ជាតិ
នយោបាយជាតិ
មេធាវីថា តុលាការ មិនគួរកោះហៅ ឯកឧត្តម សម រង្ស៊ី ដោយប្រញាប់ប្រញាល់នោះទេ
× ភ្នំពេញ៖ នៅថ្ងៃទី២១ ខែតុលា ឆ្នាំ២០១៦នេះ គឺជាកាលបរិច្ឆេទ ដែលតុលាការ តម្រូវឲ្យឯកឧត្តម សម រង្ស៊ី ប្រធានគណបក្សសង្គ្រោះជាតិ ចូលបំភ្លឺ ក្នុងករណីថ្មីមួយផ្សេងទៀត។ យ៉ាងណា ឯកឧត្តម សម រង្ស៊ី មិនអាចចូលទៅកាន់តុលាការ តាមដីកានោះទេ ដោយសារតែមេបក្សប្រឆាំងរូបនេះ កំពុងរស់នៅឯបរទេស។
ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាកោះហៅ ឯកឧត្តម សម រង្ស៊ី ឲ្យចូលទៅបំភ្លឺពីដំណើរឿង «ញុះញង់ បង្កចលាចល ប៉ះពាល់ដល់សន្តិសុខសង្គម»។ នេះជារឿងក្តីមួយផ្សេងទៀត ដែលព្រះរាជអាជ្ញាទើបតែចាប់ផ្តើមស៊ើបអង្កេត លើឯកឧត្តម សម រង្ស៊ី។
លោក សំ សុគង់ មេធាវីរបស់ឯកឧត្តម សម រង្ស៊ី បានប្រាប់សារព័ត៌មានថ្មីៗនៅព្រឹកថ្ងៃសុក្រនេះថា ព្រះរាជអាជ្ញា ពឹងផ្អែកលើរបាយការណ៍ពីសមត្ថកិច្ច ក្នុងការស៊ើបអង្កេតក្នុងរឿងក្តីខាងលើ។ លោក សំ សុគង់ បន្តថា អង្គហេតុ ដែលសមត្ថកិច្ច បញ្ជូនទៅព្រះរាជអាជ្ញា គឺទាក់ទងនឹងសារនយោបាយរបស់ឯកឧត្តម សម រង្ស៊ី ដែលបានថ្លែងនៅក្នុងវត្តខ្មែរមួយ ក្នុងប្រទេសបារាំង កាលពីថ្ងៃទី១១ ខែកញ្ញា ឆ្នាំ២០១៦។
យ៉ាងណាក៏ដោយ លោក សំ សុគង់ សូមមិនបញ្ជាក់ពីភាសានយោបាយរបស់ឯកឧត្តម សម រង្ស៊ី ត្រង់ចំណុចណាមួយ ដែលបណ្តាលឲ្យព្រះរាជអាជ្ញា ចាប់ផ្តើមស៊ើបអង្កេតនោះទេ។ លោក គ្រាន់តែបង្ហើបថា សារនយោបាយ ដែលឯកឧត្តម សម រង្ស៊ី ថ្លែងនៅប្រទេសបារាំងនេះឯង ដែលព្រះរាជអាជ្ញ យកធ្វើជាមូលដ្ឋានក្នុងការស៊ើបអង្កេត។
«ខ្ញុំមិននិយាយទេថា សម្តីរបស់គាត់ (ឯកឧត្តម សម រង្ស៊ី) ត្រង់ណា ដែលធ្វើឲ្យព្រះរាជអាជ្ញាចាប់ផ្តើម ស៊ើបអង្កេត នោះទេ។ ខ្ញុំមិនអាចនិយាយពេលនេះបានទេ ព្រោះជាដំណាក់កាលនៃការស៊ើបអង្កេត ដូច្នេះបើខ្ញុំនិយាយទៅ នឹងប៉ះពាល់ ដល់ការស៊ើបអង្កេត។ នេះជាការពន្យល់របស់ លោក សំ សុគង់។
លោកមេធាវីខាងលើ ហាក់ដូចជាហួសចិត្ត នៅពេលដែលព្រះរាជអាជ្ញា កោះហៅឯកឧត្តម សម រង្ស៊ី យ៉ាងប្រញាប់ប្រញាល់បែបនេះ។ លោក បញ្ជាក់ថា ព្រះរាជអាជ្ញា ក៏ដឹងយ៉ាងច្បាស់ដែរ ថាឯកឧត្តម សម រង្ស៊ី កំពុងរស់នៅឯបរទេស ដោយមិនអាចចូលទៅបំភ្លឺតាមការកោះហៅក្នុងកាលៈទេសៈ នេះទេ។
សូមបញ្ជាក់ថា ឯកឧត្តម សម រង្ស៊ី កំពុងរងបណ្តឹងជាច្រើន ពីថ្នាក់ដឹកនាំរបស់គណបក្សប្រជាជនកម្ពុជា។ មេដឹកនាំបក្សកាន់អំណាច ដែលបានប្តឹងឯកឧត្តម សម រង្ស៊ី មានដូចជា សម្តេច ហ៊ុន សែន សម្តេច ហេង សំរិន និងលោក ហោ ណាំហុង ជាដើម។ ចំពោះបណ្តឹង ដែលប្តឹងដោយលោក ហោ ណាំហុង អតីតរដ្ឋមន្ត្រីនៃក្រសួងការបរទេស ត្រូវបានតុលាការ កាត់ទោសរួចទៅហើយ ដោយឲ្យឯកឧត្តម សម រង្ស៊ី ជាប់ពន្ធនាគាររយៈពេល២ឆ្នាំ ពីបទ «បរិហារកេរ្តិ៍ជាសាធារណៈ»៕
Tag:
សម រង្ស៊ី
តុលាការ
មេធាវី
© រក្សាសិទ្ធិដោយ thmeythmey.com