ឥណ្ឌានឹងបើកការហោះហើរត្រង់មកកម្ពុជា នៅឆ្នាំក្រោយ

ជាតិ

ឥណ្ឌានឹងបើកការហោះហើរត្រង់មកកម្ពុជា នៅឆ្នាំក្រោយ

14, Sep 2016 , 8:19 am

រូបភាព

ដោយ:

ភ្នំពេញ៖ ក្រុមហ៊ុនអាកាសចរឥណ្ឌាធំមួយនឹងបើកការហោះហើរត្រង់មកកម្ពុជា នៅឆ្នាំក្រោយ។ នេះបើតាមប្រសាសន៍ឯកអគ្គរដ្ឋទូតឥណ្ឌាប្រចាំកម្ពុជាលោក Naveen Srivastava។ លោកឯកអគ្គរដ្ឋទូត រំពឹងថា ការហោះហើរត្រង់រវាងឥណ្ឌា និងកម្ពុជា នឹងជំរុញកំណើនភ្ញៀវទេសចរ ពាណិជ្ជកម្ម ការវិនិយោគ និងទំនាក់ទំនងភាគីទាំងពីរ ក្នុងប្រវត្តិសាស្ត្រជាង ២ពាន់ឆ្នាំមកនេះ។

លោក Naveen Srivastava បានបង្ហើបឲ្យដឹងពីការហោះហើរ ត្រង់ពីប្រទេសឥណ្ឌាមកកាន់អាកាសយាន្តដ្ឋានអន្តរជាតិសៀមរាប មុនពេលប្រតិភូរដ្ឋាភិបាលកម្ពុជាជួបពិភាក្សាជាមួយថ្នាក់ដឹកនាំក្រសួងអាកាសចរស៊ីវិលឥណ្ឌា នៅថ្ងៃទី ១៤ និង១៥ ខែកញ្ញានេះ នៅប្រទេសឥណ្ឌា។

ឯកអគ្គរដ្ឋទូតឥណ្ឌាទើបចូលកាន់តំណែងប្រចាំកម្ពុជាបានថ្លែងបែបនេះក្នុងកម្មវិធីផ្សព្វផ្សាយបង្ហាញផ្លូវទេសចរណ៌ឥណ្ឌា (India Tourism Road Show) ដែលមានបំណងចែករំលែកបទពិសោធន៍ការងារ និងធុរៈកិច្ចក្នុងវិស័យទេសចរណ៍រវាងប្រទេសទាំងពីរ។

លោកបានថ្លែងចំពោះមុខរដ្ឋមន្ត្រីទេសចរណ៍កម្ពុជាលោក ថោង ខុន និងតំណាងក្រុមហ៊ុនទេសចរណ៍មកពីប្រទេសឥណ្ឌាជាង ២០ និងក្រុមហ៊ុនទេសចរណ៍កម្ពុជាជាង ៥០ កាលពីល្ងាចថ្ងៃទី១២ កញ្ញាថា ក្រុមហ៊ុនអាកាសចរឥណ្ឌា IndiGo នឹងហោះត្រង់មកកម្ពុជាឆ្នាំក្រោយ បន្ទាប់ពីអាជ្ញាធរភាគីទាំងពីរជជែកពិភាក្សាពីកិច្ចព្រមព្រៀងពាក់ព័ន្ធ។

«ក្រុមហ៊ុនអាកាសចរឥណ្ឌា IndiGo សម្លឹងហោះហើរត្រង់មកខេត្តសៀមរាប។ ខ្ញុំប្រាកដពួកគេនឹងបើកការហោះត្រង់មកកម្ពុជា នៅឆ្នាំក្រោយ បន្ទាប់ពីភាគីទាំងចុះកិច្ចព្រមព្រៀង ខាងមុខនេះ»។ ប្រសាសន៍លោក Naveen Srivastava។

បើតាមឯកអគ្គរដ្ឋទូតឥណ្ឌា ទេសចរឥណ្ឌាជាង ១៨លាននាក់បានធ្វើដំណើរក្រៅប្រទេស ក្នុងនោះ ឥណ្ឌាជាង ៣លាននាក់មកតំបន់អាស៊ាន និងជាង ៣ម៉ឺននាក់មកកម្ពុជា ក្នុងឆ្នាំ២០១៤ ។

ជាមួយគ្នាដែរ លោក ថោង ខុន រដ្ឋមន្ត្រីក្រសួងទេសចរណ៍ ជឿជាក់ថា ការហោះហើរត្រង់រវាងប្រទេសទាំងពីរ នឹងជំរុញកំណើនទេសចរណ៍ និងការវិនិយោគ ដើម្បីអភិឌ្ឍន៍ប្រទេសទាំងពីរថែមទៀត។

តាមលោក ថោង ខុន កម្ពុជាទទួលភ្ញៀវទេសចរអន្តរជាតិជិត ៥លាននាក់ ក្នុងឆ្នាំ ២០១៥ ។ ចំនួននេះកើនឡើង ៦ភាគរយធៀបនឹងឆ្នាំ ២០១៤ ក្នុងនោះ ភ្ញៀវទេសចរឥណ្ឌាជាង ៣ម៉ឺននាក់ កើនឡើង ២៨ភាគរយ។ រីឯរយៈពេល ៦ខែ ក្នុងឆ្នាំ២០១៦នេះ កម្ពុជាទទួល ភ្ញៀវទេសចរអន្តរជាតិចំនួន ២លាន៤សែននាក់ កើនឡើង ២,៦ភាគរយ ធៀបនឹងរយៈពេល ដូចគ្នាឆ្នាំ ២០១៥ ក្នុងនោះ ឥណ្ឌាជាង ២ម៉ឺននាក់ កើនឡើង ៣២ភាគរយ។ រដ្ឋមន្ត្រីទេសចរណ៍រំពឹងថា កម្ពុជានឹងទទួលភ្ញៀវទេសចរអន្តរជាតិជាង ៧លាននាក់ ក្នុងឆ្នាំ ២០២០ ៕