ជាតិ
សុវត្តិភាព ចរាចរណ៍
ចរាចរណ៍៖ មនុស្សស្លាប់ និងរបួសជិត ៦០០នាក់ ក្នុងខែសីហា
× ភ្នំពេញ៖ មនុស្សចំនួន ១៣០នាក់ បានស្លាប់ និងរបួសចំនួន ៤៦៦នាក់ ករណីគ្រោះថ្នាក់ចរាចរណ៍ចំនួន ២៨០លើក ក្នុងខែសីហា ឆ្នាំ២០១៦ ។ នេះបើតាមរបាយការណ៍របស់គណៈកម្មាធិការជាតិសុវត្ថិភាព ចរាចរណ៍ផ្លូវគោក។
តាមបាយការណ៍បូកសរុបលទ្ធផលត្រួតពិនិត្យការអនុវត្ត ច្បាប់ស្តីពី ចរាចរណ៍ផ្លូវគោកថ្មី ខែសីហា ឆ្នាំ២០១៦នេះ ករណីគ្រោះថ្នាក់ចរាចរណ៍មានភាគច្រើនចំនួន ៣២លើក ក្នុងរាជធានីភ្នំពេញ ខេត្តបន្ទាយមានជ័យចំនួន ១៨លើក ខេត្តបាត់ដំបងចំនួន ១៣លើក ខេត្តកំពង់ធំ ១៣លើក និងចំនួន ១៣លើកខេត្តកណ្តល។ ផ្អែកលើរបាយការណ៍ ជនរងគ្រោះស្លាប់ជាមធ្យមចំនួន ៤នាក់ និងរបួសចំនួន ១៥នាក់ ក្នុងមួយថ្ងៃៗ ហើយអ្នកស្លាប់រហូតដល់ទៅ ២២នាក់ ក្នុងករណីគ្រោះថ្នាក់នៅខេត្តបាត់ដំបង ក្នុងខែកន្លងទៅ។
មូលហេតុនាំឲ្យកើតមានគ្រោះថ្នាក់ចរាចរណ៍ រួមមាន បើកបរហួសល្បឿនកំណត់ ៤០ភាគរយ មិនគោរពសិទ្ធិអាទិភាព ១១ភាគរយ បត់១១ភាគរយ ស្រវឹង ១០ភាគរយ វ៉ាជែង ១០ភាគរយ មិនប្រកាន់ស្តាំ១០ភាគរយ កត្តាយានយន្ត ៥ភាគរយ កត្តាផ្លូវ ២ភាគរយ និងងងុយគេង ១ភាគរយ។
គួរកត់សម្គាល់ផងដែរ តាមរបាយការណ៍ដដែល អ្នកស្លាប់ភាគច្រើនចំនួន ៩២នាក់ ស្មើនឹង ៧១ភាគរយ ជាអ្នកដំណើរតាមម៉ូតូដែលមានកម្លាំងម៉ាស៊ីនប្រភេទ ១២៥CCចុះក្រោម ក្នុងនោះ អ្នកមិនពាក់មួកសុវត្ថិភាពមានចំនួន ៧៧នាក់ ស្មើនឹងជាង ៨០ភាគរយ។
តាមបាយការណ៍បូកសរុបលទ្ធផលត្រួតពិនិត្យការអនុវត្តច្បាប់ស្តីពី ចរាចរណ៍ផ្លូវគោកថ្មី ដែលត្រូវចេញផ្សាយ នៅថ្ងៃនេះ ករណីគ្រោះថ្នាក់ចរាចរណ៍ក្នុងខែសីហា ឆ្នាំ២០១៦កើនឡើងចំនួន ៧លើក ស្មើនឹង ៥ភាគរយ តែអ្នកស្លាប់ថយចំនួន ២៣នាក់ ស្មើនឹង១៨ភាគរយ និងអ្នករបួស ថយចំនួន ៥៨នាក់ ស្មើ១២ភាគរយ ធៀបនឹងខែសីហា ឆ្នាំ២០១៥កន្លងទៅ៕
© រក្សាសិទ្ធិដោយ thmeythmey.com