អន្តរជាតិ
លោក Duterte បង្ហាញជំហរងាកទៅរករុស្សីនិងចិនកាន់តែខ្លាំង
× ទំនាក់ទំនងការទូតរវាងអាមេរិក និងហ្វីលីពីន ធ្លាក់ចុះខ្លាំង ក្រោយការរិះគន់ឥតសំចៃមាត់របស់រដ្ឋាភិបាលអាមេរិក លើយុទ្ធនាការបោសសម្អាតគ្រឿងញៀននៅហ្វីលីពីន ដែលសម្លាប់មនុស្សច្រើនជាងបីពាន់នាក់មកហើយ។ ជាមួយនឹងការធ្លាក់ចុះនេះ ហ្វីលីពីន ក៏បង្ហាញជំហរងាកចេញពីអាមេរិក ដែលជាសម្ព័ន្ធមិត្តរាប់សិបឆ្នាំ និងបោះដៃទៅរកមហាអំណាចរុស្សី និងចិនទៅវិញ។
បន្ទាប់ពីទំនាក់ទំនងជាមួយអាមេរិកកាន់តែរង្គោះរង្គើមកនោះ ប្រធានាធិបតីហ្វីលីពីន លោក Rodrigo Duterte កំពុងកាច់ចង្កូតនយោបាយការបរទេសរបស់ហ្វីលីពីន ងាកទៅមហាអំណាចពីរទៀត គឺរុស្សី និងចិន បើទោះជាកន្លងមក លោកធ្លាប់អះអាងថា ហ្វីលីពីននឹងអនុវត្តគោលនយោបាយការបរទេសឯករាជ្យក៏ដោយចុះ។ យ៉ាងណាក្ដី សម្ព័ន្ធភាពថ្មីនេះ នឹងផ្ដោតតែលើសេដ្ឋកិច្ចប៉ុណ្ណោះ។
ក្នុងសន្និសីទកាសែតនៅថ្ងៃទី២៦ ខែកញ្ញា លោក Duterte និយាយថា លោកបានជួបជាមួយនាយករដ្ឋមន្ត្រីរុស្សី លោក ឌីមីទ្រី ម៉េដវ៉េដេវ (Dmitri Medvedev) ក្នុងអំឡុងពេលនៃកិច្ចប្រជុំអាស៊ានក្នុងទីក្រុងវៀងចន្ទន៍ ដោយលោកបាននិយាយពីទំនាក់ទំនងប្រទេសទាំងពីរ។ លោក Duterte ថា លោក បានប្រាប់លោក ម៉េដវ៉េដេវ ថា ទំនាក់ទំនងរវាងហ្វីលីពីន និងអាមេរិក នឹងឈានដល់ចំណុចមិនអាចបកក្រោយបាន យ៉ាងហោចណាស់ក៏៦ឆ្នាំដែរ។
ក្នុងជំនួបនៅឡាវ ប្រធានាធិបតីហ្វីលីពីនបញ្ជាក់ថា លោកត្រូវការរុស្សីគ្រប់បែបយ៉ាង ទាំងពាណិជ្ជកម្ម និងការដោះដូរទំនិញ ហើយលោកនឹងបើកចំហចំពោះរឿងនេះ។ ប៉ុន្តែការដែលទំនាក់ទំនងអាមេរិក និងហ្វីលីពីន មកដល់ចំណុចមិនអាចបកក្រោយបាន មិនមានន័យថា ហ្វីលីពីន ផ្ដាច់ទំនាក់ទំនងជាមួយមហាអំណាចពិភពលោកមួយនេះឡើយ។ លោកពន្យល់ថា លោក គ្រាន់តែបើកចំហសម្រាប់ទទួលរុស្សី និងចិនប៉ុណ្ណោះ។
យោងតាមសារព័ត៌មាន Rappler លោក Duterte បានលើកឡើងពីសន្ធិសញ្ញាការពារជាមួយអាមេរិក ដែលលោករកឃើញថា មានបញ្ហា ព្រោះគ្មានការធានាណាមួយថា អាមេរិកនឹងមកជួយហ្វីលីពីនពេលមានសង្គ្រាម។ លោកបន្តថា៖ «សន្ធិសញ្ញាគ្រាន់តែបញ្ជាក់ថា ការវាយប្រហារលើហ្វីលីពីន ជាការវាយប្រហារលើអាមេរិក។ ប៉ុន្តែរដ្ឋធម្មនុញ្ញអាមេរិកក៏ចែងថា ប្រធានាធិបតីអាចប្រកាសសង្គ្រាមដើម្បីជួយសម្ព័ន្ធមិត្ត តែត្រូវការអនុញ្ញាតពីសភាជាមុនសិន។ ចុះបើសភាមិនព្រម ហ្វីលីពីននឹងទៅជាយ៉ាងណា?»
យ៉ាងណាមិញ ការបើកចំហដាក់រុស្សី និងចិនដែលលោក Duterte លើកឡើងនោះ នឹងផ្ដោតសំខាន់លើសម្ព័ន្ធភាពសេដ្ឋកិច្ច មិនមែនសម្ព័ន្ធមិត្តយោធាឡើយ។ លោក បញ្ជាក់ច្បាស់ថា ហ្វីលីពីន នឹងបើកចំហសម្រាប់ការរកស៊ីពាណិជ្ជកម្មប៉ុណ្ណោះ ហើយសម្ព័ន្ធភាពយោធា នឹងមិនមានជាដាច់ខាត។
បើទោះជាមិនមានសម្ព័ន្ធភាពយោធាក្ដី នៅមុននេះ លោក Duterte ក៏បានណែនាំមន្ត្រីក្រសួងការពារជាតិហ្វីលីពីន ឲ្យសម្លឹងមើលទីផ្សារអាវុធរបស់ចិន និងរុស្សី ដើម្បីបង្កើនឥទ្ធិពលរបស់យោធាខ្លួន និងអះអាងថា ក្រុងប៉េកាំងចង់ឲ្យយន្តហោះលោកទៀតផង។ លោកបញ្ជាក់ដែរថា កិច្ចព្រមព្រៀងទិញអាវុធកំពុងស្ថិតក្នុងដំណើរការ ហើយការសំណើលក់អាវុធ ក៏មានជាបន្តបន្ទាប់ដែរ៕
Tag:
ហ្វីលីពីន
រុស្សី
អាមេរិក
ចិន
© រក្សាសិទ្ធិដោយ thmeythmey.com