សម្តេច ហ៊ុន សែន នឹងចូលរួមកិច្ចប្រជុំកំពូលចំនួន៣នៅវៀតណាម

ជាតិ

សម្តេច ហ៊ុន សែន នឹងចូលរួមកិច្ចប្រជុំកំពូលចំនួន៣នៅវៀតណាម

23, Oct 2016 , 7:30 pm

រូបភាព

សម្តេច ហ៊ុន សែន ពេលទៅបំពេញបេសកកម្មក្រៅប្រទេសកន្លងមក

ដោយ: ថ្មីៗ

សម្តេច ហ៊ុន សែន នឹងដឹកនាំគណៈប្រតិភូ ទៅចូលរួមកិច្ចប្រជុំកំពូលកម្ពុជា ឡាវ មីយ៉ាន់ម៉ា និងវៀតណាម (CLMV)លើកទី៨ កិច្ចប្រជុំកំពូលយុទ្ធសាស្ត្រនៃកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ (ACMECS)លើកទី៧ និងវេទិកាសេដ្ឋកិច្ចពិភពលោកស្តីពីតំបន់មេគង្គ នៅក្រុងហាណូយ ប្រទេសវៀតណាម។ កិច្ចប្រជុំទាំងនេះ នឹងប្រព្រឹត្តទៅ ពីថ្ងៃទី២៤-២៦ ខែតុលាខាងមុខ។

បើតាមសេចក្តីជូនព័ត៌មានរបស់ក្រសួងការបរទេសកម្ពុជា ប្រមុខរដ្ឋាភិបាលកម្ពុជា និងថ្លែងបទអន្តរាគមន៍នៅក្នុងកិច្ចប្រជុំទាំង៣នេះ។

កិច្ចប្រជុំកំពូល CLMV លើកទី៨ នឹងពិភាក្សាលើប្រធានបទ «ចាប់យកឱកាស កសាងអនាគត»ហើយកិច្ចប្រជុំកំពូល ACMECS លើកទី៧ នឹងផ្តោតលើប្រធានបទ«ឆ្ពោះទៅរកតំបន់អនុតំបន់មេគង្គប្រកបដោយថាមភាព និងវិបុលភាព»។ នេះជាការបញ្ជាក់នៅក្នុងសេចក្តីជូនព័ត៌មានដដែល ដែលបន្តថា ថ្នាក់ដឹកនាំនៃប្រទេសកម្ពុជា ឡាវ មីយ៉ាន់ម៉ា និងវៀតណាម នឹងឆ្លៀតយកឱកាសនៃកិច្ចប្រជុំនៅហាណូយនេះ ចូលរួមជាមួយថ្នាក់ដឹកនាំនៃប្រទេសតំបន់មេគង្គផ្សេងទៀត ក្នុងវេទិកាសេដ្ឋកិច្ចស្តីពីតំបន់មេគង្គ ដែលនឹងផ្តោតលើប្រធានបទ«ការស្វែងរកជោគជ័យរួមគ្នា ក្នុងតំបន់មេគង្គ»។

សេចក្តីថ្លែងការណ៍រួមស្តីពីកិច្ចប្រជុំកំពូល CLMV លើកទី៨ និងសេចក្តីថ្លែងការណ៍ទីក្រុងហាណូយ ស្តីពីកិច្ចប្រជុំកំពូល ACMECS លើកទី៧ នឹងត្រូវអនុម័តនៅចុងបញ្ចប់នៃកិច្ចប្រជុំ នីមួយៗ៕