ជាតិ
សេដ្ឋកិច្ច
រដ្ឋមន្ត្រីបញ្ជាឲ្យទប់ស្កាត់ការបន្ទាបថ្លៃស្រូវ ប៉ុន្តែអ្នកជំនាញបារម្ភថាការអនុវត្តគ្មានប្រសិទ្ធភាព
× ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានណែនាំដល់មន្ត្រីក្រោមឱវាទឲ្យធ្វើអន្តរាគមន៍ជួយកសិករ ពីការបន្ទាបថ្លៃកសិផលពីសំណាក់ឈ្មួញ និងក្រុមហ៊ុនធ្វើអាជីវកម្មផលិតផលកសិកម្ម។ ការចាត់វិធានការរបស់ក្រសួងនៅពេលនេះ គឺក្រោយពីមានការត្អូញត្អែរពីកសិករលើបញ្ហាតម្លៃផលិតផលកសិកម្ម ពិសេសដំណាំស្រូវ។ ប៉ុន្តែវិធានការនេះ ត្រូវបានអ្នកជំនាញមើលឃើញថា នឹងមិនសូវផ្ដល់ប្រសិទ្ធភាពឡើយ ក្នុងប្រព័ន្ធសេដ្ឋកិច្ចទីផ្សារសេរី។
ដើម្បីរក្សាស្ថិរភាពតម្លៃកសិផល ពិសេសស្រូវ ក្រសួងកសិកម្មបានស្នើឲ្យមន្ទីរកសិកម្មខេត្តទាំងអស់ សហការជាមួយអាជ្ញាធរមូលដ្ឋាន និងស្ថាប័នពាក់ព័ន្ធ ចាត់វិធានការទប់ស្កាត់ការប្រមូលទិញកសិផលផ្ដាច់មុខពីសំណាក់ឈ្មួញនៅតាមតំបន់ ពង្រឹងសមត្ថភាពសហគមន៍កសិកម្មមូលដ្ឋានលើការប្រមូលទិញកសិផល ដើម្បីចរចារថ្លៃឲ្យបានសមស្រប។ ប្រធានមន្ទីរក៏ត្រូវចរចាជាមួយក្រុមហ៊ុនរោងម៉ាស៊ីនកិនស្រូវប្រចាំខេត្ត ដើម្បីប្រមូលទិញស្រូវពីកសិករឲ្យអស់លទ្ធភាពក្នុងតម្លៃសមរម្យ។ នេះបើតាមលិខិតរបស់ក្រសួង ដែលបញ្ជូនមកប្រធានមន្ទីរកសិកម្មរាជធានីខេត្ត នៅថ្ងៃទី១២ខែកញ្ញា។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ យល់ឃើញថាវិធានការរបស់ក្រសួងកសិកម្មនៅពេលនេះ នឹងមិនផ្ដល់ប្រសិទ្ធភាពខ្ពស់នោះទេ។ លោកថ្លែងប្រាប់សារព័ត៌មានថ្មីៗយ៉ាងដូច្នេះថា៖«ខ្ញុំយល់ថាប្រហែលមិនសូវមានប្រសិទ្ធភាពទេ ព្រោះយន្តការទីផ្សារសេរី គឺវាធំធេងខ្លាំងណាស់ អាស្រ័យលើអ្នកទិញជាចម្បង ហើយគ្មានអ្នកណាអាចបង្ខិតបង្ខំអ្នកទិញឲ្យកំណត់ថ្លៃណាមួយបានទេ»។
លោក ហ៊ុន ឡាក់ អនុប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា(CRF) បានសាទរចំពោះចំណាត់ការរបស់ក្រសួងកសិកម្ម តែលោកបញ្ជាក់ថាការឆ្លៀតឱកាសបន្ទាបថ្លៃស្រូវនេះ គឺជាសកម្មភាពរបស់ឈ្មួញមួយចំនួនតូចតែប៉ុណ្ណោះ។ «ក្រសួងដាក់វិធានការអ៊ីចឹងទៅ ជាការពញ្ញាក់មួយ តែប្រសិទ្ធភាពស៊ីសងលើមន្ត្រី បើសិនណាពួកគាត់រកចំណុចដែលកំពុងតែកើតចុងក្រោយណឹង ថាចេញពីប្រភពណា ហើយមានយន្តការទប់ស្កាត់បែបម៉េចលើបញ្ហានោះ។ ខ្ញុំយល់ថា វាជាសកម្មភាពរបស់ឈ្មួញមួយចំនួនតូចទេ»។ នេះជាការបញ្ជាក់របស់លោក ហ៊ុន ឡាក់ ។
អនុប្រធាន CRF រូបនេះ ឲ្យដឹងទៀតថា ការដែលតម្លៃស្រូវចុះថោក ជាធម្មតា គឺបណ្ដាលពីកត្តាទីផ្សារក្រៅប្រទេស។ «ការទម្លាក់តម្លៃជាទូទៅ វាកើតឡើងដោយសារអត់តម្រូវការបញ្ជាទិញពីទីផ្សារ ឬទីផ្សារជួបបញ្ហាប្រកួតប្រជែងតម្លៃជាមួយប្រទេសជិតខាង»។ លោកបានជំរុញឲ្យដ្ឋាភិបាលជួយផ្នែកដើមទុនដល់ម្ចាស់រោងម៉ាស៊ីនកិនស្រូវក្នុងការប្រមូលទិញស្រូវពីកសិករ ទន្ទឹមនឹងជួយពង្រឹងការប្រកួតប្រជែងលើទីផ្សារខាងក្រៅ ដែលនឹងលើកស្ទួយឧស្សាហកម្មស្រូវអង្ករកម្ពុជា៕
Tag:
ស្រូវ
ហ៊ុន ឡាក់
ច័ន្ទ សុផល
© រក្សាសិទ្ធិដោយ thmeythmey.com