ជាតិ
នយោបាយជាតិ
កម្ពុជា ប្រាប់វៀតណាមថា នឹងរុះរើសំណង់តាមព្រំដែន បើសិនវៀតណាមមិនបញ្ឈប់ការសាងសង់
×
ភ្នំពេញ៖ គណៈកម្មការចម្រុះព្រំដែនកម្ពុជា បានស្នើឲ្យភាគីវៀតណាមផ្អាកការសាងសង់ប៉ុស្តិ៍ អគារ និងផ្លូវតាមព្រំដែន ដើម្បីរង់ចាំដំណោះស្រាយជាមុនសិន។ កម្ពុជាប្រាប់វៀតណាមទៀតថា បើវៀតណាមមិនព្រមផ្អាកសកម្មភាពខ្លួនទេនោះ កម្ពុជា នឹងរុះរើសំណង់អាគារតាមព្រំដែនទាំងនោះចោល។ គណៈកម្មការចម្រុះព្រំដែនកម្ពុជា-វៀតណាម បើកកិច្ចប្រជុំចង្អៀតនៅទីស្តីការគណៈរដ្ឋមន្ត្រី នៅថ្ងៃទី២៩ សីហា នេះ ដើម្បីពិភាក្សាគ្នាដោះស្រាយបញ្ហាចម្រូងចម្រាសលើបញ្ហាព្រំដែនរវាងប្រទេសទាំងពីរ។
រដ្ឋលេខាធិការក្រសួងការបរទេស និងជាអនុប្រធានគណៈកម្មការចម្រុះព្រំដែនកម្ពុជា លោក ឡុង វិសាលោ បានបញ្ជាក់ថា ក្នុងកិច្ចប្រជុំចង្អៀតលើបញ្ហាព្រំដែននេះ ក្រុមការងារកិច្ចការព្រំដែនកម្ពុជា បានស្នើឲ្យភាគីវៀតណាមផ្អាកគម្រោងសាងសង់សំណង់ប៉ុស្តិ៍ អគារ និងផ្លូវតាមព្រំដែន ដើម្បីរង់ចាំដំណោះស្រាយជាមុនសិន ។ លោកថា ប្រសិនបើវៀតណាមមិនព្រមផ្អាកការសាងសង់នោះទេ កម្ពុជានឹងរុះរើសំណង់អាគារតាមព្រំដែននេះចោលតែម្ដង។
ថ្លែងចំពោះមុខកាសែតក្រោយបញ្ចប់កិច្ចប្រជុំចង្អៀតព្រឹកនេះ អនុប្រធានគណៈកម្មការចម្រុះព្រំដែនរូបនេះ បានបញ្ជាក់យ៉ាងខ្លីដូច្នេះថា៖«ខ្ញុំបានតវ៉ាបើសិនជាហ៊ានធ្វើ (សាងសង) ខ្ញុំឲ្យរុះចេញ»។
ជាការឆ្លើយតបភាគីវៀតណាមទទួលយកសំណើររបស់កម្ពុជា ដែលស្នើឲ្យផ្អាកការសាងសង់នៅតាមការដ្ឋាននានា តាមខ្សែបន្ទាត់ព្រំដែននេះ សុំយកទៅពិភាក្សាជាមួយក្រសួងពាក់ព័ន្ធរបស់វៀតណាមជាមុនសិន។នេះបើតាមលោក ឡុង វិសាលោ។
ប្រធានគណៈកម្មាធិការកិច្ចការព្រំដែនកម្ពុជាលោក វ៉ា គីមហុង ទទួលស្គាល់ថា កិច្ចប្រជុំចង្អៀតលើបញ្ហាព្រំដែននេះ ភាគីទាំងពីរនៅមានភាពចម្រូងចម្រាសគ្នា ដែលមិនទាន់អាចរកដំណោះស្រាយសមស្របនោះឡើយ ។ បើទោះមិនទាន់រកដំណោះស្រាយត្រឹមត្រូវក្ដី តែលោក វ៉ា គីមហុង អះអាងថា កម្ពុជាមិនមែនជា«កញ្ជះ»របស់ប្រទេសណាមួយ ដែលត្រូវទុកឲ្យគេរំលោភបំពានបូរណភាពទឹកដី បានស្រេចតែចិត្តនោះទេ។
ក្រៅពីស្នើឲ្យវៀតណាមបញ្ឈប់សកម្មភាពសាងសង់តាមបន្ទាត់ព្រំដែននេះ កម្ពុជានិងវៀតណាម ក៏បានប្រជុំត្រួតពិនិត្យលើឯកសារស្នើសុំជំនួយបច្ចេកទេសពីប្រទេសបារាំង ដើម្បីដោះស្រាយលើចំណុចខ្វែងគំនិតគ្នា នៃបញ្ហាព្រំដែនប្រទេសទាំងពីរ។ ប៉ុន្តែចំណុចមួយចំនួនលើឯកសារស្នើសុំអន្តរាគមន៍ពីបារាំងនេះ ភាគីទាំងពីរក៏មិនទាន់ឯកភាពគ្នាទាំងស្រុងនោះដែរ ដោយសារកម្ពុជាចង់ស្នើសុំឲ្យបារាំងជួយអន្តរាគមន៍ចំនួន២ចំណុចប៉ុណ្ណោះ ខណៈខាងភាគីវៀតណាមចង់ឲ្យស្នើសុំ៧ចំណុច។ នេះបើតាមលោក វ៉ា គីមហុង ដែលមិនទាន់អាចបញ្ជាក់ពីចំណុចក្នុងខ្លឹមសារទាំងនោះបាននៅឡើយទេ។
គួរបញ្ជាក់ថា កម្ពុជា-វៀតណាម បានព្រមព្រៀងគ្នាបោះបង្គោលព្រំដែន កាលពីឆ្នាំ២០០៦មក ក្នុងបណ្តោយព្រំដែនរវាងប្រទេសទាំងពីរប្រវែង១២៧០គីឡូម៉ែត្រ ដោយកំណត់បោះបង្គោលព្រំដែនចំនួន៣៧៥បង្គោល។ បើតាមរបាយការណ៍គណៈកម្មាធិការព្រំដែនកម្ពុជា កាលឆ្នាំ២០១៥ កម្ពុជា-វៀតណាម បានបោះបង្គោលព្រំដែនបានចំនួន៨៣ភាគរយ ពោលគឺបញ្ហាព្រំដែនរវាងប្រទេសទាំងពីរ នៅសល់១៧ភាគរយទៀតប៉ុណ្ណោះ៕
© រក្សាសិទ្ធិដោយ thmeythmey.com