ជាតិ
នយោបាយជាតិ
×![]()
ដោយ: ម៉ៅ សុផា
ភ្នំពេញ៖ រឿងក្តីរបស់លោក ហុង សុខហួរ សមាជិកព្រឹទ្ធសភាពីគណបក្សសម រង្ស៊ី និងលោក ស៊ាង ចែត មេឃុំពីគណបក្សសង្គ្រោះជាតិ នឹងឈានទៅដល់ការជំនុំជម្រះលើអង្គសេចក្តី នៅក្នុងសប្តាហ៍នេះ។ អ្នកទាំងពីរ នឹងចូលរួមសវនាការ តាមការកំណត់របស់តុលាការ។
នៅចុងខែតុលា ឆ្នាំ២០១៦នេះ សាលាដំបូងរាជធានីភ្នំពេញ នឹងបើកសវនការ ដើម្បីជំនុំជម្រះលើសំណុំរឿងរបស់លោក ហុង សុខ ហួរ សមាជិកព្រឹទ្ធសភាពីគណបក្ស សម រង្ស៊ី និងសំណុំរឿងរបស់លោក ស៊ាង ចែត មេឃុំរបស់គណបក្សសង្គ្រោះជាតិ។ តាមការកំណត់របស់តុលាការ សំណុំរឿងរបស់លោក ហុង សុខហួរ ដែលពាក់ព័ន្ធនឹងបញ្ហាព្រំដែនកម្ពុជា-វៀតណាម នឹងត្រូវជំនុំជម្រះ នៅថ្ងៃទី២៦ ខែតុលា រីឯសំណុំរឿងរបស់លោក ស៊ាង ចែត ដែលទាក់ទងនឹងរឿងរ៉ាវរបស់ស្រីមុំ នឹងត្រូវជំនុំជម្រះនៅថ្ងៃទី២៨ ខែតុលា។
លោក សំ សុគង់ ដែលជាមេធាវីការពារក្តីឲ្យលោក ហុង សុខហួរ និងលោក ស៊ាង ចែត បានប្រាប់សារព័ត៌មានថ្មីៗថា លោក នឹងកូនក្តីទាំងពីររូប នឹងចូលរួមក្នុងសវនាការ តាមការកំណត់របស់តុលាការ។ លោកបានបញ្ជាក់យ៉ាងខ្លីថា៖«ពួកគាត់ (លោក ហុង សុខហួរ និងលោក ស៊ាង ចែត) នឹងចូលសវនការ។ ខ្ញុំ ក៏ចូលដែរ ដើម្បីការពារក្តីឲ្យគាត់»។
សូមបញ្ជាក់ថា លោក ហុង សុខហួរ ត្រូវបានសមត្ថកិច្ចចាប់ខ្លួន នៅខែសីហា ឆ្នាំ២០១៥។ សមាជិកព្រឹទ្ធសភាពីគណបក្សសម រង្ស៊ី រូបនេះ ត្រូវបានចោទប្រកាន់ពី «បទក្លែងឯកសារសាធារណៈ និងប្រើប្រាស់ឯកសារសាធារណៈ រួមទាំងញុះញង់ឲ្យមានបទល្មើសមជ្ឈិម» ដោយសារតែការបង្ហោះឯកសារពាក់ព័ន្ធនឹងបញ្ហាព្រំដែនកម្ពុជា-វៀតណាម នៅលើទំព័រហ្វេសប៊ុករបស់ឯកឧត្តម សម រង្ស៊ី។
ចំណែកឯ លោក ស៊ាង ចែត ដែលជាមេឃុំពីគណបក្សសង្គ្រោះជាតិ ត្រូវបានចោទពីបទ «សូកប៉ាន់សាក្សី» ពាក់ព័ន្ធនឹងរឿងរ៉ាវរបស់កញ្ញា ខុម ចន្ទតារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ។ រឿងនេះបានផ្ទុះឡើង បន្ទាប់ពីស្រីមុំ សរសេរលិខិតចំហមួយច្បាប់ ទៅកាន់តុលាការកាលពីប៉ុន្មានខែមុន ដោយចោទលោក ស៊ាង ចែត ថាបានយកប្រាក់ចំនួន៥០០ដុល្លារ ទៅសូកម្តាយរបស់នាង។ ស្រីមុំ បានបញ្ជាក់ក្នុងលិខិសនោះថា លោក ស៊ាង ចែត បានប្រើប្រាស់ទឹកប្រាក់ទាំងនោះ ដើម្បីបញ្ចុះបញ្ចូលម្តាយ ឲ្យលួងលោមរូបនាង កុំឲ្យនិយាយការពិត ពីរឿងអាស្រូវរបស់នាង ជាមួយនឹងឯកឧត្តម កឹម សុខា។ ដោយសារតែលិខិតនេះឯង ទើបលោក ស៊ាង ចែត ត្រូវបានឃាត់ខ្លួន នឹងចោទពីបទ «សូកបាន់សាក្សី»៕
Tag:
តុលាការ
មេធាវី
ហុង សុខហួរ
ស៊ាង ចែត
កាត់ទោស
© រក្សាសិទ្ធិដោយ thmeythmey.com
