ទោះមមាញឹកសិក្សា យាន សុខឃឿន ឆ្លៀតហាត់កីឡាសូហ្វតិន្នីស បាល់ទាត់ និងបាល់បោះ

កីឡាជាតិ

បទយកការណ៍ / បទសម្ភាសន៍

ទោះមមាញឹកសិក្សា យាន សុខឃឿន ឆ្លៀតហាត់កីឡាសូហ្វតិន្នីស បាល់ទាត់ និងបាល់បោះ

03, Dec 2016 , 8:19 pm

រូបភាព

ដោយ:

គ្មានឡើយពេលទំនេរសម្រាប់ យាន សុខឃឿន ទោះបីជាស្ថិតក្នុងពេលសម្រាកវិស្សមកាលក្តី ជាសិស្សរៀននៅថ្នាក់ទី១២នៃវិទ្យាល័យព្រះបាទសុរាម្រឹត ខេត្តកំពង់ឆ្នាំង សុខឃឿន អាយុ១៨ឆ្នាំ បានឃ្លាតឆ្ងាយពីក្រុមគ្រួសារដោយធ្វើដំណើរពីខេត្តកំពង់ឆ្នាំងមកហ្វឹកហាត់ជំនាញកីឡាសូហ្វតិន្នីសនៅរាជធានីភ្នំពេញ។ ការស្រលាញ់វិស័យកីឡាបានធ្វើឲ្យនាងក្លាយជាកីឡាការិនីបាល់ទាត់ និងបាល់បោះទាំងខ្លួននៅក្មេង មិនត្រឹមតែប៉ុណ្ណោះ នាងជាម្ចាស់ជើងឯកបាល់បោះ៣ជំនាន់ជាប់គ្នាតំណាងឲ្យខេត្តកំពង់ឆ្នាំងទៀតផង។

ឆ្លៀតឱកាសសាលាវិស្សមកាលកញ្ញា យាន សុខឃឿន បានឃ្លាតឆ្ងាយពីក្រុមគ្រួសារដោយធ្វើដំណើរពីខេត្តកំពង់ឆ្នាំងមកហ្វឹកហាត់ជំនាញកីឡាសូហ្វតិន្នីសនៅរាជធានីភ្នំពេញនៅក្នុងបរិវេណនៃពហុកីឡាដ្ឋានជាតិ។ ដោយមានការលើកទឹកចិត្តពីឪពុកម្តាយ និងការស្រលាញ់ធ្វើឲ្យសិស្សរៀនថ្នាក់ទី១២នៃវិទ្យាល័យព្រះបាទសុរ៉ាម្រិតរូបនេះ ព្យាយាមហ្វឹកហាត់ក្រោមពន្លឺថ្ងៃដ៏ក្តៅហែងដើម្បីអភិវឌ្ឍន៍ជំនាញមួយនេះ។ ក្រៅពីកីឡាសូហ្វតិន្នីសដែលកំពុងហ្វឹកហាត់បច្ចុប្ប សុខ ឃឿន ក៏ជាកីឡាការិនីបាល់បោះ និងបាល់ទាត់ម្នាក់ប្រចាំខេត្តកំពង់ឆ្នាំផងដែរ។

ស្ថិតក្នុងសំលៀកបំពាក់កីឡាតំណាងឲ្យក្រសួងមហាផ្ទៃ សុខឃឿន ដែលមានឪពុកជាមន្ត្រីរាជការបម្រើការងារនៅមន្ទីរអប់រំ យុវជន និងកីឡាខេត្តកំពង់ឆ្នាំង បានចូលប្រឡូកក្នុងវិស័យកីឡាបាល់ទាត់ និងបាល់បោះតាំងពីរៀននៅថ្នាក់ទី៦មកម្ល៉េះ។ ដោយសារទេពកោសល្យក្នុងការហ្វឹកហាត់កីឡាបានធ្វើឲ្យ កូនទី៤ក្នុងចំណោមបងប្អូន៥នាក់រូបនេះ ត្រូវបានគ្រូបង្វឹកដាក់ឲ្យហ្វឹកហាត់ជាមួយសិស្សច្បងដែលរៀននៅថ្នាក់អនុវិទ្យាល័យ។

ដើម្បីសម្រេចគោលបំណងដែលចង់ក្លាយជាកីឡាការិនីឆ្នើមប្រចាំខេត្តកំពង់ឆ្នាំង បានធ្វើឲ្យកុមារីដែលមានឪពុកជាមន្ត្រីអប់រំឆ្លៀតពេលទំនេរពីការសិក្សាមកខិតខំហ្វឹកហាត់ដើម្បីអភិវឌ្ឍន៍បច្ចេកទេស និងសមត្ថភាពផ្នែកកីឡាបាល់បោះ និងបាល់ទាត់យ៉ាងយកចិត្តទុកដាក់បំផុត។ តាមរយៈការហ្វឹកហាត់នេះ សុខឃឿន ត្រូវបានសាលារបស់នាងបញ្ចូនឲ្យចូលរួមប្រកួតក្នុងព្រឹត្តិការណ៍នានាស្ទើរគ្រប់ខេត្តក្រុងក្នុងព្រះរាជាណាចក្រកម្ពុជា មិនត្រឹមតែប៉ុណ្ណោះសម្រាប់ការចូលរួមនេះ នាងតែងតែសាងស្នាដៃល្អៗជូនខេត្តកំពង់ឆ្នាំងជានិច្ច។

ជាក់ស្តែងក្នុងរយៈពេល៣ឆ្នាំចុងក្រោយនេះកញ្ញា យាន សុខឃឿន បានជួយលើកកិត្តិយខេត្តកំពង់ឆ្នាំងតាមរយៈការដណ្តើមបានជើងឯកផ្នែកបាល់បោះ៣ឆ្នាំជាប់ៗគ្នា ពោលគឺឆ្នាំ២០១៤ នាងបានក្លាយជាម្ចាស់ជើងនៅលើទឹកដីរបស់ខ្លួន(កំពង់ឆ្នាំង) រីឯឆ្នាំ២០១៥ នៅខេត្តបាត់ដំបង និងឆ្នាំ២០១៦ នៅខេត្តកំពត។ ដោយសារឃើញពីទេព្យកោសល្យនិងការស្រលាញ់ យុវតីវ័យ១៨ឆ្នាំរូបនេះ ត្រូវបានលោក ជា ប៊ុនហេង អគ្គលេខាធិការសហព័ន្ធកីឡាសូហ្វតិន្នីសកម្ពុជាយកមកហ្វឹកហាត់ជំនាញកីឡាសូហ្វតិន្នីសនៅរាជធានីភ្នំពេញ ដើម្បីត្រៀមចូលរួមប្រកួតក្នុងព្រឹត្តិការណ៍ជើងឯកអាស៊ីនៅប្រទេសជប៉ុន។ ប៉ុន្តែសម្រាប់ការចូលរួមព្រឹត្តិការណ៍នេះនាងមិនទទូលមេដាយនោះឡើយ។

ទោះបីបច្ចុប្បន្នកំពុងមមាញឹកហ្វឹកហាត់កីឡាសូហ្វតិន្នីសក្នុងការពង្រឹងបច្ចេកទេស និងសមត្ថភាពក៏ដោយ ប៉ុន្តែនាងបានប្តេជ្ញាថា មិនបោះបង់វិស័យកីឡាបាល់បោះ និងបាល់ទាត់នោះឡើយ ព្រោះវាជាកីឡាចំណង់ចំណូលចិត្តតាំងពីកុមារភាព ម្យ៉ាងវាជាកីឡាដែលគេតែងតែពាំនាំនូវមេដាយជូនខេត្តរបស់គេ។

កញ្ញា យាន សុខឃឿន កូនទី៤ក្នុងចំណោមបងប្អូន៥នាក់ តែងតែយកថ្ងៃវិស្សមកាលប្រើសម្រាប់បំពេញឲ្យការសិក្សាក្រៅម៉ោង និងបំប៉នសមត្ថភាពដោយខ្លួនឯងដើម្បីត្រៀមការប្រឡង ប៉ុន្តែរូបគេបែរជាយកពេលទំនេរនៃវិស្សមកាលពីសាលាមកហ្វឹកហាត់ពង្រឹងបច្ចេកទេស និងសមត្ថភាពផ្នែកកីឡាទៅវិញ។

ប៉ុន្តែទោះជាយ៉ាងនេះក្តី កញ្ញារូបនេះបានបញ្ជាក់ថា នាងមិនដែលយកវិស័យកីឡាមកពាក់ព័ន្ធជាមួយការសិក្សានោះទេ គឹនាងបានបែកចែកពេលវេលាដាច់ដោយឡែកពីគ្នា ដោយហ្វឹកហាត់កីឡាតែពេលសម្រាកពីការសិក្សាតែប៉ុណ្ណោះ។ ចំណែកថ្ងៃសិក្សារូបគេចូលរៀនធម្មតា ហើយសម្រាប់ចំណាត់ថ្នាក់ប្រចាំខែក៏រូបគេស្ថិតក្នុងកម្រិតមធ្យមផងដែរ។

កីឡាការិនីមកពីខេត្តកំពង់ឆ្នាំងរូបនេះយល់ឃើញថា ការលេងកីឡាធ្វើឲ្យរូបគេមានអារម្មណ៍សប្បាយរីករាយ មានសុខភាពល្អ និងធ្វើឲ្យឃ្លាតឆ្ងាយពីអំពើអបាយមុខផ្សេងៗដែលសង្គមស្អប់ខ្ពើម ជាពិសេសនាំមកនូវមិត្តភាព និងសាមគ្គីភាព។ នាងបញ្ជាក់ថា ក្នុងចំណោមបងប្អូនរបស់នាងទាំងអស់ គឺសុទ្ធតែជាអ្នកលេងកីឡា លើកលែងតែបងស្រីទី២របស់គេម្នាក់ប៉ុណ្ណោះ៕