ជាតិ
កើតសំរាមច្រើននៅភ្នំពេញជាកំហុសនរណា? នេះ គឺជាកង្វល់របស់អ្នកសារព័ត៌មាន
× ភ្នំពេញ៖ ប្រធានបទ សំរាម ទឹកលូ បង្គន់ ព្រៃឈើ ខ្សាច់ ត្រូវបាននិពន្ធនាយកសារព័ត៌មានលើកឡើងច្រើននៅក្នុងវេទិកានិពន្ធនាយកសារព័ត៌មានស្តីពីការគាំពារបរិស្ថាននៅក្នុងប្រទេសកម្ពុជា និងតំបន់ទន្លេមេគង្គកាលពីថ្ងៃព្រហស្បតិ៍ទី៦ខែតុលាឆ្នាំ២០១៦នេះ។ ក្រៅពីប្រធានបទបរិស្ថានផ្សេងៗ បញ្ហាសំរាម ត្រូវបានអ្នកសារព័ត៌មានលើកឡើងច្រើន តែទំនងជាពិបាករកដំណោះស្រាយ។
បើទោះបីជាមិននិយាយចំៗក៏ដោយ ក៏លោក សាយ សំអាល់ រដ្ឋមន្ត្រីក្រសួងបរិស្ថាននៅតែមានក្តីបារម្ភជុំវិញរឿងសំរាម និងរឿងទឹកលូដែលនៅបន្តរំខានអារម្មណ៍ពលរដ្ឋជាទូទៅ និងជាពិសេស នៅទីក្រុងភ្នំពេញ។ ការលើកឡើងរបស់លោករដ្ឋមន្ត្រីបានធ្វើឡើងនៅក្នុងវេទិកានិពន្ធនាយកសារព័ត៌មានស្តីពីការគាំពាបរិស្ថាននៅព្រឹកថ្ងៃព្រហស្បតិ៍ទី៦ខែតុលាឆ្នាំ២០១៦ ។ បន្ទាប់ពីលោករដ្ឋមន្ត្រីបញ្ចប់បទអន្តរាគមន៍ភ្លាម ប្រធានបទរឿងសំរាម ត្រូវបានអ្នកសារព័ត៌មានជជែកគ្នាច្រើន។
តំណាងសារព័ត៌មានខ្លះ ស្តីបន្ទោសលើពលរដ្ឋដែលមិនសូវមានចរិតល្អ ចូលចិត្តបោះសំរាមចោលគ្មានទិសដៅ។ អ្នកសារព័ត៌មានខ្លះ ស្តីបន្ទោសអាជ្ញាធរដែលមិនអាចរៀបចំកន្លែងទុកដាក់សំរាមឲ្យបានគ្រប់គ្រាន់ដើម្បីអនុញ្ញាតឲ្យពលរដ្ឋទុកដាក់សំរាមឲ្យមានសណ្តាប់ធ្នាប់។ អ្នកសារព័ត៌មានខ្លះស្តីបន្ទោសអ្នករើសអេតចាយចូលចិត្តកាយកញ្ចប់សំរាម ឬធុងសំរាមដែលជាមូលហេតុធ្វើឲ្យសំរាមធ្លាក់ចេញពីធុង ឬកញ្ចប់។
អ្នកចូលរួមផ្សេងទៀតដែលមកពីអង្គការក្រៅរដ្ឋាភិបាល បានស្តីបន្ទោសអាជ្ញាធរ អ្នកប្រមូល និងប្រជាពលរដ្ឋតែម្តងទាក់ទងទៅនឹងរឿងវត្តមានសំរាមនៅក្នុងរាជធានីភ្នំពេញនេះ។ ក្រៅពីរឿងសំរាម អ្នកសារព័ត៌មានផ្សេងទៀត អំពាវនាវឲ្យអាជ្ញាធររាជធានីភ្នំពេញបង្កើតបង្គន់សាធារណៈឲ្យបានច្រើន ចៀសវាងកុំឲ្យអ្នកធ្វើដំណើរបត់ជើងតូចផ្តេសផ្តាសនៅតាមទីសាធារណៈនៅក្នុងក្រុងភ្នំពេញ៕
© រក្សាសិទ្ធិដោយ thmeythmey.com