សពព្រះតេជគុណ សំ ប៊ុនធឿន ដែលត្រូវឃាតករបាញ់សម្លាប់កាលពី ១៣ ឆ្នាំមុន ត្រូវបានបូជាហើយ

ជាតិ

សពព្រះតេជគុណ សំ ប៊ុនធឿន ដែលត្រូវឃាតករបាញ់សម្លាប់កាលពី ១៣ ឆ្នាំមុន ត្រូវបានបូជាហើយ

04, Dec 2016 , 2:17 pm

រូបភាព

រូបភាពពីហ្វេសប៊ុក ពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា

ដោយ:

ក្រោយពីតម្កល់អស់រយៈពេលជាង ១៣ ឆ្នាំ សពរបស់ព្រះតេជគុណ សំ ប៊ុនធឿន អតីតធម្មាចារ្យដ៏ល្បីនៅកម្ពុជា ត្រូវបានបូជាហើយកាលពីយប់ថ្ងៃទី ៣ ខែធ្នូ ឆ្នាំ ២០១៦ ។

ពិធីបូជាព្រសពព្រះតេជគុណ កេតុធម្មោ សំ ប៊ុនធឿន ធ្វើឡើងនៅ ពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ស្ថិតនៅក្នុងស្រុកពញ្ញាឮ ខេត្តកណ្តាល ជាទី ដែលតម្កល់ព្រះសពព្រះអង្គអស់រយៈពេលជាង ១៣ ឆ្នាំមកហើយ។ ពិធីបួជាសពរបស់ធម្មកថិក ដែលជំនាញផ្នែកវិបស្សនាអង្គនេះ រៀបចំឡើងពីថ្ងៃទី ១ ដល់ថ្ងៃទី ៤ ខែធ្នូ ដោយមានការនិមន្តចូលរួមពីសម្តេចសង្ឃ, ព្រះសង្ឃស្ទើរគ្រប់ខេត្ត និងពុទ្ធបរិស័ទរាប់ពាន់នាក់ផងដែរ។

សូមរម្លឹក ព្រះតេជគុណ សំ ប៊ុនធឿន ត្រូវបានឃាតករលួចបាញ់សម្លាប់កាលពីថ្ងៃទី ៨ ខែកុម្ភៈ ឆ្នាំ ២០០៣ នៅក្នុងបរិវេណវត្តលង្ការ រាជធានីភ្នំពេញ ក្នុងព្រះជន្ម ៤៧ ព្រះវស្សា។ ទោះជាយ៉ាងណា អស់រយៈពេលជាង ១៣ ឆ្នាំ មកនេះ រដ្ឋាភិបាល នៅតែមិនទាន់អាចវែកមុខឃាតករ ដែលបាញ់ប្រហារព្រះតេជគុណធម្មាចារ្យដ៏ល្បីឃើញនោះទេ។

បើតាមសៀវភៅមានចំណងជើងថា ជីវប្រវត្តិ ព្រះធម្មវិបស្សនា សំ ប៊ុនធឿន កេតុធម្មោ ដែលបោះពុម្ភដោយគណៈកម្មាធិការពុទ្ធមណ្ឌលវិបស្សនាធុរៈ កាលពីឆ្នាំ ២០០៤ ព្រះតេជគុណ សំ ប៊ុនធឿន ប្រសូត្រនៅថ្ងៃទី ១៨ ខែមីនា ឆ្នាំ ១៩៥៧ នៅភូមិរកាកោង ឃុំរកាកោង ស្រុកមុខកំពូល ខេត្តកណ្តាល។ ក្រោយពីរបប ប៉ុល ពត ពោលគឺឆ្នាំ ១៩៨០ ព្រះអង្គចូលសាងព្រះផ្នួស ក្នុងព្រះជន្ម ២៤ ព្រះវស្សា។ ចាប់តាំងពីក្លាយជាបព្វជិតមក ព្រះតេជគុណ បានស្វះស្វែងរកសាលាសិក្សាទាំងផ្លូវលោក និងផ្លូវធម៌ និងបានទេសនាតាមវិទ្យុផងដែរ។ ព្រះអង្គបានសរសេរសៀវភៅ ចំនួន ១៥ ក្បាល ដើម្បីជាប្រយោជន៍សម្រាប់ពុទ្ធបរិស័ទខ្មែរ។ ព្រះអង្គ ក៏ជាសង្ឃដំបូងគេ ដែលបានង្កើតមជ្ឈមណ្ឌលវិបស្សនាធុរៈនៅក្នុងកម្ពុជាចំនួន ៨ ខេត្ត មានខេត្តកណ្តាល ក្រចេះ តាកែវ សៀមរាប ពោធិ៍សាត់ និងកំពង់ធំជាដើម៕