ចិនដាំដើមត្នោតលម្អតាមផ្លូវសាធារណៈនៅហៃណាន

អន្តរជាតិ

ចិនដាំដើមត្នោតលម្អតាមផ្លូវសាធារណៈនៅហៃណាន

04, Dec 2016 , 7:59 pm

រូបភាព

ដោយ: ថ្មីៗ

ហៃណាន, ចិន៖ អាជ្ញាធរខេត្តហៃណាន (Hainan) បានដាំរុក្ខាច្រើនអនេករៀងជាជួរហូរហែអមតាមចញ្ចើមផ្លូវសាធារណៈ។ តាមបណ្តោយវិថីខ្វែងខ្វាត់នានាលើដែនកោះដែលមានទំហំជាង ៣ម៉ឺនគីឡូម៉ែត្រក្រឡាដែលមានពលរដ្ឋរស់នៅជាង ៩លាននាក់ស្ថិតនៅខាងត្បូងប្រទេសចិននេះ ត្រូវបានហ៊ុមព័ទ្ធជុំជិតដោយសួនច្បារ ដើមរុក្ខាត្រឈឹងត្រឈៃគួរឲ្យគយគន់។

អាជ្ញាធរខេត្តហៃណានបានដាំផ្កា និងដើមឈើស្ទើរគ្រប់ប្រភេទ លម្អតាមបណ្តាយវិថីទំហំចន្លោះពី ១០ម៉ែត្រ ទៅ ៦០ម៉ែត្រ។ រុក្ខាដែលត្រូវបានដាំដុះលម្អលើដែនកោះ Hainan ឬសមុទ្រខាងត្បូងនេះ រួមមាន ដើមដូង ជ្រៃ ស្លា រាំងភ្នំ ដើមពោធិ៍ ជាពិសេសគឺ ដើមត្នោត តែម្តង។

រុក្ខាទាំងនេះ ត្រូវបានដាំដុះផងដែរ តាមបណ្តោយផ្លូវហាយវ៉េទំហំពី ៣០ម៉ែត្រ ទៅ៦០ម៉ែត្រ ចម្ងាយជាង ២០០គីឡូម៉ែត្រ ចាប់ពីតំបន់ហៃខូវ (Haikou) ដែលជាទីរួមខេត្តស្ថិតនៅភាគខាងជើង រហូតដល់តំបន់សាន់យ៉ា (Sanya) ដែលជាតំបន់ទេសចរពេញនិយមនៅភាគខាងត្បូង នៃកោះហៃណាន (Hainan)។

ដោយសារតែធម្មជាតិល្អស្រស់បំព្រងនៅលើដែនកោះដែលមានការអភិវឌ្ឍន៍នៅដើមសតវត្ស ទី២០មកនេះ នាំឲ្យជនជាតិចិនភាគច្រើន ពិសេសចិនរស់នៅភាគខាងជើង (នៅតំបន់ត្រជាក់) ភាគច្រើនតែងចំណាយពេលធ្វើដំណើរកម្សាន្តលើកោះចិនភាគខាងត្បូង ចន្លោះពីខែតុលា ដល់ខែមករា ពីព្រោះវាមានធម្មជាតិស្រស់បំព្រង អាកាសត្រូពិចត្រជាក់ល្មម និងខ្យល់អាកាសបរិសុទ្ធ។

បើតាមលោក A Hia មគ្គទេសក៏ទេសចរប្រចាំ Hianan កោះហៃណានជាតំបន់ទេសចរធម្មជាតិជាប់ចំណាត់ថ្នាក់ទី ៣ ចូលចិត្តមកលំហែកម្សាន្ត នៅរដូវត្រជាក់ បន្ទាប់ពីខេត្តក្វាងតុង និងខេត្តជាំងស៊ី ទូទាំងប្រទេសចិនដែលពលរដ្ឋរស់នៅជាង ១ពាន់លាននាក់ ៕