៉ាស៊ីនក្រណាត់និងវានភ័ណ្ឌ និងមានទំនិញក្នុងវិស័យផ្លាស្ទីក និង កៅស៊ូផងដែរ។
លោក លី តេកហេង ប្រធានប្រតិបត្តិសមាគមកាត់ដេរនៅកម្ពុជា(GMAC) ថ្លែងក្នុងសន្និសីទសារព័ត៌មានមុនបើកពិព័រណ៍ CIMIF និងCTG នៅថ្ងៃទី២២ខែសីហា ថា ពិព័រណ៍ទាំងនេះ នឹងរួមចំណែកជំរុញវិស័យកាត់ដេររបស់កម្ពុជា ឲ្យកាន់តែមានភាពប្រកួតប្រជែងនៅលើទីផ្សារអន្តរជាតិ។ លោកបញ្ជាក់ថា គ្រឿងម៉ាស៊ីន គឺជាកត្តាគន្លឹះមួយ ដើម្បីបង្កើនសង្វាក់ផលិតកម្មឲ្យប្រសើរឡើង ដោយលោកជំរុញឲ្យក្រុមហ៊ុនកាត់ដេរគួរបង្កើនសមត្ថភាពផ្នែកម៉ាស៊ីន តាមរយៈផលិតផលទំនើបថ្មីៗ។ ហើយនេះជាឱកាសសម្រាប់ម្ចាស់ក្រុមហ៊ុនកាត់ដេរនៅកម្ពុជា ដើម្បីស្វែងរកដៃគូផ្គត់ផ្គង់គ្រឿងម៉ាស៊ីនផ្សេងៗតាមតម្រូវការរបស់ខ្លួន។
ព្រឹត្តការណ៍ពិព័រណ៍ខាងលើ ត្រូវរៀបចំដោយក្រុមហ៊ុន Yorkers Trade and Marketing Service និងសហការដោយក្រសួងឧស្សាហកម្ម និងសិប្បកម្ម និង GMAC ហើយទទួលការគាំទ្រដោយអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្ម៕
Tag:
វាយនភ័ណ្ឌ
លី តេកហេង
CIMIF
CTG
© រក្សាសិទ្ធិដោយ thmeythmey.com