យ៉ាងហោចណាស់ក៏មានអ្នកគាំទ្រកីឡាបាល់ទាត់ម្នាក់ នឹករលឹកដល់អ្នកសាងសង់ពហុកីឡដ្ឋានដែរ

កីឡាជាតិ

យ៉ាងហោចណាស់ក៏មានអ្នកគាំទ្រកីឡាបាល់ទាត់ម្នាក់ នឹករលឹកដល់អ្នកសាងសង់ពហុកីឡដ្ឋានដែរ

24, Oct 2016 , 10:09 am

រូបភាព

ដោយ:

ក្រៅពីព្រះឆាយាលក្ខណ៍ ព្រះករុណាព្រះមហាក្សត្រដែលយើងឃើញជាញឹកញាប់ អ្នកគាំទ្របាល់ទាត់មា្នក់កាន់រូបថតរបស់លោក វណ្ណ ម៉ូលីវណ្ណ ដែលជាស្ថាបត្យករកសាងពហុកីឡដ្ឋានជាតិក្នុងជំនួបក្រុមកម្ពុជាយកឈ្នះទីម័រខាងកើត ៣-២ នៃការប្រកួតវគ្គជម្រុះពានរង្វាន់ AFF Suzuki Cup 2016 កាលពីថ្ងៃទី២១ ខែតុលា ដែលមានអ្នកគាំទ្រប្រមាណជាជាង៥ម៉ឹននាក់នៅក្នុងពហុកីឡដ្ឋានជាតិ។

ក្នុងជំនួបក្រុមបាល់ទាត់កម្ពុជាយកឈ្នះទីម័រខាងកើត ៣-២ កាលពីថ្ងៃទី២១ ខែតុលា មានរឿងដ៏កម្រមួយបានកើតឡើង គឺមានអ្នកគាំទ្រម្នាក់បានកាន់បង្ហាញរូបថតលោក វណ្ណ ម៉ូលីវណ្ណ ដែលជាស្ថាបត្យករដ៏ល្បីល្បាញរបស់កម្ពុជា និងជាអ្នកសាងសង់ពហុកីឡដ្ឋានជាតិ។

លើសពីនេះនៅរូបថតលោក វណ្ណ ម៉ូលីវណ្ណ ផ្នែកខាងលើដែលកាន់បង្ហាញដោយដៃទាំងពីរ អ្នកគាំទ្ររូបនេះបានសរសេរអក្សរយ៉ាងខ្លីដ៏មានអត្ថន័យថា«សូមអរគុណ! លោក វណ្ណ ម៉ូលីវណ្ណ»។ ពាក្យយ៉ាងខ្លីប្រកបដោយអត្ថន័យនេះអាចសរបញ្ជាក់ពីស្នាដៃដ៏អស្ចារ្យរបស់ស្ថាបត្យកររូបនេះ ដែលអាចសាងសង់ពហុកីឡដ្ឋានជាតិមួយប្រកបដោយគុណភាពខ្ពស់អាចផ្ទុកមនុស្សដ៏ច្រើនសន្ធឹកសន្ធាប់។

គូរបញ្ជាក់ថា លោក វណ្ណ ម៉ូលីវណ្ណ កើតនៅថ្ងៃទី ២៣ ខែវិច្ឆិកា ឆ្នាំ១៩២៦ នៅស្រុករាម ខេត្តកំពត។ លោកបានទទួលសញ្ញាបត្រទុតិយភូមិពីវិទ្យាល័យព្រះស៊ីសុវត្ថិ នៅទីក្រុងភ្នំពេញ ក្នុងឆ្នាំ១៩៤៤ ហើយលោកបានទទួលអាហារូបករណ៍ទៅរៀនផ្នែកច្បាប់នៅទីក្រុងប៉ារីស ប្រទេសបារាំង ក្នុងឆ្នាំ១៩៤៦។

លោកបានបញ្ចប់ការសិក្សានៅប្រទេសបារាំងផ្នែក Arretche studio យ៉ាងជោគជ័យជាមួយនឹងចំណេះដឹង និងទេពកោសល្យ។ លោក បានវិលត្រលប់មកប្រទេសកម្ពុជាវិញនៅឆ្នាំ១៩៥៥។ លើសពីនេះ ក្រោយការវិលត្រឡប់រយៈពេលលោកត្រូវបានតែងតាំងជាប្រធានស្ថាបត្យករនៅកម្ពុជា និងបានក្លាយជាព្រឹទ្ធបុរសទីមួយនៃសាកលវិទ្យាល័យភូមិន្ទវិចិត្រសិល្បៈ។

នៅទស្សវត្សរ៍ឆ្នាំ៦០ ដល់ ៧០ លោក វណ្ណ ម៉ូលីវណ្ណ បានគូប្លង់ និងស្ថាបនាសំណង់អគារសំខាន់ៗជាច្រើននៅកម្ពុជា ជាពិសេសនៅរាជធានីភ្នំពេញ។ ក្នុងនោះលោកបានសាងសង់សាលសន្និសីទចតុមុខ វិមានឯករាជ ពហុកីឡដ្ឋានជាតិ វិមានរដ្ឋចំការមន និងសាលមហោស្រពជាតិសុរ៉ាម្រឹត ព្រមទាំងសំណង់សំខាន់ៗជាច្រើនទៀត៕