កីឡាជាតិ
ជាតិ
AFF Suzuki Cup៖ កម្ពុជាប៉ះទីម័រខាងកើតនៅអូឡាំពិក ខណៈឡាវជួបព្រុយណេ នៅ RSN
× ក្រុមជម្រើសជាតិកម្ពុជានឹងបើកទ្វារកីឡដ្ឋានជាតិស្វាគមន៍ក្រុមភ្ញៀវទីម័រខាងកើតក្នុងជំនួបចុងក្រោយនៃវគ្គជម្រុះពានរង្វាន់ AFF Suzuki Cup 2016 នាវេលាម៉ោង៦:៣០ល្ងាចនេះ។ ចំណែកក្រុមឡាវត្រូវតទល់ជាមួយក្រុមព្រុយណេនាវេលាម៉ោង៦:៣០នាទីនៅកីឡដ្ឋានRSN។
ក្រោយពីយកឈ្នះពីរប្រកួតជាប់ៗគ្នាលើក្រុមឡាវ និងព្រុយណេ ដោយលទ្ធផល ២-១ និង៣-០ កាលពីពេលថ្មីៗនេះ ក្រុមជម្រើសជាតិកម្ពុជាត្រូវស្វាគមន៍ក្រុមភ្ញៀវទីម័រខាងកើត នៅពហុកីឡដ្ឋានជាតិ នាវេលាម៉ោង៦ កន្លះ ល្ងាចថ្ងៃទី២១ ខែតុលា។ នេះជាជំនួបចុងក្រោយ ហើយក៏ជាការប្រកួតដ៏សំខាន់សម្រាប់កម្ពុជា ឈានឆ្ពោះទៅកាន់វគ្គបន្ត នៃពានរង្វាន់ AFF Suzuki Cup 2016។
បើតាមប្រវត្តិនៃការជួបគ្នាតាំងពីឆ្នាំ២០០៨-២០១៦ ក្រុមទាំងពីរធ្លាប់ជួបគ្នា៤ដងក្នុងវគ្គជម្រុះ AFF Suzuki Cup និង១ដងក្នុងជំនួបមិត្តភាពអន្តរជាតិ ក្នុងនោះកម្ពុជាឈ្នះ៣ លើក ចាញ់១លើក និងស្មើ១លើក។ នៅឆ្នាំ២០១៦ ក្នុងជំនួបមិត្តភាពអន្តរជាតិនៅពហុកីឡដ្ឋានជាតិ កម្ពុជាបានយកឈ្នះទីម័រក្នុងលទ្ធផល ២-០។
នៅឆ្នាំ២០១៤ ក្នុងវគ្គជម្រុះ AFF Suzuki Cup កម្ពុជាបានយកឈ្នះ ៣-២ លើទីម័រខាងកើតនៅទឹកដីឡាវ។ ឆ្នាំ២០១២ កម្ពុជាបានចាញ់ទីម័រខាងកើតយ៉ាងដំណំ ៥-១ ក្នុងជម្រុះពានរង្វាន់ AFF Suzuki Cup នៅមីយ៉ាន់ម៉ា។ ឆ្នាំ២០១០ កម្ពុជាឈ្នះទីម័រ ៤-២ ក្នុងវគ្គជម្រុះ AFF Suzuki Cup នៅឡាវ។ ឆ្នាំ២០០៨ កម្ពុជាបានត្រឹមស្មើទីម័រ ២-២ ក្នុងវគ្គជម្រុះ AFF Suzuki Cup នៅទឹកដីកម្ពុជា។
ជាមួយគ្នានេះ នៅម៉ោង៦:៣០នាទីនៅកីឡដ្ឋាន RSN ក្រុមជ្រើសជាតិឡាវ ត្រូវតទល់ជាមួយក្រុមព្រុយណេ ដែលជាជំនួបចុងក្រោយផងដែរ៕
Tag:
បាល់ទាត់
AFF Suzuki Cup 2016
© រក្សាសិទ្ធិដោយ thmeythmey.com