ជាតិ
សេដ្ឋកិច្ច
ទូតឥណ្ឌូនេស៊ី៖ ឥណ្ឌូនេស៊ីអាចទិញអង្ករកម្ពុជា បើតម្លៃទាបជាងអង្ករថៃ និងវៀតណាម
រូបភាពពីហ្វេសប៊ុកក្រសួងពាណិជ្ជកម្ម (ឯកអគ្គរដ្ឋទូតឥណ្ឌូនេស៊ី)
×![]()
ភ្នំពេញ៖ ប្រទេសឥណ្ឌូនេស៊ីនឹងពិចារណាទិញអង្ករកម្ពុជា បើតម្លៃអង្ករកម្ពុជាអាចប្រកួតប្រជែងជាមួយអង្ករថៃ និងវៀតណាម។ នេះបើតាមឯកអគ្គរដ្ឋទូតឥណ្ឌូនេស៊ី ដែលថ្លែងប្រាប់អ្នកសារព័ត៌មាន ក្រោយពិធីសម្ពោធពិព័រណ៍ពាណិជ្ជកម្ម និងទេសចរណ៍ឥណ្ឌូនេស៊ី នៅថ្ងៃទី២៣ខែកញ្ញា ។
លោក Pitono Purnomo ឯកអគ្គរដ្ឋទូតឥណ្ឌូនេស៊ីប្រចាំកម្ពុជា ឲ្យដឹងថា កម្ពុជា និងប្រទេសឥណ្ឌូនេស៊ី បានចុះអនុស្សរណៈនៃការយោគយល់គ្នា(MOU) សម្រាប់ការនាំចេញអង្ករចំនួន ១សែនតោន ប៉ុន្តែការនាំចេញនេះជួបបញ្ហាតម្លៃ។ លោកគូសបញ្ជាក់ដូច្នេះថា«បញ្ហាគឺលើរឿងតម្លៃ ដែលស្ថិតក្រោមការចរចារនៅឡើយ។ វាអាស្រ័យពាណិជ្ជករកម្ពុជា ថាត្រូវធ្វើឲ្យតម្លៃមានភាពប្រកួតប្រជែងដូចម្ដេចនឹងគូប្រជែងថៃ និងវៀតណាម»។
«ខ្ញុំយល់ថា តម្លៃខ្ពស់ជាងគេ ក៏ដោយសារអង្ករកម្ពុជាមានគុណភាពខ្ពស់ ហើយចំណាយច្រើនលើថ្លៃដឹកជញ្ជូនផងដែរ»។ នេះបើតាមឯកអគ្គរដ្ឋទូតឥណ្ឌូនេស៊ីរូបនេះ ដែលបញ្ជាក់ថា ឥណ្ឌូនេស៊ី គឺជាប្រទេសប្រើប្រាស់អង្ករដ៏ធំមួយ ហើយត្រូវការនាំចូលតែប្រភេទអង្ករគុណភាពកម្រិតធម្មតាប៉ុណ្ណោះ។ លោកប្រាប់យ៉ាងដូចនេះថា៖«យើងមិនត្រូវការអង្ករគុណភាពខ្ពស់ (Premium rice) ទេ។ ហើយម្យ៉ាងយើងនាំចូលសម្រាប់ស្តុក គឺមានន័យថា ស្ថិរភាពតម្លៃ»។
លោក Pitono Purnomo បញ្ជាក់ទៀតថា៖«បើអង្ករកម្ពុជាមានតម្លៃប្រកួតប្រជែងប្រសើរ ឥណ្ឌូនេស៊ីនឹងពិចារណាទិញអង្ករកម្ពុជា ពីព្រោះយើងបាននាំចូលអង្ករពីប្រទេសថៃ និងវៀតណាមជាច្រើន»។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ បានប្រកាសនៅក្នុងកិច្ចពិភាក្សាអំពីការប្រមូលទិញស្រូវអង្ករសម្រាប់នាំចេញ នៅថ្ងៃទី១៦ខែកញ្ញា ថា ក្រសួងកំពុងធ្វើការជាមួយភាគីឥណ្ឌូនេស៊ី លើការនាំចេញអង្ករទៅប្រទេសមួយនេះ។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា(CRF) ថ្លែងថា ថ្លៃដើមផលិតអង្កររបស់កម្ពុជាខ្ពស់ ដែលមិនអាចប្រកួតប្រជែងនឹងតម្លៃអង្ករប្រទេសជិតខាង ប៉ុន្តែអង្ករកម្ពុជាមានគុណភាពល្អជាងគេ។ «ទាល់តែព្យាយាមកាត់ថ្លៃដើមឲ្យអស់លទ្ធភាព នោះហើយយើងអាចឆ្លើយតបនឹងកិច្ចសន្យាប្រទេសទាំងពីរបាន។ ចំណុចទី២ គេអាចឲ្យយើងថ្លៃជាងអង្ករប្រទេសជិតខាង ព្រោះអង្ករយើងស្ដង់ដារខ្ពស់ជាង»។ នេះបើតាមអនុប្រធាន CRF រូបនេះ ដែលអះអាងថា ការនាំចេញអង្ករធម្មតាជួបការប្រកួតប្រជែងខ្ពស់ និងទទួលផលចំណេញតិច ជាងការនាំចេញអង្ករគុណភាពខ្ពស់។
ពាណិជ្ជកម្មប្រទេសទាំងពីរសម្រេចបានទឹកប្រាក់ ៤៥០លានដុល្លារក្នុងឆ្នាំ២០១៥ ។ ឥណ្ឌូនេស៊ីនាំចូលមកកម្ពុជាចំនួន ៤៣៥ លានដុល្លារ លើផលិតផលសម្លៀកបំពាក់ គ្រឿងបំលាស់ សារធាតុគីមី ផលិតផលវិជ្ជសាស្ត្រ និងថ្នាំជក់ ខណៈកម្ពុជានាំចេញសម្លៀកបំពាក់ និងផលិតផលបរិភោគ។ នេះបើតាមរបាយការណ៍ស្ថានទូតឥណ្ឌូនេស៊ី៕
Tag:
អង្ករ
ទូតឥណ្ឌូនេស៊ី
ហ៊ុន ឡាក់
© រក្សាសិទ្ធិដោយ thmeythmey.com
