ជាតិ
ADB សន្យាជួយសង់ប្រឡាយ៥ខ្សែ នៅខេត្តសៀមរាប ឧត្តរមានជ័យ និងបន្ទាយមានជ័យ រូបថត៖ ហ្វេសប៊ុកក្រសួងធនធានទឹក និងឧតុនិយម
× ភ្នំពេញ៖ ឆ្លើយតបចំពោះសំណើរបស់ លោក ចាន់ ស៊ីណាត អគ្គនាយកកិច្ចការបច្ចេកទេសរបស់ ក្រសួងធនធានទឹក និងឧតុនិយម ធនាគារអភិវឌ្ឍន៍អាស៊ី(ADB) បានយល់ព្រមជួយសង់ប្រឡាយចំនួន៥ខ្សែ នៅក្នុងខេត្តសៀមរាប ឧត្តរមានជ័យ និងខេត្តបន្ទាយមានជ័យ។ ការជួយសង់ប្រឡាយនេះ គឺដើម្បីរំដោះទឹក និងស្រោចស្រព បម្រើដល់វិស័យកសិកម្មនៅក្នុងខេត្តទាំងបីខាងលើនេះ។
ធនាគារអភិវឌ្ឍន៍អាស៊ី(ADB) បានសម្រេចជួយសាង់សង់ប្រឡាយចំនួន៥ខ្សែ រួមមាន៖ ប្រឡាយរំ ដោះទឹក និងស្រោចស្រព ០១ ខ្សែ ប្រវែង ៦ គីឡូម៉ែត្រ ស្ថិតក្នុងប្រព័ន្ធធារាសាស្ត្រអាងត្រពាំងថ្ម ខេត្តបន្ទាយមានជ័យ ប្រឡាយ ០១ ខ្សែប្រវែង ៣.៥០០ ម៉ែត្រ ស្ថិតក្នុងប្រព័ន្ធធារាសាស្ត្រទំនប់អូរអង្ក្រង ខេត្តឧត្តរមានជ័យ និងប្រឡាយ០៣ ខ្សែទៀត ដែលមានប្រវែងសរុប ៧ គីឡូម៉ែត្រ ស្ថិតក្នុងប្រព័ន្ធធារាសាស្ត្រទំនប់គោកស្រុក ខេត្តសៀមរាប ព្រមទាំងជួយសង់ស្ពានបេតុង ប្រវែង ៩០ ម៉ែត្រ ចំនួន ០១ កន្លែង នៅទំនប់គោកស្រុក ខេត្តសៀមរាបផងដែរ។ ការជួយសង់ប្រឡាយទាំង៦ខ្សែរបស់ធនាគារអភិវឌ្ឍន៍អាស៊ីនៅពេលនេះ គឺបន្ទាប់ពីលោក ចាន់ ស៊ីណាត អគ្គនាយកកិច្ចការបច្ចេកទេស របស់ក្រសួងធនធានទឹក និងឧតុនិយម បានស្នើសុំទៅADB កាលអំឡុងដំណើរទស្សនកិច្ចរបស់ADB ភាគីអូស្ត្រាលី និងក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យមើលប្រព័ន្ធធារាសាស្ត្រនានា នៅខេត្តសៀមរាប ឧត្តរមានជ័យ និងខេត្តបន្ទាយមានជ័យ កាលពីថ្ងៃទី១៨ដល់ថ្ងៃទី២១ ខែតុលា ឆ្នាំ២០១៦។ នេះបើយោងតាមទំព័រហ្វេសប៊ុករបស់ក្រសួងធនធានទឹក និងឧតុនិយម ចេញផ្សាយកាលពីថ្ងៃទី២០ ខែតុលា ឆ្នាំ២០១៦។
គេរំពឹងថា ប្រព័ន្ធប្រឡាយទាំង៦នេះ នឹងអាចជួយរំដោះទឹកជំនន់ និងទប់ទឹកសម្រាប់ស្រោចស្រពវិស័យកសិកម្ម ដែចអាចជួយលើកស្ទួយសេដ្ឋកិច្ចគ្រួសាររបស់ពលរដ្ឋនៅខេត្តទាំង ៣ខាងលើ ឲ្យបានប្រសើរផងដែរ៕
Tag:
ADB
ចាន់ ស៊ីណាត
ទំនប់ប្រឡាយ
© រក្សាសិទ្ធិដោយ thmeythmey.com