បទយកការណ៍ / បទសម្ភាសន៍
ទេសចររុស្ស៊ីធ្លាក់ចុះខ្លាំងប៉ះពាល់ដល់សេដ្ឋកិច្ចក្រុមមគ្គុទ្ទេសក៍ លោក សាំង គីមលី មគ្គុទ្ទេសក៍ទេសចរណ៍ភាសារុស្ស៊ី
× សៀមរាប៖ ទេសចរជនជាតិរុស្ស៊ី ត្រូវបានគេមើលឃើញថា មានការធ្លាក់ចុះខ្លាំង ក្នុងរយៈពេល២ឆ្នាំចុងក្រោយនេះ។ ការធ្លាក់ចុះនេះត្រូវបានគេមើលឃើញទៀតថា បណ្តាលមកពីកត្តាសាកលលោក ក៏ដូចជាសេដ្ឋកិច្ចក្នុងប្រទេសរុស្ស៊ីផ្ទាល់។ សម្រាប់ទីផ្សារទេសចររុស្ស៊ីនៅក្នុងខេត្តសៀមរាប មគ្គុទ្ទេសក៍ទេសចរណ៍រុស្ស៊ីកំពុងមានការបារម្ភខ្លាំង ដោយសារពុំសូវមានទេសចរមកកម្សាន្ត ដែលការណ៍នេះធ្វើឲ្យប៉ះពាល់ខ្លាំងដល់សេដ្ឋកិច្ចគ្រួសាររបស់ពួកគេ។ តើមានកត្តាចំបងៗអ្វីខ្លះ ធ្វើឲ្យទេសចរជនជាតិរុស្ស៊ី ផ្អាកដំណើរកម្សាន្តមកកម្ពុជា? តើការប៉ះពាល់នេះ មានត្រឹមតែកម្ពុជាមួយទេ ឫក៏មានឥទ្ធិពលដល់ប្រទេសដទៃទៀតដែរ?
ទេសចរជនជាតិរុស្ស៊ី ស្ថិតក្នុងចំណោមទេសចរមួយចំនួន ដែលតួលេខបង្ហាញថា បានធ្លាក់ចុះក្នុងដំណើរកម្សាន្តមកកាន់ខេត្តសៀមរាប។ ការធ្លាក់ចុះនេះ គឺបានកើតឡើងពីរឆ្នាំជាប់ៗគ្នា ហើយតាមការព្យាករណ៍ ការធ្លាក់ចុះនេះនឹងបន្តរហូតដល់ឆ្នាំ២០១៨។
មគ្គុទ្ទេសក៍ភាសារុស្ស៊ី ដែលកំពុងត្អូញត្អែរពីទេសចរជនជាតិរុស្ស៊ី ដែលមានចំនួនតិចតួចនៅក្នុងខេត្តសៀមរាប។ ការធ្លាក់ចុះនេះ បើតាមការមើលឃើញរបស់ក្រុមមគ្គុទ្ទេសក៍ គឺបណ្តាលមកពីកត្តាពីរសំខាន់ៗ រួមមាន វិបត្តិសេដ្ឋកិច្ចសាកលលោក រួមនិងការធ្លាក់ចុះរាល់សេដ្ឋកិច្ចក្នុងប្រទេសរុស្ស៊ីតែម្តង ដែលធ្វើឲ្យការធ្វើដំណើរ និងការចាយវាយរបស់ពលរដ្ឋរុស្ស៊ី មានការត្បិតត្បៀត។
កាលពី៣ឆ្នាំមុន រាល់ខែកញ្ញា ដែលគេដឹងថាជាខែភ្ញៀវឡើង ឫ High Season មគ្គុទ្ទេសក៍ទេសចរណ៍ភាសារុស្ស៊ី ហាក់មមាញឹកច្រើន។ តាមការរៀបរាប់ ក្នុងមួយខែពួកគេមានភ្ញៀវដើរចន្លោះពី៤ទៅ៥ក្រុម ដែលសព្វថ្ងៃមានពី១ទៅ២ក្រុមតែប៉ុណ្ណោះ។ រាល់ការស្នាក់នៅរបស់ទេសចររុស្ស៊ីជាទូទៅនៅក្នុងខេត្តសៀមរាប ចាប់ពី២ថ្ងៃ១យប់ ខ្លះ៣ថ្ងៃ២យប់។
យ៉ាងក៏ដោយ តាមការមើលឃើញជាក់ស្តែង ការធ្លាក់ចុះរបស់ទេសចររុស្ស៊ីមិនមែនត្រឹមកម្ពុជានោះទេ តែប្រទេសថៃ និងវៀតណាម ក៏ធ្លាក់ចុះដូចគ្នា តែមានចំនួនតិចតួចបំផុត។ មគ្គុទ្ទេសក៍ពន្យល់ថា ដោយសារទាំងប្រទេសថៃ និងវៀតណាម មានទីភ្នាក់ងារទេសចរណ៍ធំៗ ពិសេសគឺមានជើងហោះហើរត្រង់ ដែលខុសពីកម្ពុជា ដែលរាល់ទេសចររុស្ស៊ី គឺត្រូវឆ្លងកាត់បណ្តាប្រទេសទាំងនោះ។
ដើម្បីលម្អិតពីបញ្ហាការធ្លាក់ចុះទេសចរជនជាតិរុស្ស៊ី ក៏ដូចជាកង្វល់របស់មគ្គុទ្ទេសក៍ទេសចរណ៍នោះ សូមស្តាប់បទសម្ភាសខ្លី រវាងអ្នកសារព័ត៌មានថ្មីៗប្រចាំខេត្តសៀមរាប និងលោក សាំង គីមលី ដែលជាមគ្គុទ្ទេសក៍ទេសចរណ៍ក្នុងតំបន់សៀមរាបដូចតទៅ៖
Tag:
ទេសចរ
មគ្គុទ្ទេសក៍ទេសចរណ៍
© រក្សាសិទ្ធិដោយ thmeythmey.com