សម្លៀកបំពាក់ពណ៌ខ្មៅកំពុងឡើងថ្លៃ ខណៈប្រជាជនថៃកំពុងកាន់ទុក្ខ

សង្គមអន្តរជាតិ

អន្តរជាតិ

សម្លៀកបំពាក់ពណ៌ខ្មៅកំពុងឡើងថ្លៃ ខណៈប្រជាជនថៃកំពុងកាន់ទុក្ខ

16, Oct 2016 , 10:05 am

រូបភាព

ដោយ: តន ចាន់រិទ្ធារ៉ា

បន្ទាប់ពីទទួលដំណឺងនៃការសោយទិវង្គតនៃព្រះចៅ ភូមិបុល អាឌុលយ៉ាដេត (Bhumibol Adulyadej) និងការប្រកាសកាន់ទុក្ខមកនោះ ប្រជាជនថៃជាច្រើន បានសម្រុកទៅរកទិញសម្លៀកបំពាក់ខ្មៅសម្រាប់ការកាន់ទុក្ខ ដែលធ្វើឲ្យសម្លៀកបំពាក់ពណ៌ខ្មៅអស់ពីស្តុកយ៉ាងរហ័ស។ តម្លៃសម្លៀលបំពាក់ពណ៌ខ្មៅ ក៏ឡើងថ្លៃភ្លាមៗ ដោយសារតម្រូវការកើនឡើងនោះ តែអាជ្ញាធរថៃ ក៏បានចេញវិធានការទប់ស្កាត់ការឡើងថ្លៃហួសហេតុរួចហើយដែរ។

ប៉ុន្មានថ្ងៃមុនមហាក្សត្រថៃ ភូមិបុល អាឌុលយ៉ាដេត ចូលទិវង្គត តម្រូវការសម្លៀកបំពាក់ពណ៌ផ្កាឈូក បានកើនឡើងយ៉ាងខ្លាំង ព្រោះប្រជាជនថៃនាំគ្នាស្លៀកសម្លៀកបំពាក់ពណ៌នេះ ដើម្បីថ្វាយព្រះពរដល់មហាក្សត្រដែលមានព្រះឈួន។ នៅពេលនោះ ប្រជាជនថៃ មិនបានបម្រុងទុកសម្លៀកបំពាក់ខ្មៅឡើយ ប៉ុន្តែក្រោយមហាក្សត្រសុគតនោះ តម្រូវការសម្លៀកបំពាក់ពណ៌ខ្មៅ កើនឡើងខ្លាំង រីឯតម្លៃក៏ឡើងតាមនឹងដែរ។

ការផ្គត់ផ្គង់មិនគ្រប់គ្រាន់ និងការកើនឡើងនៃតម្រូវការនោះ ធ្វើឲ្យតម្លៃសម្លៀកបំពាក់ពណ៌ខ្មៅកើនឡើងយ៉ាងឆាប់រហ័ស ដោយសារប្រជាជនត្រូវការសម្លៀកបំពាក់ពណ៌នេះ សម្រាប់កាន់ទុក្ខព្រះមហាក្សត្រ។ នៅឯផ្សារ Bobae ក្នុងទីក្រុងបាងកក អាវប៉ូឡូពណ៌ខ្មៅគ្មានម៉ាក ដែលធ្លាប់តែលក់ក្នុងតម្លៃចន្លោះ៨០ ទៅ១២០បាត (ស្មើ២ដុល្លារ ទៅ៣ដុល្លារ) នោះ ត្រូវបានលក់ក្នុងតម្លៃ៣០០បាត (៨.៥ដុល្លារ) រីឯអាវលាតពណ៌ខ្មៅមានតម្លៃ៤ដុល្លារ។

យោងតាមសារព័ត៌មាន Channel NewsAsia ក្រសួងពាណិជ្ជកម្មថៃ ក៏បានចេញវិធានការទប់ស្កាត់ការឡើងថ្លៃផងដែរ។ ក្រសួងពាណិជ្ជកម្មថៃ បានណែនាំឲ្យសាធារណជនដាក់ពាក្យបណ្ដឹង ប្រសិនបើពួកគេត្រូវចំណាយច្រើនជាង២៥០បាត (ស្មើ៧ដុល្លារ) សម្រាប់អាវប៉ូឡូពណ៌ខ្មៅគ្មានម៉ាកនោះ។ អ្នកលក់ណាក៏ដោយ អាចប្រឈមមុខនឹងការជាប់ពន្ធនាគារដល់ទៅ៧ឆ្នាំ ឬក៏ត្រូវពិន័យជាប្រាក់១៤០០០០បាត (ស្មើនឹង៣៩០០ដុល្លារ) ឬក៏ពិន័យទាំងពីរ សម្រាប់ការលក់ដំឡើងថ្លៃហួសហេតុនោះ។

ប្រភពព័ត៌មានដដែលបន្តថា កង្វះសម្លៀកបំពាក់ពណ៌ខ្មៅ នឹងត្រូវដោះស្រាយក្នុងពេលខ្លីខាងមុខ ខណៈដែលរោងចក្រ នឹងបង្កើនការផលិតសម្លៀកបំពាក់ពណ៌ខ្មៅឲ្យបានច្រើនថែមទៀត សម្រាប់បំពេញតម្រូវការ ដែលកំពុងហក់ឡើងខ្លាំង។ នេះក៏ដោយសារតែការកាន់ទុក្ខព្រះមហាក្សត្រ ភូមិបុល អាឌុលយ៉ាដេត នឹងត្រូវធ្វើឡើងរយៈពេលយូរទៅទៀត។

សូមរម្លឹកថា ក្រោយការប្រកាសព័តមាននៃការសោយទិវង្គតមក រាជវាំងថៃប្រកាសថា មន្ត្រីរដ្ឋាភិបាល និងបុគ្គលិកក្រុមហ៊ុនរដ្ឋទាំងអស់ តម្រូវឲ្យស្លៀកសម្លៀកបំពាក់ពណ៌ខ្មៅរយៈពេល១០០ថ្ងៃ។ ហើយទង់ជាតិថៃ ក៏នឹងត្រូវបង្ហូតត្រឹមពាក់កណ្ដាលដងរយៈពេល៣០ថ្ងៃនៅទូទាំងប្រទេសដែរ៕