ជាតិ
ក្រសួងអប់រំ ប្រកាសជ្រើសរើសនិស្សិតអាហារូបករណ៍សិក្សាថ្នាក់បរិញ្ញាបត្រ ៧៧៩៧នាក់ សម្រាប់ឆ្នាំសិក្សាថ្មី
×
ភ្នំពេញ៖ ក្រសួងអប់រំ យុវជន និងកីឡា ប្រកាសដំណឹងជ្រើសរើសបេក្ខជន-បេក្ខនារីចំនួន ៧៧៩៧នាក់ សម្រាប់ទទួលអាហារូបករណ៍ចូលរៀនថ្នាក់បរិញ្ញាបត្រ សម្រាប់ឆ្នាំសិក្សា២០១៧-២០១៨។ អាហារូបករណ៍នេះ សម្រាប់សិស្សទូទៅ សិស្សអាទិភាពនារី សិស្សអាទិភាពក្រីក្រ និងសិស្សអាទិភាពតំបន់ជួបការលំបាក។ នេះបើតាមសេចក្ដីជូនដំណឹងរបស់ក្រសួងអប់រំ យុវជន និងកីឡា។
ក្រសួងអប់រំ នឹងធ្វើការជ្រើសរើសបេក្ខជនចំនួន ៧៧៩៧ នាក់ ឲ្យទទួលអាហារូបករណ៍ចូលរៀនថ្នាក់បរិញ្ញាបត្រ សម្រាប់ឆ្នាំសិក្សា ២០១៧-២០១៨។ ជាមួយគ្នានេះ សិស្ស និស្សិត អាចជ្រើសរើសចូលសិក្សានៅគ្រឺះស្ថានឧត្តមសិក្សារដ្ឋ និងឯកជន ចំនួន៣៤ ដែលផ្ដល់អាហារូបករណ៍។
សម្រាប់ លក្ខខណ្ឌនៃការចុះឈ្មោះសុំអាហារូបករណ៍ បេក្ខជនត្រូវជាសិស្សដែលកំពុងរៀនថ្នាក់ទី១២ ចំណេះទូទៅ និងបំពេញវិជ្ជា និងបេក្ខជនស្វ័យរិន ដែលប្រឡងបាក់ឌុបឆ្នាំ២០១៧។ ដោយឡែកចំពោះបេក្ខជនចង់សុំអាហារូបករណ៍ចូលរៀនមុខជំនាញប្រព័ន្ធផ្សព្វផ្សាយ និងសារគមនាគមន៍ ត្រូវមានព្រឹត្តបត្រលទ្ធផលប្រឡងជាប់ ឬសញ្ញាបត្រដែលមានតម្លៃស្មើ និងត្រូវមានអាយុច្រើនបំផុត ២២ឆ្នាំ។
ជាមួយគ្នានេះ សម្រាប់កាលបរិច្ឆេទនៃការឈប់ទទួលពាក្យ និងកន្លែងទទួលពាក្យ បេក្ខជន-បេក្ខនារី ជាសិស្សថ្នាក់ទី១២ កំពុងរៀនក្នុងឆ្នាំសិក្សា ២០១៦-២០១៧ ត្រូវទៅទទួលសំណុំពាក្យសុំអាហារូបករណ៍ពីវិទ្យាល័យរបស់ខ្លួន និងបេក្ខជនស្វ័យរិន បេក្ខជនបំពេញវិជ្ជា អាចទទួលពាក្យពីមន្ទីរអប់រំ យុវជន និងកីឡា រាជធានី-ខេត្ត ដើម្បីយកទៅបំពេញពាក្យ ចាប់ពីថ្ងៃទី២៧ ខែមេសា ឆ្នាំ២០១៧ និងប្រគល់មកវិញត្រឹមថ្ងៃទី១៦ ខែមិថុនា ឆ្នាំ២០១៧។
ចំពោះពាក្យដែលត្រូវបំពេញ សម្រាប់សិស្សទូទៅ សិស្សអាទិភាពនារី និងសិស្សអាទិភាពតំបន់ជួបការលំបាក ត្រូវភ្ជាប់មកជាមួយពាក្យសុំអាហារូបករណ៍, បង្កាន់ដៃទទួលពាក្យមានបិទរូបថត និងសលាកបត្រឯកត្តជន (សម្រាប់តែបេក្ខជនត្រូវប្រឡងសំណេរ)។ បន្ថែមលើនេះ សម្រាប់សិស្សអាទិភាពក្រីក្រ ត្រូវភ្ជាប់មកជាមួយពាក្យសុំអាហារូបរណ៍, បង្កាន់ដៃទទួលពាក្យមានបិទរូបថត, ប័ណ្ណគ្រូសារថតចម្លងដែលមានការបញ្ជាក់ពីរដ្ឋអំណាច និងសលាកបត្រឯកត្តជន (សម្រាប់តែបេក្ខជនត្រូវប្រឡងសំណេរ)។
បន្ថែមលើនេះ លទ្ធផលនៃការជ្រើសរើស នឹងមានបិទផ្សាយនៅថ្ងៃទី១៤ ខែកញ្ញា ឆ្នាំ២០១៧ នៅតាមគ្រឹះស្ថានអប់រំនីមួយៗ នៅរាជធានីភ្នំពេញ និងថ្ងៃទី១៥ ខែកញ្ញា ឆ្នាំ២០១៧ នឹងមានបិទផ្សាយនៅតាមគ្រឹះស្ថាន និងគ្រប់វិទ្យាល័យដែលមានបេក្ខជនជាប់អាហារូបករណ៍។ ចំណែក លទ្ធផលបេក្ខជនដែលជ្រើសរើសមុខជំនាញប្រឡង និងមានបិទផ្សាយនៅថ្ងៃទី ១៣ ខែតុលា ឆ្នាំ២០១៧ នៅតាមគ្រឹះស្ថាននីមួយ។ គួររម្លឹកថា បេក្ខជន១នាក់ មានសិទ្ធិចុះឈ្មោះសុំអាហារូបករណ៍បានតែ១មុខជំនាញប៉ុណ្ណោះ៕
Tag:
ក្រសួងអប់រំ
អាហារូបករណ៍
© រក្សាសិទ្ធិដោយ thmeythmey.com