ជាតិ
នយោបាយជាតិ
លោក អេង ឆៃអ៊ាង ថាឯកឧត្តម កឹម សុខា ពុំខ្លាចការចាប់ខ្លួនឡើយ
× ភ្នំពេញ៖ អស់រយៈជាង២ខែហើយ ដែលឯកឧត្តម កឹម សុខា អនុប្រធានគណបក្សសង្គ្រោះជាតិ សំងំលាក់ខ្លួនក្នុងទីស្នាក់ការកណ្តាល។ ការមិនចាកចេញពីទីស្នាក់ការគណបក្សបែបនេះ ត្រូវបានប្រជាពលរដ្ឋមួយចំនួន ជាពិសេសអ្នកគាំទ្របក្សកាន់អំណាច សើចចំអកឲ្យឯកឧត្តម កឹម សុខា ថាភ័យខ្លាចនឹងសមត្ថកិច្ចចាប់ខ្លួន។ ប៉ុន្តែនៅព្រឹកថ្ងៃចន្ទនេះ មន្ត្រីជាន់ខ្ពស់បក្សប្រឆាំងលោក អេង ឆៃអ៊ាង បានអះអាងថា អ្នកដឹកនាំរបស់លោក មិនខ្លាចសមត្ថកិច្ចនោះទេ។
ស្ថិតនៅក្នុងសម្លៀកបំពាក់ពណ៌ខ្មៅ នៅព្រឹកថ្ងៃចន្ទទី២៩សីហានេះ លោក អេង ឆៃអ៊ាង មន្ត្រីជាន់ខ្ពស់បក្សប្រឆាំង បានបដិសេធចំពោះមតិរបស់បុគ្គលមួយចំនួន ដែលអះអាងថា ឯកឧត្តម កឹម សុខា ខា្លចសមត្ថកិច្ចចាប់ខ្លួន ទើបសុខចិត្តសំងំរស់នៅក្នុងទីស្នាក់ការគណបក្សបែបនេះ។ ពីវេទិកានយោបាយប្រចាំសប្តាហ៍ នៅទីស្នាក់ការកណ្តាលគណបក្ស លោក អេង ឆៃអ៊ាងសារភាពថា ឯកឧត្តម កឹម សុខា មិនអាចគេចខ្លួនឡើយ ប្រសិនបើសមត្ថកិច្ច ចង់នាំខ្លួនគាត់ទៅតុលាការមែននោះ។
នៅចំពោះមុខអ្នកគាំទ្រ មន្ត្រីជាន់ខ្ពស់បក្សប្រឆាំងរូបនេះ បានបញ្ជាក់ដូច្នេះថា៖«ខ្ញុំសូមជម្រាបជូនជាផ្លូវការនៅថ្ងៃនេះ ឲ្យសាធារណជនទាំងអស់ជ្រាបថា ឯកឧត្តម កឹម សុខា អត់ខ្លាចសន្តិសុខ (សមត្ថកិច្ច) ហើយរត់ពួនទេ។ យើងដឹងហើយថា គណបក្សសង្គ្រោះជាតិ អត់មានមធ្យោបាយអ្វីធំដុំទេ។ គេអាចមកចាប់ពេលណាក៏បាន»។
ផ្ទុយទៅវិញ លោក អេង ឆៃអ៊ាង ពន្យល់ថា ការមិនចាកចេញពីទីស្នាក់ការគណបក្សបែបនេះ ព្រោះឯកឧត្តម កឹម សុខា កំពុងធ្វើកូដកម្មនយោបាយ ក្នុងគោលបំណងឲ្យមានដំណោះស្រាយនយោបាយ។ លោកបន្ថែមទៀតថា អំឡុងពេលប៉ុន្មានខែដែល ឯកឧត្តម កឹម សុខា រស់នៅក្នុងទីស្នាការ គឺដើម្បីបង្ហាញថា អ្វីៗដែលអ្នកមានអំណាច ធ្វើមកលើគណបក្សសង្គ្រោះជាតិ គឺជាការរំលោភច្បាប់យ៉ាងធ្ងន់ធ្ងរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានច្រានចោល ការអត្ថាធិប្បាយរបស់លោក អេង ឆៃអ៊ាង។ សម្រាប់អ្នកនាំពាក្យគណបក្សកាន់អំណាច សំណុំរឿងក្តីក្តាំរបស់ឯកឧត្តម សម រង្ស៊ី និងរបស់ឯកឧត្តម កឹម សុខា គឺពាក់ព័ន្ធនឹងបញ្ហាផ្លូវច្បាប់សុទ្ធសាធ។ លោក សុខ ឥសាន លើកឡើងយ៉ាងដូច្នេះថា៖«ឯកឧត្តម សម រង្ស៊ី និងឯកឧត្តម កឹម សុខា បានប្រព្រឹត្តបទល្មើសពិតមែន។ វាជារឿងការអនុវត្តរបស់តុលាការ។ ជារឿងនីតិរដ្ឋ មិនមែនរឿងនយោបាយឡើយ»។
សូមបញ្ជាក់ថា ឯកឧត្តម កឹម សុខា បានសម្រេចចិត្តរស់នៅក្នុងទីស្នាក់ការគណបក្ស ចាប់តាំងពីកម្លាំងសមត្ថកិច្ច បរាជ័យក្នុងការចាប់ខ្លួនលោក កាលពីថ្ងៃទី២៦ ខែឧសភា ឆ្នាំ២០១៦។ ការបញ្ជាឲ្យសមត្ថកិច្ចចាប់ខ្លួនឯកឧត្តម កឹម សុខា ទាំងមានអភ័យឯកសិទ្ធិបែបនេះ ដោយសារតែតុលាការសំអាងថា ឯកឧត្តម កឹម សុខា បានប្រព្រឹត្តបទល្មើសជាក់ស្តែង។ ក្រោយពីឯកឧត្តម កឹម សុខា មិនព្រមបង្ហាញខ្លូនចំនួន២លើក តាមការកោះហៅ ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ តុលាការ ក៏បានចោទឯកឧត្តម កឹម សុខា ពីបទ «បដិសេធក្នុងការចូលខ្លួន» តែម្តង។ សាលាដំបូងនឹងបើកសវនាការជម្រះសំណុំរឿងនេះនៅថ្ងៃទី៩ខែកញ្ញាខាងមុខនេះ។
ឯកឧត្តម សម រង្ស៊ី វិញបានភៀសខ្លួនទៅរស់នៅឯបរទេស បន្ទាប់ពីការអនុវត្តសាលដីកាស្ថាពរមួយនៃសំណុំរឿងបរិហារកេរ្តិ៍លោក ហោ ណាំហុង អតីតរដ្ឋមន្ត្រីការបរទេសកម្ពុជា និងបន្ទាប់មក ឯកឧត្តម សម រង្ស៊ី ក៏រងបណ្តឹងពីរដ្ឋាភិបាលជាច្រើនហូរហែថែមទៀត៕
Tag:
CNRP
តុលាការ
កឹម សុខា
សម រង្ស៊ី
អេង ឆៃអ៊ាង
© រក្សាសិទ្ធិដោយ thmeythmey.com