ជាតិ
សេដ្ឋកិច្ច
RDB ទើបតែបញ្ចេញកម្ចីបាន ១,៥ លានដុល្លារប៉ុណ្ណោះ នៃកញ្ចប់ថវិកា ២៧ លានដុល្លារ ដល់រោងម៉ាស៊ីនកិនស្រូវ
×![]()
ភ្នំពេញ៖ គិតត្រឹមថ្ងៃទី៣០ខែវិច្ឆិកា ធនាគារអភិវឌ្ឍន៍ជនបទ (RDB) ទើបតែបញ្ចេញកម្ចីចំនួន ១,៥ លានដុល្លារប៉ុណ្ណោះ ដល់សហគ្រាសរោងម៉ាស៊ីនកិនស្រូវចំនួន ៣ ដែលនាំឲ្យមានការចោទសួរលើបញ្ហាតម្រូវការទុន និងការបញ្ចេញប្រាក់កម្ចីរបស់ធនាគារនេះ។ 
បន្ទាប់មានការស្នើរបស់សហព័ន្ធស្រូវអង្ករកម្ពុជា (CRF) រដ្ឋាភិបាល នៅក្នុងខែកញ្ញាឆ្នាំនេះ បានសម្រេចបញ្ចេញកញ្ចប់ថវិកាពិសេសចំនួន ២៧លានដុល្លារ ដែលទឹកប្រាក់ ៧លានដុល្លារជារបស់ RDB ដើម្បីជួយលើកតម្លៃស្រូវរបស់កសិករ តាមរយៈការផ្ដល់ឥណទានដល់រោងម៉ាស៊ីនកិនស្រូវ។ ប៉ុន្តែកញ្ចប់ថវិកានេះ ត្រូវបាន RDB បញ្ចេញឥណទានបានតែ ៥,៥ ភាគរយប៉ុណ្ណោះដល់រោងម៉ាស៊ីនស្រូវ។
លោក កៅ ថាច អគ្គនាយក RDB មានប្រសាសន៍ក្នុងកិច្ចប្រជុំលើបញ្ហាស្រូវអង្ករនៅទីស្ដីការក្រសួងកសិកម្មនៅថ្ងៃទី៣០ខែវិច្ឆិកាថា RDB ស្វាគមន៍ជានិច្ចសម្រាប់ម្ចាស់រោងម៉ាស៊ីនកិនស្រូវដែលចង់បានកម្ចី ប៉ុន្តែការស្នើសុំគឺនៅតិចតួច ហាក់មិនឆ្លើយតបនឹងការលើកឡើងក្នុងពេលកន្លមកថារោងម៉ាស៊ីនកិនស្រូវជួបបញ្ហាខ្វះទុន។ លោកថ្លែងថាយ៉ាងដូច្នេះថា៖«ខុំមិនដឹងថា តើជាស្ថានភាពខ្វះទុនបង្វិល ឬស្ថានភាពអ្វីផ្សេង?។ យើងចាំសហការជានិច្ច សំខាន់ខាងរោងម៉ាស៊ីនកិនស្រូវអញ្ជើញមកដាក់ពាក្យសុំ»។
បើតាមអគ្គនាយក RDB រូបនេះ RDB ផ្ដល់កម្ចី ៧០ភាគរយនៃបរិមាណស្រូវក្នុងឃ្លាំងជាមួយអត្រាការប្រាក់ ៧ ភាគរយក្នុង១ឆ្នាំ ដល់អ្នកស្នើសុំ ហើយចំណាយពេលត្រឹមពីរថ្ងៃលើនីតិវិធីផ្ដល់កម្ចី។ លោកបញ្ជាក់ថា កញ្ចប់ថវិកាពិសេសរបស់រដ្ឋាភិបាលនេះ នឹងត្រូវបង្វិលចូលថវិកាជាតិវិញនៅខែឧសភាឆ្នាំក្រោយ។
លោក សុខ ពុទ្ធីវុធ ប្រធាន CRF ដែលចូលរួមក្នុងកិច្ចប្រជុំនោះដែរ បានផ្ដួចផ្ដើមឲ្យមានការកែសម្រួលនីតិវិធីបញ្ចេញកម្ចីរបស់ RDB ។ «នីតិវិធីក្នុងការធ្វើយើងបានជជែកគ្នាច្រើន នេះទាក់ទងនឹងដំណើរការ អ្នកចង់ហុច ហុចមិនដល់ អ្នកចង់យក យកមិនបាន»។ លោកបញ្ជាក់យ៉ាងដូច្នេះ មុននឹងលោកថ្លែងបន្តថា៖«យើងចង់ឲ្យសមាជិកយើងទាំងអស់ មានលទ្ធភាពយកកញ្ចប់ថវិកានេះ ដើម្បីពង្រីកសក្ដានុពលក្នុងរយៈពេលខ្លីរបស់ខ្លួន។ យើងត្រូវជជែកគ្នាឲ្យបានស៊ីជម្រៅបន្ថែមទៀតគឺធ្វើដូចម្តេចបង្វិលថវិកានេះឲ្យបានលឿន»៕
Tag:
ស្រូវអង្ករ
សុខ ពុទ្ធីវុធ
កៅ ថាច
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
