ជាតិ
សង្គមអន្តរជាតិ
អត្ថបទពាណិជ្ជកម្ម
ប្រាសាក់បន្តពង្រីកការអនុវត្តគម្រោងបណ្ណាល័យ
× ក្រោយពីបានដាក់ឲ្យដំណើរការប្រើប្រាស់បណ្ណាល័យទាំង ១៧ ប្រកបដោយជោគជ័យរួចមក ក្រុមប្រឹក្សាភិបាលនិងគណៈគ្រប់គ្រងប្រាសាក់ បានសម្រេចអនុវត្តគម្រោងបណ្ណាល័យនេះដល់សាលារៀនរដ្ឋ ៤ ជាបន្តទៀត ដើម្បីចូលរួមលើកស្ទួយវប្បធម៌អានក្នុងចំណោមសិស្សានុសិស្សនៅកម្ពុជា។
គម្រោងបណ្ណាល័យប្រាសាក់នេះ កើតឡើងពីការផ្តួចផ្តើមគំនិតពីធនាគារជាតិ ដោយបានទទួលការគាំទ្រយ៉ាងខ្លាំងក្លាពីក្រសួងអប់រំ យុវជន និងកីឡា ដៃគូអភិវឌ្ឍ អាជ្ញាធរដែនដី លោកគ្រូអ្នកគ្រូ អាណាព្យាបាល និងសិស្សានុសិស្ស។
គម្រោងបណ្ណាល័យឆ្នាំ ២០១៦ នឹងអនុវត្តនៅតាមសាលារៀនគោលដៅចំនួន ៤ គឺ៖
- វិទ្យាល័យកំពង់ថ្ម ស្ថិតក្នុងភូមិធនមោង ឃុំកំពង់ថ្ម ស្រុកបារាយណ៍ ខេត្តកំពង់ធំ
- វិទ្យាល័យ ជា ស៊ីម ប្រឡាយ ស្ថិតក្នុងភូមិក្រែក ឃុំប្រឡាយ ស្រុកស្ទោង ខេត្តកំពង់ធំ
- វិទ្យាល័យ ហ៊ុន សែន រុងរឿងស្ថិតក្នុងភូមិបុស្សតាសោម ឃុំរុងរឿង ស្រុកស្ទោង ខេត្តកំពង់ធំ និង
- សាលាបឋមសិក្សានិងអនុវិទ្យាល័យត្រពាំងឈូក ស្ថិតក្នុងភូមិតាំងក្រសាំង ឃុំព្នាយ ស្រុកសំរោងទង ខេត្តកំពង់ស្ពឺ។
គម្រោងនេះបានចាប់ផ្តើមអនុវត្តការងារសាងសង់កាលពីថ្ងៃទី ១៥ ខែសីហា ឆ្នាំ ២០១៦ ដោយចាប់ផ្តើមបើកការដ្ឋានសាងសង់នៅវិទ្យាល័យកំពង់ថ្ម ហើយនឹងបន្តទៅបើកការដ្ឋានសាងសង់ជាបន្តបន្ទាប់នៅវិទ្យាល័យ ជា ស៊ីម ប្រឡាយ វិទ្យាល័យ ហ៊ុន សែន រុងរឿង និងសាលាបឋមសិក្សានិងអនុវិទ្យាល័យត្រពាំងឈូក នាពេលដ៏ខ្លីខាងមុខនេះ។
បណ្ណាល័យនីមួយៗនឹងត្រូវបំពាក់ទៅដោយធនធានសម្ភារនិងឯកសារគ្រប់គ្រាន់រួមមាន៖ ធ្នើ សៀវភៅ ផែនទី ពាក្យស្លោក តុអាន កៅអី ទូ ហិបដាក់សម្ភារ តុការិយាល័យ។ ក្រៅពីការបំពាក់ធនធានសម្ភារនិងឯកសារ ប្រាសាក់បានឧបត្ថម្ភគាំទ្រក្នុងការផ្តល់ការបណ្តុះបណ្តាលទៅដល់បណ្ណារក្សដើម្បីឲ្យពួកគាត់មានលទ្ធភាពគ្រប់គ្រាន់ក្នុងការគ្រប់គ្រងដំណើរការបណ្ណាល័យផងដែរ។
សូមរំលឹកផងដែរថា ប្រាសាក់បានដាក់បញ្ចូលគម្រោងអភិវឌ្ឍបណ្ណាល័យទៅក្នុងសកម្មភាពចូលរួមអភិវឌ្ឍការងារសង្គមរបស់ខ្លួននៅឆ្នាំ២០១១។ បច្ចុប្បន្ន គម្រោងនេះគ្របដណ្តប់លើភូមិចំនួន ២០៧ ភូមិ ដែលមានចំនួនគ្រួសារសរុប ៤០០១៤ គ្រួសារ មានប្រជាជនសរុបចំនួន ១៨៥០៧១ នាក់ នៅក្នុងខេត្តចំនួន៨ រួមមាន ៖ កំពង់ស្ពឺ កំពង់ចាម ព្រៃវែង កំពង់ធំ សៀមរាប តាកែវ ព្រះវិហារ និងខេត្តបាត់ដំបង និងមានសិស្សានុសិស្សដែលទទួលផលផ្ទាល់ពីគម្រោងបណ្ណាល័យនេះចំនួន ១១០៨៩ នាក់ និងលោកគ្រូអ្នកគ្រូចំនួន ៣៧១ នាក់ ដោយចំណាយទឹកប្រាក់អស់ជាង ៥៦២ ពាន់ដុល្លារអាមេរិក៕
មានវីដេអូទស្សនា ៖
© រក្សាសិទ្ធិដោយ thmeythmey.com