ជាតិ
សេដ្ឋកិច្ច
សាជីវកម្ម OPIC របស់អាមេរិក ផ្ដល់កម្ចី ១២៥លានដុល្លារដល់ធនាគារអេស៊ីលីដា
× ភ្នំពេញ៖ សាជីវកម្មវិនិយោគឯកជនក្រៅប្រទេស (OPIC) របស់រដ្ឋាភិបាលសហរដ្ឋអាមេរិក បានចុះកិច្ចព្រមព្រៀងផ្ដល់ហិរញ្ញប្បទានចំនួន ១២៥លានដុល្លារដល់ធនាគារអេស៊ីលីដា ភីអិលស៊ី ដើម្បីគាំទ្រផ្នែកហិរញ្ញវត្ថុដល់សហគ្រាសខ្នាតតូចបំផុត ខ្នាតតូច និងខ្នាតមធ្យម (MSMEs) នៅកម្ពុជា។ នេះបើតាមសេចក្ដីប្រកាសព័ត៌មានរួមរវាងធនាគារអេស៊ីលីដា និង OPIC នៅថ្ងៃទី២៤ខែសីហា។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី ឲ្យដឹងយ៉ាងដូច្នេះថា៖«ការទទួលបានហិរញ្ញប្បទានរយៈពេលវែងពី OPIC ពិតជាមានសារៈសំខាន់ណាស់សម្រាប់ធនាគារអេស៊ីលីដា ដើម្បីពង្រីកលទ្ធភាពផ្ដល់កម្ចីដល់ MSMEs នៅទូទាំងប្រទេសកម្ពុជា ដែលមានតម្រូវការហិរញ្ញប្បទានសម្រាប់ចាប់ផ្ដើម និងពង្រីកធុរកិច្ច ព្រមទាំងបង្កើនចំណូល»។
លោក អ៊ិន ចាន់នី បន្ថែមថា៖«ហិរញ្ញប្បទានរបស់ OPIC រួមចំណែកបង្កើនប្រភពទុនយុទ្ធសាស្ត្ររបស់ធនាគារ ដែលជាធនាគារឈានមុខគេនៅក្នុងទីផ្សារហិរញ្ញវត្ថុកម្ពុជា»។
ប្រធាននាយកប្រតិបត្តិ OPIC លោកស្រី Elizabeth L. Littlefield ថ្លែងថា៖«ហិរញ្ញប្បទានរបស់ OPIC នឹងផ្ដល់លទ្ធភាពដល់ធនាគារអេស៊ីលីដា ដើម្បីផ្ដល់ហិរញ្ញប្បទានដល់ MSMEs បន្ថែមទៀត ដើម្បីអភិវឌ្ឍធុរកិច្ចចីរភាពនៅកម្ពុជា ព្រមទាំងធ្វើឲ្យជីវភាពពលរដ្ឋខ្មែរកាន់តែប្រសើរ»។
បន្ទាប់ពីដំណើរការអស់រយៈពេល២៤ឆ្នាំ ធនាគារអេស៊ីលីដា មានសាខាចំនួន ២៥៨នៅទូទាំងប្រទេស ព្រមទាំងបានពង្រីកសាខារបស់ខ្លួននៅប្រទេសឡាវ និងប្រទេសមីយ៉ាន់ម៉ាផងដែរ។ ដោយគិតត្រឹមខែកក្កដាឆ្នាំ២០១៦ ធនាគារនេះ មានទ្រព្យសកម្មសរុបចំនួន ៤,៣៤ពាន់លានដុល្លារ សមតុល្យឥណទានសរុប ២,៧២ពាន់លានដុល្លារ និងប្រាក់បញ្ញើសន្សំចំនួន ៣,០៩ពាន់លានដុល្លារ។ នេះបើតាមសេចក្ដីប្រព័ត៌មានដដែលនេះ៕
Tag:
OPIC
អ៊ិន ចាន់នី
ធនាគារអេស៊ីលីដា
© រក្សាសិទ្ធិដោយ thmeythmey.com