អន្តរជាតិ
លោកស្រី ប៉ាក ស្នើកែរដ្ឋធម្មនុញ្ញបន្ថែមអាណត្តិដល់ប្រធានាធិបតី
× ប្រធានាធិបតី កូរ៉េខាងត្បូងលោកស្រី ប៉ាក ហ្គឺនហេ ( Park Geun-hye) បានស្នើឲ្យមានការវិសោធនកម្មរដ្ឋធម្មនុញ្ញដើម្បីកែប្រែបទបញ្ញត្តិដែលកំណត់ឲ្យប្រធានាធិបតីមានសិទ្ធិកាន់តំណែងត្រឹមមួយអាណត្តិនោះ។ ការកែប្រែច្បាប់កំពូលនេះធ្វើឡើងដើម្បីរក្សាចីរភាពក្នុងការអនុវត្តគោលនយោបាយឲ្យបានជោគជ័យ។
ក្នុងពេលផ្តល់សុន្ទរកថាក្នុងកិច្ចប្រជុំសភាពាក់ព័ន្ធការកំណត់ថវិកាជាតិសម្រាប់ឆ្នាំក្រោយ លោកស្រី ប៉ាក ហ្គឺនហេ បានឆ្លៀតឱកាសដាក់សំណើរឲ្យមានការវិសោធនកម្មរដ្ឋធម្មនុញ្ញកូរ៉េខាងត្បូងដើម្បីត្រួសត្រាយផ្លូវឲ្យប្រធានាធិបតីកាន់អំណាចបានច្រើនជាងមួយអាណត្តិ។
យោងតាមទីភ្នាក់ងារព័ត៌មានកូរ៉េ Yonhap លោកស្រី បានបញ្ជាក់ថា រដ្ឋាភិបាលលោកស្រី រៀបចំឯកសារពាក់ព័ន្ធដើម្បីជំរុញឲ្យមានការកែប្រែរដ្ឋធម្មនុញ្ញនេះនៅក្នុងអាណត្តិលោកស្រីដែលនឹងត្រូវចប់នៅឆ្នាំ ២០១៨ ខាងមុខនោះ។ ក្នុងនោះលោកស្រីស្នើឲ្យសភាបង្កើតគណៈកម្មការពិសេសមួយជាបន្ទាន់ដើម្បីចាប់ផ្តើមពិភាក្សាលើការកែប្រែរដ្ឋធម្មនុញ្ញនេះដែរ។
តាមពិតទៅ ក្នុងបរិបទនយោបាយកូរ៉េខាងត្បូង ប្រធានាធិបតី ឬសភាមានសិទ្ធិអំណាចក្នុងការស្នើឲ្យមានការកែប្រែរដ្ឋធម្មនុញ្ញ។ រដ្ឋធម្មនុញ្ញកូរ៉េខាងត្បូងបច្ចុប្បន្នបានកំណត់ឲ្យប្រធានាធិបតីកាន់អំណាចត្រឹមមួយអាណត្តិដែលមានរយៈពេលប្រាំឆ្នាំប៉ុណ្ណោះ។ រដ្ឋធម្មនុញ្ញនេះត្រូវបានគេកែប្រែចុងក្រោយបំផុតនៅក្នុងឆ្នាំ ១៩៨៧ ដើម្បីកំណត់អាណត្តិប្រធានាធិបតីនិងបញ្ចប់របបផ្តាច់ការ ។
ទាក់ទិនការលើកសំណើរនេះដែរ លោកស្រីប្រធានាធិបតីរូបនេះបានពន្យល់ថា ការកំណត់កាលវិភាគនយោបាយកន្លងមក វាហាក់បីដូចជាមិនស្របសម្រាប់ការអនុវត្តគោលនយោបាយនិងបង្កការលំបាកសម្រាប់ការសម្រេចគោលដៅនានារបស់រដ្ឋាភិបាល។ លោកស្រីបន្តថា រយៈពេល ៥ឆ្នាំក្នុងតំណែងជាប្រធានាធិបតី បង្កឲ្យមានការប្រឈមមុខគ្នាខ្លាំងក្នុងបញ្ហានយោបាយកូរ៉េ ហើយវារារាំងមិនឲ្យរដ្ឋាភិបាលរក្សាស្ថិរភាពនៃការអនុវត្តគោលនយោបាយរបស់ខ្លួនបាន។
«ខ្ញុំសន្និដ្ឋានថា យើងមិនអាចពន្យារពេលជជែកពិភាក្សាពីការកែប្រែរដ្ឋធម្មនុញ្ញនេះបានទៀតទេ។ វាជាការសន្យារបស់ខ្ញុំ ថានឹងសម្រេចបានឲ្យបាននូវការកែប្រែការកំណត់អាណត្តិដែលយើងគ្រប់គ្នាប្រឈម ដើម្បីធ្វើយ៉ាងណាងជំរុញការអភិវឌ្ឍប្រកបដោយនិរន្តរភាពរបស់កូរ៉េខាងត្បូង»។
ជាធម្មតាការផ្លាស់ប្តូរគោលនយោបាយ ច្រើនធ្វើឡើងតាមការផ្លាស់ប្តូរប្រធានាធិបតីនិងរបបដឹកនាំ។ ដូច្នេះរយៈពេលត្រឹមតែ ៥ឆ្នាំមិនគ្រប់គ្រាន់ឡើយសម្រាប់ការអនុវត្តគោលនយោបាយឲ្យបានសម្រេចតាមគោលដៅនោះ។
យ៉ាងណាក៏ដោយចុះ គេមិនអាចដឹងថា ការឈានទៅកែប្រែរដ្ឋធម្មនុញ្ញដើម្បីបញ្ចប់ការកំណត់អាណត្តិប្រធានាធិបតីមួយអាណត្តិនេះនឹងសម្រេចបែបណាឡើយ។ ថ្វីបើមានការគាំទ្រពីប្រជាជនច្រើនក៏ដោយ វានៅមានខ្វែងគំនិតគ្នាខ្លាំងដែររវាងប្រធានាធិបតីនិងសភាប្រទេសនេះ។
Tag:
ប៉ាក ហ្គឺនហេ
កូរ៉េខាងត្បូង
© រក្សាសិទ្ធិដោយ thmeythmey.com