អន្តរជាតិ
លោក Erdogan ប្ដេជ្ញាកម្ទេចទាំងក្រុមរដ្ឋឥស្លាម និងក្រុមឧទ្ទាមឃើដ ប្រធានាធិបតីតួកគី Recep Tayyip Erdogan នាជំនួបជាមួយអ្នកគាំទ្រ។ រូបថត Xinhua
× កងកម្លាំងតួកគី និងក្រុមឧទ្ទាមស៊ីរីជាសម្ព័ន្ធមិត្តរបស់ខ្លួន បានចូលកាន់តែជ្រៅក្នុងទឹកដីស៊ីរី ក្នុងប្រតិបត្តិការផ្លេកបន្ទោរ ដើម្បីបោសសម្អាតក្រុមជ្រុលនិយមរដ្ឋឥស្លាម និងចលនាឧទ្ទាមឃើដ (YPG) នៅតាមបណ្ដោយព្រំដែនតួកគី និងស៊ីរី។ ខណៈដែលប្រតិបត្តិការខិតជិតដល់មួយសប្ដាហ៍ហើយនោះ ប្រមុខរដ្ឋតួកគី លោក Recep Tayyip Erdogan បញ្ជាក់ថា យុទ្ធនាការបោសសម្អាតនេះ នឹងបន្តរហូតដល់ចប់ និងមិនលើកលែងឲ្យក្រុមណាមួយឡើយ។
ប្រធានាធិបតីតួកគី Recep Tayyip Erdogan បានប្រកាសថា តួកគីមានការតាំងចិត្តដូចគ្នាក្នុងការប្រយុទ្ធនឹងក្រុមជ្រុលនិយមរដ្ឋឥស្លាម និងក្រុមឧទ្ទាមឃើដ YPG ខណៈដែលប្រតិបត្តិការយោធាឆ្លងព្រំដែនរបស់កងទ័ពតួកគីចូលមកទឹកដីស៊ី រី ឈានមកដល់ថ្ងៃទី៥ហើយនោះ។ ប្រតិបត្តិការដែលចាប់ផ្ដើមពីពាក់កណ្ដាលសប្ដាហ៍មុននៅភាគខាងជើងស៊ីរី ក៏បានសម្លាប់មនុស្សអស់ជាច្រើនផងដែរ។
ថ្លែងទៅកាន់ការជួបជុំក្នុងទីក្រុង Gaziantep នៅថ្ងៃទី២៨ ខែសីហា ប្រធានាធិបតីតួកគី និយាយថា តួកគី នឹងមិនអត់ឱនឲ្យអង្គការភេរវកម្មណាមួយនៅក្នុង ឬនៅក្បែរព្រំដែនរបស់ខ្លូនឡើយ។ ហើយនេះគឺជាមូលហេតុដែលកងកម្លាំងតួកគីចូលទៅកាន់ទីក្រុង Jarablus របស់ស៊ីរី។ លោក Erdogan បន្តថា ប្រសិនបើចាំបាច់ កងកម្លាំងតួកគី អាចនឹងប្រតិបត្តិការនៅកន្លែងផ្សេងទៀត។
យោងតាមទូរទស្សន៍ Al Jazeera កងទ័ពតួកគី និងសម្ព័ន្ធមិត្ត ដែលគាំទ្រដោយយន្តហោះចម្បាំង បានបង្កើនយុទ្ធនាការយោធានៅតំបន់ភាគខាងជើង កាលពីចុងសប្ដាហ៍មុន។ ជាមួយគ្នានេះ កងកាំភ្លើងធំរបស់តួកគី ក៏បានបន្តបាញ់លើទីតាំងរបស់កងកម្លាំងគាំទ្រចលនាឃើដ នៅក្បែរទីក្រុង Jarablus ផងដែរ។ ក្នុងសេចក្ដីថ្លែងការណ៍របស់ខ្លួន កងទ័ពតួកគីបញ្ជាក់ថា យុទ្ធនាការផ្លូវអាកាសនេះ គឺដើម្បីការពារកងទ័ពតួកគី ដែលកំពុងជួយក្រុមឧទ្ទាមស៊ីរីសេរី។
បើទោះជាប្រតិបត្តិការផ្លេកបន្ទោរអាចទប់ស្កាត់ការរុលទៅមុខរបស់ក្រុមឧទ្ទាមឃើដ និងអាចបណ្ដេញក្រុមរដ្ឋឥស្លាមតាមព្រំដែនក៏ដោយ កងកម្លាំងតួកគី ហាក់ដូចជាមិនទាន់មានសញ្ញាដកថយនោះឡើយ។ លោកប្រធានាធិបតី Erdogan បញ្ជាក់ដែរថា ប្រតិបត្តិការប្រឆាំងក្រុមភេរវកម្ម នឹងបន្តរហូតដល់ទីបញ្ចប់ មិនថាប្រឆាំងក្រុមរដ្ឋឥស្លាម ឬចលនាឃើដ YPG ឡើយ។
តាំងពីដើមមក ក្រុងអង់ការ៉ាបានចោទក្រុមឃើដ YPG ថា មានទំនាក់ទំនងជាមួយបក្សពលករឃើដ (PKK) នៅភាគខាងអាគ្នេយ៍តួកគី។ ក្រុមឧទ្ទាម YPG នេះ ក៏ជាចលនាយោធារបស់ក្រុមឃើដនៅក្នុងស៊ីរី ដែលគ្រប់គ្រងតំបន់ភាគខាងជើងស៊ីរី និងបានរុលឆ្លងទៅខាងកើតទន្លេ Euphrates ដែលតួកគីចាត់ទុកជាបន្ទាត់ក្រហម និងហាមក្រុមនេះរុលទៅមុខទៀត៕
Tag:
តួកគី
ឃើដ
ក្រុមរដ្ឋឥស្លាម
© រក្សាសិទ្ធិដោយ thmeythmey.com