ជាតិ
នយោបាយជាតិ
ឯកឧត្តម កឹម សុខា ចង់ចូលគាល់ព្រះរាជាសិន មុនជួបអ្នកគាំទ្រនៅមូលដ្ឋាន រូបពីហ្វេសប៊ុកឯកឧត្តម កឹម សុខា
×
បន្ទាប់ពីព្រះមហាក្សត្រ សម្រេចលើកលែងទោស ប្រធានស្តីទីគណបក្សសង្គ្រោះជាតិ ឯកឧត្តម កឹម សុខា បានប្រាប់ពីអារម្មណ៍ផ្ទាល់ខ្លួនថា រូបឯកឧត្តមពិតជានឹកប្រជាជននៅតាមបណ្តាខេត្ត និងចង់ទៅជួបអ្នកគាំទ្រទាំងនោះណាស់។
ក៏ប៉ុន្តែមុននឹងទៅជួបអ្នកគាំទ្រខ្លួននៅមូលដ្ឋាន ឯកឧត្តម កឹម សុខា បញ្ជាក់ថា លោកនឹងទៅចូលគាល់ព្រះមហាក្សត្រព្រះបាទ សម្តេច នរោត្តម សីហមុនី ជាមុនសិន។ យ៉ាងឯកឧត្តម សុខា មិនប្រាប់ឲ្យដឹងថា បំណង់របស់ឯកឧត្តម ដែលចង់ចូលគាល់ព្រះមហាក្សត្រនោះ ដើម្បីទូលថ្វាយព្រះរាជាពីរឿងអ្វីនោះឡើយ។
នៅចំពោះមុខក្រុមយុវជនមកពីខេត្តកំពង់ចាម នៅទីស្នាក់ការកណ្តាលបក្ស នាសង្កាត់ចាក់អង្រែលើនៅថ្ងៃទី ៤ ធ្នូ ប្រមុខបក្សប្រឆាំងរូបនេះ លើកឡើងយ៉ាងនេះថា៖« ខ្ញុំនឹងចូលគាល់ព្រះមហាក្សត្រសិន។ ខ្ញុំបានធ្វើលិខិតថ្វាយព្រះមហាក្សត្ររួចហើយ»។ បន្ទាប់ពីឯកឧត្តម ចូលគាល់ព្រះមហាក្សត្រហើយ ឯកឧត្តមនឹងជួបជាមួយសកម្មជន មន្ត្រីបក្ស និងមន្ត្រីអង្គការសង្គមស៊ីវិល ដែលកំពុងជាប់ពន្ធាគារ មុននឹងធ្វើដំណើរឆ្ពោះទៅមូលដ្ឋានជួបអ្នកគាំទ្រ។ នេះជាការបន្ថែមរបស់ឯកឧត្តមប្រធានស្តីទីគណបក្សប្រឆាំង ដែលបានត្រឡប់ទៅផ្ទះវិញកាលពីថ្ងៃទី ៣ ខែធ្នូ បន្ទាប់ពីឃុំខ្លួនអស់រយៈពេលប្រមាណ ៦ ខែ ក្នុងស្នាក់ការបក្ស៕
Tag:
កឹម សុខា
ព្រះមហាក្សត្រ
© រក្សាសិទ្ធិដោយ thmeythmey.com