បទវិភាគ
ដំណើរវិវត្តនៃព្រៃឈើកម្ពុជា…
× ភ្នំពេញ៖ រយៈពេលជាង៣ទសវត្សរ៍មកនេះ ព្រៃឈើកម្ពុជាត្រូវបានមតិមួយចំនួនចោទថា ត្រូវបានគេកាប់បំផ្លាញអស់ច្រើន។ ទន្ទឹមនឹងការបាត់បង់វត្តមានព្រៃឈើ ក៏មានលេចចេញអ្នកស្រឡាញ់ធនធានធម្មជាតិជាច្រើន។ ពួកគេបានពុះពារទម្លុះទម្លាយឧបសគ្គគ្រប់បែបយ៉ាង ដើម្បីការពារព្រៃឈើដែលជាធនធានដ៏មានតម្លៃនេះ។ ក្នុងនោះ សកម្មជនបរិស្ថានខ្លះ ត្រូវបានគេចាប់ដាក់គុក រងបណ្តឹងពីតុលាការ និងពេលខ្លះ ត្រូវចំណាយជិវិតដោយសារតែការស្រឡាញ់ព្រៃឈើ។
ទិន្នន័យមួយចំនួន បានបង្ហាញថា ក្រោយរបបខ្មែរក្រហម ព្រៃឈើកម្ពុជា មានប្រមាណ៧៣ភាគរយនៃផ្ទៃដីសរុបរបស់ប្រទេសកម្ពុជា។ មកដល់បច្ចុប្បន្ននេះ គេគ្មាននិន្នន័យពិតប្រាកទេ តែមានអ្នកខ្លះ ប៉ាន់ស្មានក្រៅផ្លូវការថា ព្រៃឈើនៅកម្ពុជា អាចនៅសល់ប្រហែលជា៣០ភាគរយនៃផ្ទៃដីប្រទេស។
ព្រៃឈើសេសសល់ ដែលគេស្គាល់ច្រើននោះ មានដូចជា ព្រៃឡង់ (ជាប់ខេត្ត៤៖ខេត្តក្រចេះ ស្ទឹងត្រែង កំពង់ធំ និងព្រះវិហារ) ព្រៃឈើនៅតំបន់អារ៉ែងខេត្តកោះកុង និងព្រៃឈើជួរភ្នំក្រវាញជាដើម។ ទន្ទឹមនឹងការកាប់បំផ្លាញព្រៃឈើ ក៏មានអ្នកអភិរក្សជាច្រើន បានចេញមុខការពារព្រៃឈើ រាប់ចាប់តាំងពីប្រជាជនសាមញ្ញ រហូតដល់ព្រះសង្ឃផងដែរ។ នៅពីក្រោយខ្នងព្រៃសេសសល់ខ្លះទាំងនេះ មានការលះបង់ និងបូជាសាច់ស្រស់យាមស្រស់របស់សកម្មជនបរិស្ថានយ៉ាងច្រើន។ ក្នុងនោះ មានសកម្មជនបរិស្ថានជាច្រើនត្រូវបានគេចាប់ដាក់គុក គំរាមកំហែង និងបាញ់សម្លាប់ទាំងកណ្តាលព្រៃជាដើម។ សកម្មជនបរិស្ថានដ៏ល្បីល្បាញ លោក ឈុត វុទ្ធី ប្រធានអង្គការការពារធនធានធម្មជាតិ ត្រូវបានឃាតករបាញ់សម្លាប់ កាលពីថ្ងៃទី ២៦ ខែមេសា ឆ្នាំ ២០១២ នៅក្នុងបរិវេណភូមិវាលបី ឃុំបាក់ខ្លង ស្រុកមណ្ឌលសីមា ខេត្តកោះកុង ក្នុងពេលដែលរូបលោកចុះទៅឃ្លាំមើលសកម្មភាពកាប់បំផ្លាញព្រៃឈើនៅតំបន់នោះ។
ការបាត់បង់ព្រៃឈើ បានបង្កផលប៉ះពាល់ជាច្រើនចំពោះពលរដ្ឋ ជាពិសេស ជនជាតិដើមភាគតិច ដែលត្រូវរងការបណ្តេញចេញពីផ្ទះសម្បែង ដីចម្ការ និងព្រៃសហគមន៍របស់ពួកគេ។
របាយការណ៍អង្គការលីកាដូរកន្លងមក បានរកឃើញថា មានប្រជាជនកម្ពុជាប្រមាណ៧០ម៉ឺននាក់ រងប៉ះពាល់ពីជម្លោះដីធ្លីនៅកម្ពុជា។ ទន្ទឹមនឹងជម្លោះដីធ្លី ការកាប់បំផ្លាញព្រៃឈើ បានធ្វើឲ្យប៉ះពាល់មុខរបរពលរដ្ឋ ដូចជា ដងជ័រទឹក បោចវល្លិ៍ ដីចម្ការកសិកម្ម និងអនុផលព្រៃឈើផ្សេងទៀត។ មួយវិញទៀត ការបាត់បង់ព្រៃឈើ ក៏បណ្តាលឲ្យបាត់បង់សត្វព្រៃផងដែរ។ ក្រៅពីនេះ ការបាត់បង់ព្រៃឈើត្រូវបានគេស្តីបន្ទោសថា បានបង្កឲ្យមានគ្រោះធម្មជាតិជាច្រើនបានកើតឡើង ដូចជា គ្រោះទឹកជំនន់ រាំងស្ងួត ខ្យល់ព្យុះ ខ្យល់កន្ទ្រាក់ ។ល។ គិតត្រឹមរយៈពេល៤ខែ ដើមឆ្នាំ២០១៦ យ៉ាងហោចណាស់ មានពលរដ្ឋស្លាប់១២នាក់ និងអ្នករងរបួស៦០នាក់ ដោយសារតែបាតុភូតខ្យល់កន្ទ្រាក់ និងរន្ទះបាញ់។ ក្នុងនោះមានករណីខ្យល់កន្ទ្រាក់កើតឡើងចំនួន១៤៦លើក ដែលបណ្ដាលឲ្យផ្ទះប្រជាពលរដ្ឋជាង១ពាន់ខ្នង បានរងការខូចខាត។ នេះបើតាម លោក កែវ វី នាយខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ។
មានមូលហេតុមួយចំនួន ដែលបណ្តាលឲ្យព្រៃឈើត្រូវបានកាប់បំផ្លាញ។ មូលហេតុមួយ គឺអាចបណ្តាលមកពី ការផ្តល់ដីសម្បទានសេដ្ឋកិច្ចរបស់រាជរដ្ឋាភិបាលកម្ពុជា ដើម្បីពង្រីកផ្ទៃដីដាំដុះ ពង្រឹងវិស័យកសិឧស្សាកម្ម ដូចជា ដំណៅកៅស៊ូ ម្រេច ស្វាយ ដំឡូក ដូងប្រេង… ដើម្បីនាំចេញទៅក្រៅប្រទេស សម្រាប់បង្កើនចំណូលសេដ្ឋកិច្ចជាតិ។ ឆ្លៀតហេតុផលខាងលើនេះ ក្រុមហ៊ុនដីសម្បទានខ្លះ បានយករូបភាពអភិវឌ្ឍន៍នេះ ដើម្បីកាប់ឈើយកទៅលក់។ ក្រុមហ៊ុនខ្លះ មិនត្រឹមតែកាប់ឈើក្នុងរង្វង់ដីសម្បទានប៉ុណ្ណោះទេ តែពួកគេបានកាប់ឈើនៅក្រៅដីសម្បទាន ហើយនាំចូលក្នុងដីសម្បទាន បន្ទាប់មកនាំចេញជាឈើស្របច្បាប់។
គិតមកទល់នឹងឆមាសទីមួយឆ្នាំ២០១៦ រដ្ឋាភិបាល បានផ្ដល់ដីសម្បទានសេដ្ឋកិច្ច ចំនួនជាង១,៥លានហិកតា ឲ្យទៅក្រុមហ៊ុនចំនួន ២២៣ ដែលកំពុងប្រតិបត្តិការគម្រោងរបស់ខ្លួន ក្នុងខេត្តចំនួន១៨។ នេះបើតាមរបាយការណ៍របស់ ក្រសួងកសិកម្ម រុក្ខាប្រមាញ់ និងនេសាទ ចេញផ្សាយកាលពីចុងខែកក្កដា ឆ្នាំ២០១៦ ។ មូលហេតុទីពីរ គឺអាចបណ្តាលមកពីអំពើពុករលួយរបស់មន្ត្រីពាក់ព័ន្ធមួយចំនួន ត្រូវរ៉ូវគ្នាជាមួយឈ្មួញរកស៊ីព្រៃឈើ និង មូលហេតុទីបី គឺបណ្តាលមកជីវភាពពលរដ្ឋក្រីក្រ និងកង្វះការយល់ដឹង ទើបជំរុញពួកគេឲ្យចូលព្រៃកាប់ឈើ ដើម្បីលក់ឲ្យឈ្មួញ ខណៈដែលយន្តការទប់ស្កាត់បទល្មើសព្រៃឈើរបស់រដ្ឋាភិបាល ត្រូវបានគេមើលឃើញថា មានភាពទន់ខ្សោយ។
សូមបញ្ជាក់ថា កាលពីថ្ងៃទី២២ សីហា ឆ្នាំ២០១៦ សម្តេចនាយករដ្ឋមន្ត្រី ហ៊ុន សែន បានបង្កើតវេទិកាស្តីពី៖«ការការពារ និង អភិរក្សធនធានធម្មជាតិ»ដោយបានអញ្ជើញសកម្មជនការពារព្រៃឈើដ៏ល្បី ព្រះអង្គ ប៊ុត ប៊ុនទិញ និង កញ្ញា ធី សុវណ្ណថា ឲ្យចូលរួមផងដែរ។ ក្នុងនោះ សម្តេច ហ៊ុន សែន បានប្រកាសទទួលស្គាល់កំហុសចំពោះភាពខ្វះចន្លោះរបស់រដ្ឋាភិបាល ក្នុងការការពារព្រៃឈើ និងធនធានជលផលកន្លងមក។
ក្នុងន័យថែរក្សាព្រៃឈើដែលនៅសេសសល់ ការប្រកាសដាក់តំបន់អារ៉ែង ជាទីកន្លែងទេសចរណ៍ធម្មជាតិ របស់រដ្ឋាភិបាល គឺជារឿងគួរឲ្យអបអរសាទរ។ ប៉ុន្តែ រដ្ឋាភិបាល គួរតែប្រមូលតំបន់ដែលសម្បូរព្រៃឈើ និងសត្វព្រៃទូទាំងប្រទេស ដាក់ជាតំបន់អភិរក្ស និងតំបន់ទេសចរណ៍ជាតិផងដែរ ដើម្បីរក្សាធនធានធម្មជាតិចុងក្រោយរបស់កម្ពុជា និងបង្កើតការងារជូនពលរដ្ឋ តាមរយៈការរកចំណូលពីភ្ញៀវទេសចរ ព្រមទាំងអាចលក់កាបូនឲ្យប្រទេសអភិវឌ្ឍន៍មួយចំនួន ដូចដែលរដ្ឋាភិបាលបានលក់កាបូនតំបន់ដែនជម្រកសត្វព្រៃកែវសីមា បានទឹកប្រាក់ចំនួន ២,៦លានដុល្លាអាមេរិក កន្លងមកអ៊ីចឹងដែរ។
ទន្ទឹមនឹងនេះដែរ ការអភិវឌ្ឍហេដ្ឋារចនាសម្ព័ន្ធឲ្យបានគ្រប់គ្រាន់នៅតំបន់ទេសចរណ៍ ក៏ជារឿងមិនគួរមើលរំលងឡើយ។ ក្រៅពីបង្កើតតំបន់ទេសចរណ៍ រដ្ឋាភិបាល គួរខិតខំដាំដើមឈើឡើងវិញ ដើម្បីជំនួសឲ្យព្រៃឈើដែលបានបាត់បង់រួចទៅហើយនោះ។ លើសពីនេះ រដ្ឋាភិបាល និងភាគីពាក់ព័ន្ធទាំងអស់ គួរតែពង្រឹងការអនុវត្តច្បាប់ឲ្យបានតឹងរ៉ឹងបំផុតដើម្បីការពារធនធានធម្មជាតិខ្មែរ ទុកឲ្យអ្នកជំនាន់ក្រោយ៕
© រក្សាសិទ្ធិដោយ thmeythmey.com