អន្តរជាតិ
អ្នកសាធារណរដ្ឋត្រៀមស្ប៉តពាណិជ្ជកម្មបង្ខំឲ្យ ដូណាល់ ត្រាំ ចាកចេញពីការប្រកួតប្រជែង
× សមាជិកបក្សសាធារណរដ្ឋមួយចំនួនកំពុងរៀបចំស្ប៉តពាណិជ្ជកម្មដែលមានឈ្មោះថា«រក្សាពាក្យសម្តីរបស់អ្នក» ដើម្បីបង្ខំឲ្យបេក្ខជនប្រធានាធិបតី ដូណាល់ ត្រាំ ដកខ្លួនពីការប្រកួតប្រជែង និងអនុញ្ញាតឲ្យអ្នកផ្សេងដែលស័ក្តិសមមកជំនួសវិញ។ កន្លងមកលោក ដូណាល់ ត្រាំ អះអាងថា លោកនឹងដកខ្លួន បើសិនជាចំនួនអ្នកគាំទ្រលោកធ្លាក់ចុះនោះ។
កម្មវិធីពាណិជ្ជកម្មប្រឆាំងបេក្ខជន ដូណាល់ ត្រាំ កំពុងត្រូវបានគេរៀបចំឡើងដើម្បីចាក់ផ្សាយនៅតំបន់ជាយក្រុងមួយចំនួននៅរដ្ឋដែលគណបក្សធំៗទាំងពីរមានសំឡេងប្រហាក់ប្រហែលគ្នា (Swing State)។
កម្មវិធីពាណិជ្ជកម្មនោះមានចំណងជើងថា « រក្សាពាក្យសម្តីរបស់អ្នក» ហើយវាត្រូវបានរៀបចំឡើងដោយក្រុមសមាជិកគណបក្សសាធារណរដ្ឋដែលប្រឆាំងលោក ដូណាល់ ត្រាំ ។ គេចង់ឲ្យលោក ដូណាល់ ត្រាំ គោរពពាក្យសម្តីរបស់ខ្លួនឯងដែលធ្លាប់អះអាងថា លោកនឹងចាកចេញពីសង្វៀននយោបាយ បើសិនជាចំនួនអ្នកគាំទ្រលោក ថយចុះនោះ។
យោងតាមសារព័ត៌មាន Politico ដែលស្រង់សម្តីសកម្មជនបក្សសាធារណរដ្ឋប្រចាំរដ្ឋ Colorado លោក Regina Thomson ស្ប៉តពាណិជ្ជកម្មនេះមានរយៈពេល ៣០វិនាទី ហើយវាត្រូវនឹងត្រូវចាក់ផ្សាយនៅតំបន់មួយចំនួននៅរដ្ឋ Florida, Virginia, Ohio និង Michigan ផង។
តាមពិតទៅ គោលបំណងនៃការរៀបចំកម្មវិធីនេះឡើង គឺដើម្បីធ្វើយ៉ាងណាដាក់សម្ពាធនិងបង្ខំឲ្យបេក្ខជនប្រធានាធិបតីបក្សសាធារណរដ្ឋនេះចាកចេញពីការប្រកួតប្រជែងតំណែងប្រធានាធិបតី។ ហើយវានឹងអនុញ្ញាតឲ្យគណកម្មាធិការជាតិនៃគណបក្សសាធាណរដ្ឋជ្រើសរើសអ្នកនយោបាយថ្មីម្នាក់ដើម្បីមកជំនួសនិងប្រជែងជាមួយលោកស្រី ហ៊ីឡារី គ្លីនតុនវិញ។
កាលពីខែតុលាឆ្នាំមុន ក្នុងបទសម្ភាសន៍ជាមួយសារព័ត៌មាន NBC លោក ដូណាល់ ត្រាំ បានអះអាងថា៖« ខ្ញុំមិនមែនជាមនុស្សដែលរីករាយដោយសារការឈឺចាប់ឡើយ។ បើសិនជាចំនួនអ្នកគាំទ្រខ្ញុំធ្លាក់ចុះ ហើយខ្ញុំមើលឃើញថាខ្ញុំមិនអាចឈ្នះទេ តើខ្ញុំបន្តប្រកួតធ្វើអី្វទៀត?»។
មកទល់ពេលនេះ លោក ដូណាល់ ត្រាំ មិនបានគោរពពាក្យសន្យារបស់លោកឡើយ ថ្វីបើយោងតាមការស្ទង់មតិ លោកទទួលបានសំឡេងគាំទ្រតិចជាងលោកស្រី ហ៊ីឡារី គ្លីនតុន ក៏ដោយចុះ។ ការស្ទង់មតិបង្ហាញថា លោក ទទួលបានសំឡេងគាំទ្រតិចជាងលោកស្រី ហ៊ីឡារី គ្លីនតុននៅស្ទើរតែគ្រប់រដ្ឋដែលគណបក្សទាំងពីរមានសំឡេងគាំទ្រប្រហាក់ប្រហែលគ្នានោះ។ ប៉ុន្តែយ៉ាងណាក៏ដោយ ក្រុមអ្នកគាំទ្រ សេដ្ឋីអចលនទ្រព្យដូណាល់ ត្រាំ នេះសង្ឃឹមថា ការគាំទ្រលោកនឹងកើនឡើងវិញ ដោយសារការបន្តត្រួតពិនិត្យអាណត្តិលោកស្រី ហ៊ីឡារី គ្លីនតុន នៅពេលជារដ្ឋមន្ត្រីការបរទេស ជាពិសេសបញ្ហាជំនួយនិងមូលនីធិគ្លីនតុននោះ៕
Tag:
ដូណាល់ ត្រាំ
បក្សសាធាណរដ្ឋ
© រក្សាសិទ្ធិដោយ thmeythmey.com