អន្តរជាតិ
បារាំង៖ កូនភ្លោះ៥គូរៀននៅក្នុងសាលាមតេយ្យជាមួយគ្នាដោយចៃដន្យ
× សាលាមតេយ្យ Lavault-Sainte-Anne នៅតំបន់ Montluçon ប្រទេសបារាំង ទទួលបានសិស្ស១០នាក់យ៉ាងចៃដន្យ។ សិស្សតូចៗទាំង១០នាក់នោះ គឺជាកូនភ្លោះ៥គូដែលមកពីគ្រួសារផ្សេងៗគ្នា។ នេះបើតាមការផ្សាយរបស់កាសែត La Montagne។
ស្ថិតក្នុងតំបន់ Montluçon ដែលមានមនុស្សប្រមាណជាង១០០០នាក់ សាលាមតេយ្យ Lavault-Sainte-Anne បានក្លាយជាករណីមួយដែលមិនធ្លាប់មានពីមុននៅប្រទេសបារាំង។ សាលាខ្នាតតូចមួយនេះ បានទទួលសិស្សថ្មីដែលកូនភ្លោះរហូតដល់ទៅ៥គូ អាយុចន្លោះពី២ទៅ៣ឆ្នាំ សម្រាប់ឆ្នាំសិក្សាថ្មី។
បើតាមកាសែត La Montagne ករណីនេះ ជាកំណត់ត្រាថ្មីមួយនៅបារាំង ដែលកាលពីឆ្នាំ២០១៤ សាលា Eure-et-Loir ធ្លាប់ទទួលសិស្សដែលជាកូនភ្លោះចំនួន៤គូ ដោយចៃដន្យ។
លោកស្រី Michèle Canova គ្រូបង្រៀនដែលមានបទពិសោធន៍បង្រៀនជាង៣៤ឆ្នាំ បានអះអាងថា លោកស្រី បានជួបករណីនេះជាលើកដំបូង។ លោកស្រី ទទួលស្គាល់ថា គ្រូហាក់មានការលំបាកបន្តិចក្នុងការបង្រៀនកូនភ្លោះ ជាពិសេសក្នុងតំណាក់កាលដំបូង នៅមុនស្គាល់ពួកគេច្បាស់។
លោកស្រី បានលើកឡើងថា៖ «ខ្ញុំពិតជាមានការពិបាកក្នុងការបែងចែក Raphael និង Gabriel ដែលមានអាយុតិចជាងគេ ខ្ញុំត្រូវការពេលវេលាច្រើនដើម្បីកត់ចំណាំពីពួកគេ»។ យោងតាមស្ថិតិរបស់វិទ្យាស្ថាន Insee នៅប្រទេសបារាំង ចាប់តាំងពីឆ្នាំ១៩៨០មក កំណើតកូនភ្លោះ មានអាត្រាកាន់តែកើនឡើងជាលំដាប់៕
© រក្សាសិទ្ធិដោយ thmeythmey.com